1Եւ եղեւ բան Տեառն ի ձեռն Յէուայ որդւոյ Անանիայի առ Բաասա եւ ասէ. 2Փոխանակ զի բարձրացուցի զքեզ յերկրէ, եւ ետու զքեզ առաջնորդ ի վերայ ժողովրդեան իմոյ Իսրայելի, եւ գնացեր զճանապարհն Յերոբովամու, եւ յանցուցեր զժողովուրդ իմ զԻսրայէլ, բարկացուցանել զիս սնոտւովք իւրեանց, 3ահա ես յարուցից զհետ Բաասայ եւ զհետ տան նորա՝՝. եւ տաց զտուն քո իբրեւ զտունն Յերոբովամայ որդւոյ Նաբատայ։ 4Որ մեռանիցի Բաասայ ի քաղաքի՝ շունք կերիցեն, եւ որ մեռանիցի նորա ի դաշտի կերիցեն զնա թռչունք երկնից։

5Եւ մնացորդք բանից Բաասայ, եւ ամենայն ինչ զոր արար եւ զօրութիւնք նորա, ո՞չ աւանիկ գրեալ են ի գիրս բանից աւուրց թագաւորացն Իսրայելի։ 6Եւ ննջեաց Բաասա ընդ հարս իւր, եւ թաղեցաւ ի Թերսա. եւ թագաւորէ Եղա որդի նորա ընդ նորա, յամի քսաներորդի Ասայի արքայի։՝՝ 7Եւ ի ձեռն Յէուայ որդւոյ Անանիայ մարգարէի խօսեցաւ Տէր ի վերայ Բաասայ եւ ի վերայ տան նորա զամենայն չարիսն զոր արար առաջի Տեառն ի բարկացուցանել զնա գործովք ձեռաց իւրոց. առ ի լինելոյ իբրեւ զտունն Յերոբովամայ, եւ վասն հարկանելոյ զնա։

8Յամին քսաներորդի եւ վեցերորդի արքայի Յուդայ, թագաւորեաց Եղա որդի Բաասայ ի վերայ Իսրայելի ի Թերսա ամս երկուս։ 9Եւ ժողովեաց ի վերայ նորա՝՝ Զամբրի ծառայ իւր՝ իշխան կիսոյ սպառազինաց. եւ նա ըմպէր եւ արբեալ էր ի տանն Արսայ հանդերձապետի ի Թերսա. 10եւ եմուտ Զամբրի, եւ եհար զնա եւ սպան զնա, յամի քսաներորդի եւթներորդի Ասայի արքայի Յուդայ, եւ թագաւորեաց ընդ նորա։ 11Եւ եղեւ ի թագաւորել նորա եւ նստել յաթոռն իւրում, եհար զամենայն տունն Բաասայ, եւ ոչ եթող նմա որ միզիցէ զորմով, եւ զմերձաւորս նորա եւ զբարեկամս նորա։ 12Եւ ջնջեաց Զամբրի զամենայն տունն Բաասայ՝ ըստ բանին Տեառն զոր խօսեցաւ ի վերայ տանն Բաասայ ի ձեռն Յէուայ մարգարէի. 13վասն ամենայն մեղացն Բաասայ՝ եւ Եղայ որդւոյ նորա որ մեղաւ, եւ որպէս յանցոյց՝՝ զԻսրայէլ, բարկացուցանել զՏէր Աստուած Իսրայելի սնոտւովք իւրեանց։

14Եւ մնացորդ բանիցն Եղայ, եւ ամենայն ինչ զոր արար, ո՞չ աւանիկ գրեալ են ի գիրս բանից աւուրց թագաւորացն Իսրայելի։

15Յամի քսաներորդի եւթներորդի Ասայի արքայի Յուդայ, թագաւորեաց Զամբրի աւուրս եւթն ի Թերսա. եւ բանակն Իսրայելի ի Գաբաթոնի այլազգեաց. 16եւ լուաւ ժողովուրդն ի բանակի անդ՝ ասեն. Գումարեցաւ Զամբրի եւ եհար զարքայն. եւ թագաւորեցուցին Իսրայելի՝՝ զԱմրի զօրավար զօրուն ի վերայ Իսրայելի յաւուր յայնմիկ ի բանակին։ 17Եւ ել Ամրի եւ ամենայն Իսրայէլ ընդ նմա ի Գաբաթոնէ, եւ նստաւ զԹերսաւ։ 18Եւ եղեւ իբրեւ ետես Զամբրի թէ յառնուլ եղեւ քաղաքն, եմուտ ի սենեակ մի տանն արքայի, եւ այրեաց ի վերայ նորա զտունն արքայի հրով. 19եւ մեռաւ վասն մեղաց իւրոց զոր արար՝ առնել չար առաջի Տեառն. եւ գնաց զճանապարհս Յերոբովամու որդւոյ Նաբատայ՝՝, եւ ի մեղս նորա զոր արար որովք յանցոյց զԻսրայէլ։

20Եւ մնացորդք բանից Զամբրեայ, եւ խումբք նորա զոր խմբեցաւ, ո՞չ աւանիկ գրեալ են ի գիրս բանից աւուրց թագաւորացն Իսրայելի։

21Յայնժամ բաժանեցաւ ժողովուրդն Իսրայելի. կէս ժողովրդեանն լինէր զկնի Թամնեայ որդւոյ Գովնաթայ թագաւորեցուցանել զնա, եւ կէս ժողովրդեանն լինէր զկնի Ամրեայ։ 22Եւ յաղթահարեաց ժողովուրդն որ զկնի Ամրեայ, եւ պարտեցաւ ժողովուրդն որ զհետ Թամնեայ որդւոյ Գովնաթայ. եւ մեռաւ Թամնի, եւ Յովրամ եղբայր նորա ի ժամանակի յայնմիկ. եւ թագաւորեաց Ամրի յետ Թամնեայ՝՝։ 23Յամին երեսներորդի եւ առաջնորդի Ասայի արքայի Յուդայ, թագաւորէ Ամրի ի վերայ Իսրայելի ամս երկոտասան. ի Թերսա թագաւորեաց ամս վեց։ 24Եւ ստացաւ Ամրի զլեառնն Սեմերոն ի Սամերայ տեռնէ լերինն՝՝ երկուց տաղանդաց արծաթոյ. եւ շինեաց զլեառնն, եւ կոչեաց զանուն լերինն զոր շինեաց՝ յանուն Սամերեայ տեառն լերինն՝ Սեմերոն։

25Եւ արար Ամրի չար առաջի Տեառն, եւ չարացաւ քան զամենայն եղեալս յառաջ քան զնա. 26եւ գնաց զամենայն ճանապարհս Յերոբովամայ որդւոյ Նաբատայ, եւ ի մեղս նորա որովք յանցոյց զԻսրայէլ՝ ի բարկացուցանել զՏէր Աստուած Իսրայելի սնոտւովք իւրեանց։

27Եւ մնացորդք բանից Ամրեայ եւ ամենայն ինչ զոր արար, եւ զօրութիւն նորա զոր արար, ո՞չ աւանիկ գրեալ են ի գիրս բանից աւուրց թագաւորացն Իսրայելի։ 28Եւ ննջեաց Ամրի ընդ հարս իւր, եւ թաղեցաւ ի Սամարիա. եւ թագաւորեաց Աքաաբ որդի նորա ընդ նորա։

29Եւ Աքաաբ որդի Ամրեայ թագաւորեաց ի վերայ Իսրայելի. յամին երեսներորդի եւ ութերորդի Ասայի արքայի Յուդայ թագաւորեաց Աքաաբ որդի Ամրեայ ի վերայ Իսրայելի ի Սամարիա ամս քսան եւ երկուս։ 30Եւ արար Աքաաբ որդի Ամրեայ չար առաջի Տեառն քան զամենեսեան որ յառաջ քան զնա էին։ 31Եւ ոչ ինչ էր նմա ընդհատ գնալ ըստ մեղաց Յերոբովամայ որդւոյ Նաբատայ. եւ ա՛ռ կին զՅեզաբէլ դուստր Յովբաղայ արքայի Սիդոնացւոց, եւ գնաց եւ ծառայեաց Բահաղու եւ երկիր եպագ նմա։ 32Եւ կանգնեաց սեղան Բահաղու ի տան գարշելեաց նորա զոր շինեաց ի Սամարիա։ 33Եւ արար Աքաաբ անտառ. եւ յաւել Աքաաբ առնել առ ի բարկացուցանել զՏէր Աստուած Իսրայելի քան զամենայն թագաւորս Իսրայելի եղեալս յառաջ քան զնա։ 34Յաւուրս նորա շինեաց Աքիէլ Բեթելացի զԵրիքով, Աբիրոնաւ անդրանկաւ իւրով արկ նմա հիմունս, եւ Սեգուբաւ կրտսերաւ իւրով կանգնեաց զդրունս նորա, ըստ բանին Տեառն զոր խօսեցաւ ի ձեռն Յեսուայ որդւոյ Նաւեայ։