1Եւ ամենայն Իսրայէլ ըստ թուոյն իւրեանց գրեալք սոքա ի գիրս թագաւորացն Իսրայելի եւ Յուդայ, հանդերձ բնակելովքն՝՝ ի Բաբելոն՝ վասն մեղացն իւրեանց։

2Եւ որ բնակեալ էին յառաջին կալուածսն իւրեանց ի քաղաքսն Իսրայելի, քահանայք եւ Ղեւտացիք, որք տուեալ էին՝՝. 3յԵրուսաղէմ բնակեցան յորդւոցն Յուդայ եւ յորդւոցն Բենիամինի եւ յորդւոցն Եփրեմի եւ Մանասէի։ 4Եւ Գովթի՝ որդի Ամիութայ, որդւոյ Ամարեայ, որդւոյ Փարեսի, որդւոյ Յուդայ։ 5Եւ ի Սեղոմայ՝ անդրանիկ նորա Ասեա, եւ որդիքն նորա։ 6Եւ յորդւոցն Զարայի, Յէիէլ եւ եղբարք նորա, վեց հարեւր եւ իննսուն. 7եւ յորդւոցն Բենիամինի՝ Սաղովմ որդի Մոսոմայ, որդւոյ Ոդովեայ, որդւոյ Ասանուայ. 8եւ Յեբնա որդի Յերեմայ, եւ Եղա որդի Ոզիայ, որդւոյ Միքրայ. եւ Մոսողոմ որդի Սափատայ, որդւոյ Ռագուելի, որդւոյ Յեբանայ. 9եւ եղբարք նոցա ըստ ազգին իւրեանց, ինն հարեւր յիսուն եւ վեց. ամենեքեան արք պետք տոհմին իւրեանց, ըստ տանց ազգին իւրեանց։

10Եւ ի քահանայիցն՝ Յովդայէ եւ Յովարիբ եւ Աքին 11եւ Ազարիաս՝ որդի Քեղկեայ, որդւոյ Մոսողոմայ, որդւոյ Սադովկայ, որդւոյ Մարիովթայ, որդւոյ Աքիտովբայ. առաջնորդ տանն Աստուծոյ. 12եւ Ոբդիաս՝ որդի Յերեմեայ, որդւոյ Փասուրայ, որդւոյ Մեղկեայ. եւ Մասէ՝ որդի Ադիելի, որդւոյ Եզրայ, որդւոյ Մոսողոմայ, եւ Ղաամովթ՝ որդի Ասերայ՝՝. 13եւ եղբարքն նոցա, իշխանք տանց տոհմից հազար եւ եւթն հարեւր եւ իննսուն. արք զօրաւորք ուժով ի գործ պաշտաման տանն Աստուծոյ։

14Եւ ի Ղեւտացւոցն՝ Սամաա որդի Ասովբայ, որդւոյ Եզրիկամայ, որդւոյ Ասաբեայ, որդւոյ որդւոցն՝՝ Մերարեայ. 15եւ Բագբագ եւ Արէս եւ Գովղէղ եւ Մաթանիաս որդի Միքայի, որդւոյ Զեքրեայ, որդւոյ Ասափայ։ 16Եւ Ոբդիաս որդի Սամեայ, որդւոյ Գովղեղայ, որդւոյ Իդիթունայ. եւ Բարաքիաս որդի Ասայի, որդւոյ Եղկանայ, որ բնակէր ի գեղսն Նետոփաթայ։ 17Եւ դռնապանք՝ Սաղղում եւ Ակուբ եւ Տէղման, Եման, եւ եղբարք նոցա. Սաղղում իշխան։ 18Մինչեւ ցայս վայր, ի դրան թագաւորին յարեւելս. այսոքիկ են դրունք բանակաց որդւոցն Ղեւեայ։ 19Եւ Սաղղում որդի Կովրեայ, որդւոյ Աբիսափայ, որդւոյ Կորխայ. եւ եղբարք նորա ի տանէ հօրն իւրեանց, Կորխացիքն ի վերայ գործոց սպասուն, որք պահէին զպահպանութիւնս խորանին՝ ինքեանք եւ հարք իւրեանց ի բանակին Տեառն, եւ պահէին զմուտն։ 20Եւ Փենեէս որդի Եղիազարու իշխան էր ի վերայ նոցա առաջի Տեառն, եւ նոքա՝՝ ընդ նմա։ 21Զաքարիաս որդի Մասեղամայ՝ դռնապան դրան խորանին վկայութեան։ 22Ամենեքեան ընտիրք ի դրունս՝՝, երկերիւր եւ երկոտասան. սոքա էին ի սրահսն նոցա, եւ թիւն իւրեանց՝՝. եւ զսոսա կացոյց Դաւիթ եւ Սամուէլ տեսանողն հաւատարմութեամբն նոցա՝՝։ 23Սոքա եւ որդիքն իւրեանց էին ի վերայ դրանց տանն Տեառն, ի տան խորանին որք պահէին՝՝ 24ի չորեսին կողմանս դրանն՝ յարեւելս եւ ի ծովակողմն, ի հիւսիսի եւ ի հարաւ։ 25Եւ եղբարք նոցա ի սրահսն իւրեանց, ի մտանելն յեւթն աւուրսն, ի ժամանակաց ի ժամանակս՝ հանդերձ նոքօք՝՝։ 26Վասն զի հաւատարմութեամբ էին չորք զօրաւորք դրանցն, որ էին Ղեւտացիք ի վերայ տանց շտեմարանացն եւ գանձուց տանն Աստուծոյ։ 27Եւ բանակէին, վասն զի նոցա էր պահպանութիւնն. եւ նոքա էին ի վերայ բանալեացն, ընդ առաւօտս առաւօտս բանային զդրունս տաճարին՝՝։ 28Եւ ի նոցանէ ի վերայ սպասուց պաշտամանն. վասն զի թուով բերէին զսպասսն եւ թուով տանէին։ 29Եւ ի նոցանէ կային ի վերայ կահի սրբութեանցն եւ նաշհոյն եւ գինւոյ եւ իւղոյ եւ կնդրկին եւ այլոց խնկոցն։ 30Եւ յորդւոց քահանայիցն էին իւղեփեացք իւղոյն եւ խնկոցն։ 31Մատաթիաս ի Ղեւտացւոցն, նա էր անդրանիկն Սաղղումայ Կորխացւոյ, հաւատարմութեամբ ի վերայ գործոյ զոհիցն եւ տապակի մեծի քահանային։ 32Եւ Բանէաս Կահաթացի յեղբարցն իւրոց՝՝ ի վերայ հացին առաջադրութեան՝ պատրաստել շաբաթէ ի շաբաթ։ 33Եւ սոքա սաղմոսանուագք, իշխանք տոհմիցն Ղեւտացւոց, կարգեալք ի սպաս աւուրցն. վասն զի ի տուէ եւ ի գիշերի էին ի գործն։ 34Սոքա իշխանք տոհմիցն Ղեւտացւոց, ըստ ազգին իւրեանց իշխանք. եւ սոքա բնակեցան յԵրուսաղէմ։

35Եւ ի Գաբաւոն բնակեաց հայրն Գաբաւոնի Յեէլ, եւ անուն կնոջ նորա Մաաքա, 36եւ որդի նորա անդրանիկ Աբդոն եւ Յասիր եւ Կիս եւ Բաաղ եւ Ներ, եւ Նադաբ 37եւ Գեդոր եղբարք Զաքուրայ՝ Այիոն եւ Զեքրի՝՝ եւ Մակեղովթ։ 38Եւ Մակեղովթ ծնաւ զՍամաա. եւ սոքա ի մէջ եղբարց իւրեանց բնակեցին յԵրուսաղէմ ընդ եղբարսն իւրեանց։

39Եւ Նէր ծնաւ զԿիս, եւ Կիս ծնաւ զՍաւուղ, եւ Սաւուղ ծնաւ զՅովնաթան եւ զՄեղքիսաւէ եւ զԱբինադաբ եւ զԲաաղ։ 40Եւ որդի Յովնաթանու Մեմփիբաաղ, ծնաւ զՄիքա։ 41Եւ որդիք Միքայի Փիթոն եւ Մաղովք եւ Թարա. 42եւ Բաաղ ծնաւ զՅովադա, եւ Յովադա՝՝ ծնաւ զԳաղէմեթ եւ զԱզամովթ, եւ Զամբրի ծնաւ զՄոսա. 43եւ Մոսա ծնաւ զԲանար, զԱփա՝՝ որդի նորա, զԵղէասա որդի նորա, զԵսէլ որդի նորա։ 44Եւ Եսելի որդիք վեց, եւ այսոքիկ անուանք նոցա. Եզրիկամ անդրանիկ նորա՝՝. եւ Իսմայէլ եւ Սաարիա եւ Աբդիա եւ Ամարիա եւ՝՝ Անան. սոքա որդիք Ասիելի։