1Եւ զորդիսն Ահարոնի զատոյց՝՝. որդիք Ահարոնի՝ Նադաբ եւ Աբիուդ, եւ Եղիազար եւ Իթամար։ 2Եւ մեռան Նադաբ եւ Աբիուդ առաջի հօրն իւրեանց. եւ որդիք ոչ գոյին նոցա. եւ քահանայացան Եղիազար եւ Իթամար որդիքն Ահարոնի՝՝։ 3Եւ զատոյց զնոսա Դաւիթ, զՍադովկ յորդւոցն Եղիազարու, եւ զԱքիմելէք յորդւոցն Իթամարայ, ըստ համարոյն իւրեանց եւ ըստ պաշտաման իւրեանց, եւ ըստ տանց տոհմիցն նոցա՝՝։ 4Եւ գտան որդիքն Եղիազարու յոլովագոյնք յիշխանս զօրաւորացն՝ քան զորդիսն Իթամարայ, եւ որոշեաց զնոսա. զորդիսն Եղիազարու կացոյց իշխանս տանց տոհմիցն, արս վեշտասան. եւ զորդիսն Իթամարայ ըստ տանց տոհմիցն, արս ութ։ 5Եւ զատոյց զնոսա ըստ վիճակին նոցա՝՝. վասն զի էին իշխանք սրբութեանցն եւ առաջնորդք ի տանն Տեառն յորդւոցն Եղիազարու եւ յորդւոցն Իթամարայ։ 6Եւ գրեաց զնոսա Սամէաս որդի Նաթանայելի, դպիր Ղեւտացւոցն յանդիման արքայի եւ իշխանացն, եւ Սադովկայ քահանայի եւ Աքիմելեքայ որդւոյ Աբիաթարայ եւ իշխանք տոհմից քահանայիցն եւ Ղեւտացւոցն ի տանէ ազգին իւրեանց, մի մի առ որդիսն Եղիազարու, եւ մի մի առ որդիսն Իթամարայ՝՝։

7Եւ ել վիճակն առաջին՝ Յարիբայ, եւ երկրորդն՝ Յադինայ, 8երրորդն՝ Քարեմայ, չորրորդն՝ Սեուրինայ, 9հինգերորդն՝ Մեղքեայ, վեցերորդն՝ Մերեայ, 10եւթներորդն՝ Ակկուսայ, ութերորդն՝ Աբիայ, 11իններորդն՝ Յեսուայ, տասներորդն՝ Սեքենեայ, 12մետասաներորդն՝ Եղիասիբայ, երկոտասաներորդն՝ Սաղակիմայ, 13երեքտասաներորդն՝ Ոփփայ, չորեքտասաներորդն՝ Իզբայելի, 14հնգետասաներորդն՝ Բեղգայ, վեշտասաներորդն՝ Եմմերայ, 15եւթնուտասներորդն՝ Եզիրայ, ութուտասներորդն՝ Ափեսայ, 16իննուտասներորդն՝ Փեթեայ, քսաներորդն՝ Եզեկիելի, 17քսաներորդ առաջներորդն՝ Յաքինայ, քսաներորդ երկրորդն՝ Գամուելի, 18քսաներորդ երրորդն՝ Դաղայեայ, քսաներորդ չորրորդն՝ Մոզեայ։ 19Այս է համար նոցա ըստ պաշտամանն իւրեանց մտանել ի տունն Տեառն, ըստ իրաւանց իւրեանց, ի ձեռն Ահարոնի հօրն իւրեանց. որպէս պատուիրեաց Տէր Աստուած Իսրայելի։

20Եւ յորդւոցն Ղեւեայ մնացելոց՝ յորդւոցն Ամրամայ՝ Սուբայէլ, Յուդայիա. Աբադիա. 21յորդւոցն Աբեայ՝ իշխան՝՝ Յեսիաս. 22յորդւոցն Սարայիսայ՝ Սաղամովթ. յորդւոցն Սաղամովթայ՝ Յանաթ. 23եւ յորդւոցն Քեբրոնի՝ Յերիա առաջին, Ամարիաս երկրորդ, Յեզիէլ երրորդ, Յեկիմաս չորրորդ. 24որդիքն Ոզիելի՝ Միքա առաջին, եւ Յուսա երկրորդ, եւ որդի Միքայի՝՝ Սամեր. 25եւ եղբայր Միքայի՝ Յեսիէ. որդիք Յեսեայ՝ Զաքարիաս. 26որդիք Մերարեայ՝ Մոողի եւ Մուսի. 27Ոզիա որդի նորա, Բոնիա որդի նորա՝՝, եւ Զաքկուր եւ Ոբրիա. 28Մոողի, Եղիազար եւ Կիս որդի նորա. 29եւ որդի Կիսեայ՝ Իսմայէլ՝՝. 30եւ որդիք Մուսեայ՝ Մոողի եւ Յեդեր եւ Յերիմովթ։ Սոքա էին որդիք Ղեւտացոյց ըստ տանց տոհմիցն իւրեանց։ 31Առին եւ նոքա վիճակս, որպէս եւ եղբարքն իւրեանց որդիքն Ահարոնի, առաջի թագաւորին. եւ Սադովկ եւ Աքիմելէք՝ յիշխանաց տոհմից քահանայիցն, եւ ի Ղեւտացւոցն ցեղքն՝ որք կացին իբրեւ զեղբարսն իւրեանց զկրտսերագոյնսն՝՝։