1Եւ Որդիք Ռուբենի՝ անդրանկանն Իսրայելի, վասն զի նա էր անդրանիկ. եւ յելանելն նորա յանկողինս հօր իւրոյ՝ ետ զօրհնութիւն նորա որդւոյ իւրում Յովսեփայ՝ որդւոյ Իսրայելի. եւ ոչ համարեցաւ յազգ յանդրանկութեանն իւրում. 2վասն զի Յուդա զօրաւոր էր ուժով յեղբարսն իւրում. եւ էր իշխան նոցա. եւ եղեւ օրհնութիւնն՝՝ Յովսեփայ։ 3Որդիք Ռուբենի անդրանկանն Իսրայելի՝ Ենովք եւ Փաղղուս, Եսրովմ եւ Քարմի։ 4Որդիք Յովելայ, Սեմէի, եւ Բեբենա որդի նորա, եւ որդիք Գովգայ. 5որդիք Սեմէի, որդի նորա Բաաղ՝՝, 6որդի նորա Բեէրա, զոր գերեաց Թագղաթփաղասար արքայ Ասորեստանի. նա էր իշխան Ռուբենի։ 7Եւ եղբարք նորա ի տոհմին իւրեանց, եւ ի վիճակին իւրեանց. յազգին իւրեանց իշխան Յովէլ եւ Զաքարիա։ 8Եւ Բաղէ որդի Ոզուզայ, որդի Սեմայ, որդի Յովելի. նա բնակեաց յԱրոյեր եւ ի Նաբաւ եւ ի Բեղմաոն. 9եւ յարեւելս բնակեաց, մինչեւ ի գալ յանապատն ի գետոյն Եփրատայ. վասն զի անասուն բազում էր նոցա ի Գաղաադ։ 10Եւ յաւուրսն Սաւուղայ արարին պատերազմ ընդ բնակիչսն, եւ անկան ի ձեռս նոցա բնակեալքն ի խորանսն՝՝ մինչեւ յամենայն յարեւելից Գաղաադու։

11Որդիք Գադայ յանդիման նոցա բնակեցին ի Բասան մինչեւ ի Սեղքէ, 12Յովէլ անդրանիկն, եւ Սափա երկրորդն, եւ Անայի որ է դպիր՝՝ ի Բասան. 13եւ եղբարք նոցա բնակեցան ի տունս տոհմիցն իւրեանց. Միքայէլ եւ Մոսողաամ եւ Սովբայէ եւ Յովրէ եւ Յաքան եւ Ազիա եւ Ովբէր, եւթն։ 14Սոքա որդիք Աբիքայեայ, որդւոյ Ուրիայ, որդւոյ Ադայի, որդւոյ Գաղաադու, որդւոյ Միքայելի, որդւոյ Յեսեսայ, որդւոյ Յեգդադեայ, 15որդւոյ Աքիբուզայ, որդւոյ՝՝ Աբդիելի, որդւոյ Գունեայ. 16իշխան տան տոհմից բնակչաց ի Գաղաադ, ի Բասան եւ յաւանս նոցա, եւ յամենայն շուրջ գաւառսն Սարովնայ մինչեւ յելս ամենեցուն 17համարոցն նոցա՝՝, յաւուրս Յովաթամայ արքայի Յուդայ, եւ յաւուրս Յերոբովամայ արքայի Իսրայելի։

18Որդիք Ռուբենի եւ Գադայ եւ կիսոյ ցեղին Մանասէի՝ յորդւոցն զօրութեան, արք որ առնուին վահանս եւ սուսերս, եւ լարէին աղեղունս, եւ ուսեալ էին պատերազմ, քառասուն եւ չորք հազարք եւ եւթն հարեւր եւ վաթսուն, որք ելանէին ի մարտ, 19եւ առնէին պատերազմ ընդ Հագարացիսն եւ ընդ Տուրեցիսն եւ ընդ Նափեսացիսն եւ ընդ Նադոբացիսն եւ ընդ Նաբիմացիսն՝՝. 20եւ զօրացան ի վերայ նոցա, եւ տուան ի ձեռս նոցա Հագարացիքն եւ ամենայն խորանք նոցա՝՝. վասն զի առ Աստուած գոչեցին ի պատերազմին՝ եւ լուաւ նոցա, զի յուսացան ի նա։ 21Եւ գերեցին զպատրաստութիւն նոցա, ուղտս հինգ հազար, եւ յոչխարաց երկերիւր եւ յիսուն հազար, էշս երկուս հազարս, եւ ոգիս արանց հարեւր հազար. 22վասն զի վիրաւորք բազումք անկան, զի ի Տեառնէ եղեւ պատերազմն. եւ բնակեցին փոխանակ նոցա մինչեւ ի գերութիւնն իւրեանց։ 23Եւ կէս ցեղին Մանասէի բնակեաց յերկրին Բասանայ մինչեւ ի Բաաղերմոն եւ Սանիր, եւ ի լեռանն Ահերմոնի եւ ի Լիբանան՝՝. ինքեանք բազմացան։ 24Եւ այսոքիկ իշխանք տանց տոհմից նոցա. Ովփեր եւ Յեսսի եւ Եղիէլ եւ Եզրիէլ եւ Յերեմիա եւ Յովդիա եւ Իգիէլ, արք զօրաւորք ուժով, արք անուանիք իշխանք տանց տոհմիցն իւրեանց։

25Եւ ուխտազանց եղեն յԱստուծոյ հարցն իւրեանց, եւ պոռնկեցան զհետ աստուածոց օտարաց երկրին զորս եբարձ Աստուած յերեսաց նոցա։ 26Եւ յարոյց Աստուած Իսրայելի՝ զհոգին Փանովքայ արքային Ասորեստանեայց, եւ զհոգին Թագղաթփաղասարայ արքային Սուբայ, եւ գերեաց զՌուբէն եւ զԳադ՝՝ եւ զկէս ցեղին Մանասէի, եւ տարաւ զնոսա ի Քաղա եւ ի Քաբովր առ գետեզերբն Գովզանայ, մինչեւ յօրս յայս։