1Եւ Դաւիթ էր ծեր եւ լի աւուրբք. եւ թագաւորեաց Սողոմոն որդի նորա փոխանակ նորա՝՝ ի վերայ Իսրայելի։ 2Եւ ժողովեաց զամենայն իշխանսն Իսրայելի, եւ զքահանայս եւ զՂեւտացիս։ 3Եւ մտին ի թիւն Ղեւտացիքն յերեսնամենից եւ ի վեր. եւ եղեւ թիւ նոցա ըստ գլխոց իւրեանց՝ արք ութ հազար եւ երեսուն։ 4Եւ ի նոցանէ գործավարք ի վերայ գործոյ տանն, եւ քսան եւ չորք հազարք դպիրք, եւ դատաւորք վեց հազար, 5եւ չորք հազարք դռնապանք, եւ չորք հազարք օրհնիչք Տեառն՝ նուագարանօքն որովք արարին՝՝ օրհնել զՏէր։ 6Եւ որոշեաց զնոսա Դաւիթ յօր ըստ օրէ պաշտամունս՝՝ զորդիսն Ղեւեայ, զԳերսոն, զԿահաթ եւ զՄերարի։

7Եւ Գերսոն եւ՝՝ Եղեադան եւ Սեմէի. 8որդի Եղեադանայ իշխան Իսրայելի. եւ Եթոմ եւ Յովէլ՝՝։ 9Եւ որդիք Սեմեայ՝ Սաղովմիթ եւ Ազիէլ եւ Արան. երեք սոքա իշխանք տոհմիցն Եղեադանայ։ 10Եւ որդիքն Սեմեայ՝ Յեթ եւ Զիզա եւ Յովաս եւ Բարիա. սոքա որդիք Սեմեայ չորք։ 11Եւ էր Յեթ իշխան, եւ Զիզա երկրորդ. եւ Յովաս եւ Բարիա ոչ յաճախեցին որդիս, եւ եղեն ի տուն տոհմին ի միում համարի։ 12Որդիք Կահաթու՝ Ամրամ եւ Իսահառ, Քեբրոն եւ Ոզիէլ՝ չորք։ 13Որդիք Ամրամայ՝ Ահարոն եւ Մովսէս. եւ որոշեցաւ Ահարոն սուրբ լինել ի սրբութիւնս սրբութեանցն՝ ինքն եւ որդիք իւր մինչեւ յաւիտեան, ծխել խունկս առաջի Տեառն, պաշտել եւ աղօթս առնել յանուն նորա մինչեւ յաւիտեան։ 14Եւ Մովսէս այրն Աստուծոյ եւ որդիք նորա կոչեցան ի ցեղն Ղեւեայ։ 15Որդիք Մովսիսի՝ Գերսամ եւ Եղիազար։ 16Որդիք Գերսամայ՝ Սուբայէլ իշխան. 17եւ էր որդի Եղիազարու Հռաբիա իշխան, եւ ոչ գոյր այլ որդի Եղիազարու. եւ որդիքն Հռաբեայ աճեցին ի բարձրութիւն։ 18Որդիք Իսահառայ՝ Սաւուղ եւ Մովէ իշխանք՝՝։ 19Որդիք Քեբրոնի՝ Յերիա իշխան, Ամարիա երկրորդ, եւ Ոզիէլ երրորդ, եւ Յեկեմիաս չորրորդ։ 20Որդիք Ոզիելի՝ Միքիա իշխան, եւ Յեսիաս երկրորդ։

21Որդիք Մերարեայ՝ Մոողի եւ Մուսի. որդիք Մոողեայ՝ Եղիազար եւ Կիս։ 22Եւ մեռաւ Եղիազար, եւ ոչ գոյին նորա որդիք, այլ դստերք միայն. եւ առին զնոսա որդիքն Կիսեայ եղբարքն իւրեանց։ 23Որդիք Մուսեայ՝ Մովղի եւ Եդեր եւ Արիմովթ՝ երեք։

24Սոքա որդիք Ղեւեայ ըստ տանց տոհմից իւրեանց, իշխանք ցեղիցն իւրեանց, ըստ համարոյ իւրեանց եւ ըստ թուոյ անուանցն ըստ գլխոցն իւրեանց, առնէին զգործ պաշտաման ի տան Տեառն ի քսանամենից եւ ի վեր։ 25Վասն զի ասաց Դաւիթ. Հանգոյց Տէր Աստուած զժողովուրդ իւր զԻսրայէլ, եւ բնակեաց յԻսրայէլ՝՝ մինչեւ յաւիտեան։ 26Եւ Ղեւտացիքն ոչ բառնային ամենեքեան՝՝ զխորանն եւ զամենայն սպաս նորա ի պաշտաման նորին։ 27Վասն զի ի բանսն Դաւթայ ի վերջինս էր թիւ որդւոցն Ղեւեայ ի քսանամենից եւ ի վեր։ 28Քանզի կացոյց զնոսա ի ձեռն որդւոցն Ահարոնի պաշտել ի տանն Տեառն, ի սրահսն եւ ի սենեակսն եւ ի սրբութիւնսն, եւ ի վերայ ամենայն սրբութեանցն, եւ ի պաշտամունսն տանն Աստուծոյ, 29հացին առաջադրութեան, եւ ի վերայ նաշհոյ պատարագացն եւ քաքարացն բաղարջացն եւ տապակին, եւ զանգելոցն իւղով, եւ յամենայն չափսն, 30կալ առաւօտուց օրհնել եւ խոստովան լինել Տեառն, նոյնպէս եւ ընդ երեկս, 31եւ ի վերայ ամենայն մատուցելոց ողջակիզաց Տեառն, ի շաբաթսն եւ յամսամուտս եւ ի տօնս, ըստ թուոյն, ըստ իրաւանցն, ի վերայ նոցին յամենայն ժամ Տեառն։ 32Եւ պահէին զպահպանութիւնս խորանին վկայութեան, եւ զպահպանութիւնս որդւոցն Ահարոնի եղբարցն իւրեանց պաշտել ի տանն Տեառն։