1Եւ որդիք Իսրայելի իւրաքանչիւր թուոց, նահապետք ազգատոհմին հազարաւորք եւ հարիւրաւորք. եւ համարակար դպիրք որ պաշտէին ի ժողովրդեանն զամենայն համարս արքունի, ըստ իւրաքանչիւր գործոյն համարոյ ելին եւ մտին ամսոյ ամսոյ յամենայն ամիսս տարւոյն։ 2Ընտրութիւն առաջին համարոյ առաջնոյ ամսեանն՝ Յեզբաամ եւ Բաղէէլ՝՝, եւ ընտրութիւն ելից նորա քսան եւ չորս հազարք. 3յորդւոց Փարեսայ, որ գլուխ էր ամենայն իշխանացն զօրաց եւ ամսեանն առաջնոյ։ 4Ընտրութիւն ամսոյն երկրորդի՝ Դովդայի եւ Դաքոթի՝՝, եւ Մագաղաւովթ առաջնորդ, եւ ընտրութիւն նորա քսան եւ չորս հազարք։ 5Իշխան զօրութեան երրորդ յամսեանն երրորդի՝ Բանեա, Յովադ՝ քահանայի, իշխան. եւ յընտրութեան նորա, քսան եւ չորս հազարք։ 6Ինքն Բանեա հզօրագոյն քան զերեսունսն, եւ ի վերայ երեսնիցն բաժին ընտրութեան իւրոյ՝՝։ 7Յամսեանն չորրորդի՝ Ասայէլ եղբայր Յովաբու, եւ Զաբդէաս որդի նորա եւ եղբարք իւր՝՝ զկնի նորա. եւ ընտրութիւնք բաժնի նորա քսան եւ չորս հազարք։ 8Հինգերորդ ամսեանն՝ հինգերորդ իշխան Սամիովթ յԻզրայ. եւ բաժին մասին նորա քսան եւ չորս հազարք։ 9Վեցերորդ ամսեանն՝ վեցերորդ իշխան Էկէս որդի Եկգեայ Թեկուացւոյ. եւ մասն բաժնի նորա քսան եւ չորս հազարք։ 10Յեւթներորդում ամսեանն՝ եւթներորդ իշխան Քեղ Փաղոմեանց յորդւոց Եփրեմայ. եւ մասն բաժնի իւրոյ քսան եւ չորս հազարք։ 11Ութերորդ յամսեանն ութերորդի՝ Ուսաք Եկիեսթայեանց Զարայեայ՝՝. եւ մասն բաժնի նորա քսան եւ չորս հազարք։ 12Իններորդ յամսեանն իններորդի՝ Աբիեզեր որ յԱնաթովթայն, որ ի Բենիամին երկրի. եւ մասն ի բաժնի իւրում քսան եւ չորս հազարք։ 13Տասներորդ յամսեանն տասներորդի՝ Մաարի Նետոփաթեանց Զարայ. եւ մասն բաժնի իւրում քսան եւ չորս հազարք։ 14Մետասաներորդն յամսեանն մետասաներորդի՝ Բանեա ի Փարաթոնեայ, յորդւոցն Եփրեմի, եւ ի զատուցեալսն նորա քսան եւ չորս հազարք։ 15Երկոտասաներորդն յամսեանն երկոտասաներորդի՝ Քաղդայ ի Նետոփաթայ, որդի Գոթոնիելի՝՝. եւ ի զատուցեալս նորա քսան եւ չորս հազարք։

16Եւ ի ցեղիցն Իսրայելի, Ռուբենի իշխան՝ Եղիազար որդի Զեքրեայ, եւ Շմաւոնի՝ Սափատիաս որդի Մակքեայ, 17եւ Ղեւեայ՝ Ասաբիա որդի Կամուելի, եւ Ահարոնի՝ Սադովկ, 18Եւ Յուդայ՝ Եղիաբ յեղբարցն Դաւթի, եւ Իսաքարայ՝ Ամարիաս որդի Միքայելի, 19եւ Զաբուղոնի՝ Սամէաս որդի Աբդեայ, եւ Նեփթաղիմայ՝ Յերիմովթ որդի Ոզիելի, 20եւ Եփրեմի՝ Ովսեր որդի Ոզեայ, եւ կիսոյ ցեղին Մանասէի՝ Յովէլ որդի Փաղդեայ, 21եւ կիսոյ ցեղին Մանասէի որ էր ի Գաղաադ՝ Յադայի որդի Զաքարեայ. որդւոցն Բենիամինի՝ Ասիէլ որդի Աբեններայ, 22Դանայ՝ Եզրիէլ որդի Յովրամայ. սոքա էին նահապետք ցեղիցն Իսրայելի։

23Եւ ոչ ա՛ռ Դաւիթ զթիւն նոցա ի քսանամենից եւ ի վեր. վասն զի Տէր ասաց բազմացուցանել զԻսրայէլ իբրեւ զաստեղս երկնից։ 24Եւ Յովաբ որդի Շարուհեայ սկսաւ թուել զժողովուրդն, եւ ոչ կատարեաց. եւ եղեւ յաղագս այնորիկ բարկութիւն ի վերայ Իսրայելի. եւ ոչ յարգեցաւ թիւն ի գիրս բանից աւուրց թագաւորին Դաւթի։

25Եւ ի վերայ գանձուց արքային Ազամովթ որդի Ադիելի. եւ ի վերայ գանձուց անդաստանաց ի գեղսն եւ ի տունս եւ յաշտարակս՝ Յովնաթան որդի Ոզեայ. 26եւ ի վերայ երկրագոծացն որք գործէինն՝ Եզրաս որդի Քեղուբայ. 27եւ ի վերայ ագարակացն՝ Սեմէի Արիմաթացի. եւ ի վերայ շտեմարանացն գիւղից գինւոյն՝՝ Զաբդի որդի Սեփիրայ։ 28Եւ ի վերայ ձիթենեացն եւ մոլաթզենեացն որք ի դաշտս՝ Բաղդանա որդի Գեդէոնի՝՝. եւ ի վերայ շտեմարանաց ձիթոյն՝ Յովաս. 29եւ ի վերայ արջառոց արօտականաց որք էին՝՝ ի հովիտսն՝ Սովփատ որդի Ադայեայ. 30եւ ի վերայ ուղտուցն՝ Ուբիաս Իսմայելացի. եւ ի վերայ իշոցն՝ Յադիաս Մարաթովնացի. 31եւ ի վերայ հօտիցն՝ Յովազ Ագարացի. ամենեքեան սոքա վերակացուք ստացուածոցն Դաւթի արքայի։

32Եւ Յովնաթան հօրեղբայր Դաւթի՝ խորհրդակից, այր հանճարեղ. եւ ինքն դպրապետ. եւ Յէքիէլ որդի Աքիմենայ ընդ որդիս արքայի։ 33Եւ Աքիտոփէլ՝ խորհրդակից արքայի, եւ Քուսի առաջին բարեկամ արքայի, 34եւ զկնի նորա Աքիտոփէլ մերձ ի նա, եւ Յովիդայեայ՝՝ որդի Բանեայ եւ Աբիաթար. եւ զօրավար զօրացն արքայի Յովաբ։