1Եւ եղեւ ի միւսում տարւոջն յելանել թագաւորացն՝ ած Յովաբ զամենայն գունդս զօրացն, եւ ապականեաց զամենայն երկիր որդւոցն Ամոնայ. եկին եւ նստան շուրջ զՀռաբաթաւ. եւ Դաւիթ նստէր յԵրուսաղէմ. եւ ա՛ռ Յովաբ զՀռաբաթ, եւ կործանեաց զնա։ 2Եւ ա՛ռ Դաւիթ զպսակն Մեղքոմայ թագաւորին նոցա ի գլխոյ նորա, եւ գտաւ կշիռ նորա տաղանդ ոսկւոյ, եւ ի նմա ակն պատուական, եւ էր ի գլուխն Դաւթայ. եւ աւար բազում յոյժ եբեր։ 3Եւ զժողովուրդն որ էր ի նմա՝ եհան, եւ սղոցեաց սղոցօք եւ ուրագօք երկաթեօք՝՝. եւ այնպէս արար Դաւիթ ամենայն քաղաքաց որդւոցն Ամոնայ. եւ դարձաւ Դաւիթ եւ ամենայն զօրն իւր յԵրուսաղէմ։

4Եւ եղեւ յետ այնորիկ եղեւ միւսանգամ պատերազմ ի Գազեր ընդ այլազգիսն. յայնժամ եհար Սուբաքէ Ասովթացի զՍեպփիաս յորդւոց սկայիցն եւ վանեաց զնա՝՝։ 5Եւ եղեւ դարձեալ պատերազմ ընդ այլազգիսն, եւ եհար Եղէանան որդի Յայիրայ զՂէեմի զեղբայրն Գողիադու Գեթացւոյ. եւ փայտ նիզակի նորա իբրեւ զստորի ոստայնանկաց։

6Եւ եղեւ դարձեալ պատերազմ ի Գէթ. եւ էր այր ոմն մեծ յոյժ, եւ մատունք նորա վեց վեց՝ քսան եւ չորք. եւ նա էր յորդւոց սկայիցն։ 7Եւ թշնամանէր զԻսրայէլ. եւ եհար զնա Յովնաթան որդի Սամաայ, որդի եղբօր Դաւթայ։ 8Նոքա եղեն Հռափայ ի Գէթ. ամենեքեան էին արք հսկայք,՝՝ եւ անկան ի ձեռն Դաւթայ եւ ի ձեռն ծառայից նորա։