1Եւ ի զատուցեալս դրանցն յորդւոցն Կորխայ՝ Մոսողամ որդի Կորիսայ յորդւոցն Ասափայ, 2եւ Մասեղամեայ որդիք Զաքարիա անդրանիկ, Յազիէլ երկրորդ, Զեբադիաս երրորդ, Նաթանա չորրորդ, 3Եղամ հինգերորդ, Յովհանան վեցերորդ, Եղիովէ եւթներորդ։ 4Եւ Աբդեդովմայ որդիք՝ Սամէաս անդրանիկ եւ Յովազաբադ երկրորդ, Յովաթա երրորդ, Սաքար չորրորդ, Նաթանայէլ հինգերորդ, 5Ամիէլ վեցերորդ, Իսաքար եւթներորդ, Փեղաթի ութերորդ. վասն զի օրհնեաց զնա Աստուած։ 6Եւ Սամէասայ որդւոյ նորա անդրանկան ծնան որդիք զօրաւորք ի տան հօրն իւրոյ, վասն զի հզօրք էին։ 7Որդիք Սամէասայ՝ Ադոնի եւ Ռափայէլ եւ Յովբեդ եւ Եղզաբեթ, Աքիու եւ եղբարք իւր՝՝ որդիք զօրաւորք ուժով, Եղիու եւ Սամաքիաս եւ Իզբակոս՝՝. 8ամենեքեան սոքա որդիք Աբդեդովմայ, ինքեանք եւ որդիք իւրեանց եւ եղբարք իւրեանց՝ զօրացեալք զօրութեամբ, գործէին զօրութեամբ զգործս, վաթսուն եւ երկու Աբդեդովմայ։ 9Եւ Մասողամայ՝ որդիք եւ եղբարք հասունք՝ ութուտասն։ 10Եւ Ովսեայ յորդւոցն Մերարեայ որդի մի՝ Շամարի, որում պահէին զգլխաւորութիւն. զի ոչ գոյր անդրանիկն ի միջի, եւ ա՛ռ եդ զնա հայր իւր սկիզբն. 11Քեղկիա՝ երկրորդ, Տաաբէլ՝ երրորդ, Զաքարիա՝ չորրորդ. ամենեքեան սոքա Ուսայեայ որդիք, եւ եղբարք նորա՝ չորեքտասանք։ 12Սոցա ել բաժին վիճակաւ դրանցն գլխաւորութեանց՝ կալ շաբաթաւոր առաջի եղբարցն իւրեանց, եւ պաշտել ի տան Տեառն։ 13Եւ արկին վիճակ ըստ փոքուն եւ ըստ մեծին, ըստ տանց ազգատոհմին իւրեանց ի դրունս դրունս։ 14Եւ ել վիճակ դրանն արեւելից Սեմեայ. եւ Զաքարեայ որդւոյ նորա խորհրդական ի միտս իւր, արկանէին վիճակս, եւ ել նմա վիճակն ընդ կողմն հիւսիսոյ։ 15Եւ Աբդեդովմայ ընդ հարաւակողմն կոյս. եւ որդւոց իւրոց ընդդէմ տանն Ասսուփիմ։ 16Յերրորդեան՝ սեմոյն Ովասայ ընդ արեւմուտս կոյս. դրամբն հանդերձ սրսկապանին, ելից ճանապարհին, պահ առ պահ ընդ արեւելս՝՝։ 17Իսկ Ղեւտացիքն վեց վեց, յաւուր ընդ կողմանս հիւսիսոյ չորս չորս, յաւուր ընդ կողմանս հարաւոյ չորս չորս, յաւուր՝ յԱսափինն. եւ երկուս երկուս ի փոխանակել։ 18Եւ ընդ արեւմուտս չորս, եւ ի ճանապարհ երկուս երկուս փոխանակաւ՝՝։ 19Այս վիճակ բաժնիւ դարապանաց որդւոցն Կորխայ եւ որդւոցն Մերարեայ։

20Եւ Ղեւտացիքն եղբարբք իւրեանց հանդերձ՝՝ ի վերայ գանձին տանն Տեառն, եւ ի վերայ գանձին սրբոյն սրբոց։ 21Որդիքն Ղադանայ որդւոյ Գերսամ, Ղադանա իշխանք ազգաց տոհմին Ղադանու եւ Գերսամայ, Յէիէլ, 22եւ՝՝ Զեթամ, եւ Յովէլ՝ եղբայր նորա ի վերայ գանձին տան Տեառն։ 23Եւ Ամրիմ եւ Իսահառ, Քեբրոն եւ Ոզիէլ 24եւ Սեբիէլ Գերսամեանց Մուշեանց՝ զօրագլուխք՝՝ ի վերայ գանձուցն։ 25Եւ եղբայր նորա Եղիազար՝՝, Հռաբիա որդի նորա, Եսայի որդի նորա, Յովրամ որդի նորա, Զեքրի որդի նորա։ 26Եւ ինքն Սաղոմովթ եւ եղբարք իւր ի վերայ ամենայն գանձուն սրբոյն սրբոց, զոր նուիրեաց Դաւիթ եւ իշխանք տոհմիցն՝ հարիւրապետք եւ հազարապետք եւ իշխանք զօրութեանցն, 27զոր առեալ էր ի քաղաքաց անտի աւար, եւ նուիրեալ էր ի նոցանէն, զի մի նուազեսցի գործք շինուածոյ տանն Աստուծոյ։ 28Զոր նուիրեցին Սամուէլ տեսանողն եւ Սաւուղ Կիսեանց եւ Աբեններ Ներեանց, եւ Յովաբ որդի Շարուհեայ. եւ ամենայն նուէրք որ էին ի ձեռս Սաղոմովթայ եւ եղբարց իւրոց. 29Յեսսարի եւ՝՝ Քոնոնիա եւ որդիք իւր. եւ գործքն՝՝ գործոյն արտաքնոյ ի վերայ Իսրայելի, զի գրիցեն եւ վճարիցեն 30ի Քեբրոնիա. Սադիաս՝՝ եւ եղբարք իւր, որդիք զօրութեան հազար եւ եւթն հարեւր, ի վերայ ոստիկանութեան Իսրայելի յայնկոյս Յորդանանու գետոյն ընդ արեւմուտս, յամենայն գործ պաշտաման Տեառն, եւ ի գործ արքունի. 31Քեբրոնեա Ուրիաս իշխան, Քեբրոնեայ ազգատոհմօքն իւրեանց հանդերձ. յամին՝՝ քառասներորդի թագաւորութեանն Դաւթի՝ այս յաշխարհագրի անդ գտաւ այր զօրութեանց ի նոսա Յազերն Գաղադիտացւոց։ 32Եւ եղբարք իւր որդիք զօրաւորք, երկու հազար եւ եւթն հարեւր, գլխաւորք տոհմին. եւ կացոյց զնոսա արքայ Դաւիթ ի վերայ գնդին Ռուբենայ եւ Գադայ եւ կէս ազգին Մանասեան գնդին, վասն ամենայն բանից Աստուծոյ, բանից արքունի։