1Եւ որդի Ադերայ՝՝ արքայ Ասորւոց ժողովեաց զամենայն զօրս իւր, եւ ել եւ նստաւ զՍամարեաւ, եւ՝՝ երեսուն եւ երկու թագաւորք ընդ նմա, եւ ամենայն երիվարք եւ կառք. ելին եւ նստան զՍամարեաւ, եւ տային՝՝ պատերազմ ընդ նմա։ 2Եւ առաքեաց հրեշտակս առ Աքաաբ արքայ Իսրայելի ի քաղաքն, 3եւ ասէ ցնա. Այսպէս ասէ որդի Ադերայ՝՝. Արծաթ քո եւ ոսկի քո իմ է, եւ կանայք քո եւ որդիք քո գեղեցիկք իմ են։ 4Պատասխանի ետ արքայն Իսրայելի եւ ասէ. Որպէս խօսեցար, տէր իմ արքայ, քո եմ ես եւ ամենայն ինչ իմ։

5Եւ դարձան հրեշտակքն եւ ասեն. Այսպէս ասէ որդի Ադերայ՝՝. Ես յղեցի զի զարծաթ քո եւ զոսկի քո եւ զկանայս քո եւ զորդիս քո ցիս տացես. 6զի վաղիւ ի սոյն ժամու առաքեցից զծառայս իմ, եւ յուզեսցեն զտուն քո եւ զտուն ծառայից քոց, եւ եղիցին ցանկալիք աչաց նոցա, յոր արկանիցեն զձեռս իւրեանց՝ առցեն։ 7Եւ կոչեաց արքայն Իսրայելի զամենայն ծերակոյտ երկրին եւ ասէ. Գիտասջիք եւ տեսջիք զի չարիս իմն խնդրէ նա, զի առաքեաց առ իս զուստերաց իմոց եւ զդստերաց իմոց,՝՝ զարծաթ իմ եւ զոսկի իմ ոչ արգելի ի նմանէ։ 8Եւ ասեն ցնա ծերքն եւ ամենայն ժողովուրդն. Մի՛ լսեր եւ մի՛ յանձն առնուր։ 9Եւ ասէ ցհրեշտակս որդւոյն Ադերայ՝՝. Ասացէք ցտէրն ձեր ցարքայ. Զամենայն ինչ զոր առաքեցեր առ ծառայ քո յառաջնում նուագին՝ արարից, բայց զայդ բան ոչ կարեմ առնել։ Եւ գնացին արքն եւ դարձուցին նմա պատասխանի։

10Եւ առաքեաց առ նա որդին Ադերայ՝՝ եւ ասէ. Օն եւ օն արասցեն ինձ դիքն եւ օն եւ օն յաւելցեն, եթէ բաւեսցէ հող Սամարեայ՝ աղիւսովք հանդերձ՝՝ ամենայն զօրականի հետեւակաց իմոց։ 11Եւ պատասխանի ետ արքայն Իսրայելի եւ ասէ. Շատ է արդ, մի՛ պարծեսցի կորն իբրեւ զուղիղն՝՝։ 12Եւ եղեւ իբրեւ պատասխանի ետ նմա՝՝ զբանս զայս, եւ ինքն ի գինւոջ էր եւ ամենայն թագաւորք որ ընդ նմա ի խորանս. եւ ասէ ցծառայսն իւր. Շինեցէք պատնէշ։ Եւ եդին պատնէշ՝՝ շուրջ զքաղաքաւն։

13Եւ ահա մարգարէ ոմն մատեաւ առ Աքաաբ արքայ Իսրայելի եւ ասէ. Այսպէս ասէ Տէր. Եթէ տեսանիցե՞ս զայն ամբոխ մեծ. ահա ես մատնեցից զնոսա այսօր ի ձեռս քո, եւ գիտասցես թէ ես եմ Տէր։ 14Եւ ասէ Աքաաբ. Ի՞ւ։ Եւ ասէ. Այսպէս ասէ Տէր. Մանկտւով իշխանաց գաւառաց։ Եւ ասէ Աքաաբ. Ո՞ նախ գրգռեսցէ զպատերազմն։ Եւ ասէ. Դու։ 15Եւ հանդէս արար ծառայից իշխանաց գաւառաց, եւ եղեն երկերիւր եւ երեսուն. եւ ապա հանդէս արար ամենայն ժողովրդեանն, ամենայն որդւոց զօրութեան՝ եւթն հազար արանց, եւ ելանէր զմիջօրէիւ։ 16Եւ որդին Ադերայ՝՝ ընդ գինի մտեալ էր եւ արբեալ ի Սոկքով, ինքն եւ երեսուն եւ երկու թագաւորքն օգնականք նորա։ 17Եւ ելին նախ մանկունք իշխանաց գաւառացն, եւ առաքեցին առ որդին Ադերայ՝՝, եւ պատմեցին նմա եւ ասեն. Արք ելին ի Սամարեայ։ 18Եւ ասէ ցնոսա. Եթէ ի խաղաղութիւն ելանիցեն, կալջիք զնոսա կենդանիս, եւ եթէ ի պատերազմ ելանիցեն, կալջիք զնոսա կենդանիս։ 19Եւ ելին ի քաղաքէն մանկտի իշխանաց գաւառացն, եւ զօրն զկնի նոցա. 20եւ եհար իւրաքանչիւր ոք որում դիպեցաւ. եւ փախեան Ասորիքն, եւ հալածեաց զնոսա Իսրայէլ. եւ ապրեցաւ որդին Ադերայ՝՝ արքայ Ասորւոց հեծեալ ձիով՝ հանդերձ երիւք ոմամբք՝՝ հեծելովք։ 21Եւ ել արքայն Իսրայելի եւ առ զերիվարս եւ զկառս, եւ եհար յԱսորւոց հարուածս մեծամեծս։

22Եւ մատեաւ մարգարէն առ արքայ Իսրայելի, եւ ասէ ցնա. Զօրացիր եւ գիտա, եւ տես զինչ գործեսցես. զի ի դարձի տարւոյս այսորիկ որդի Ադերայ՝՝ արքայ Ասորւոց ելանելոց է ի վերայ քո։

23Եւ ծառայք արքային Ասորւոց ասեն ցնա. Աստուած լերանց է Աստուածն Իսրայելի, եւ ոչ Աստուած դաշտաց.՝՝ վասն այնորիկ յաղթահարեցին զմեզ. եթէ տայցեմք ընդ նոսա պատերազմ ի դիւրի, յաղթեմք նոցա։ 24Եւ զայս բան արասցես. ի բաց արա զթագաւորսն յիւրաքանչիւր տեղւոջէ, եւ դիր ընդ նոցա նախարարս. 25եւ փոխանակեսցուք քեզ զօրս ընդ զօրացն որ անկան ի քէն, եւ երիվարս ընդ երիվարացն, եւ կառս ընդ կառացն. եւ տացուք ընդ նոսա պատերազմ ի դիւրոջ եւ յաղթեսցուք նոցա։ Եւ անսաց բարբառոյ նոցա, եւ արար այնպէս։ 26Եւ եղեւ ի դառնալ տարւոյն հանդէս արար որդին Ադերայ՝՝ Ասորւոց. եւ ել յԱփեկա ի պատերազմ ընդ Իսրայելի։ 27Եւ որդիքն Իսրայելի արարին հանդէս, եւ երկգնդեցան եւ հասին յառաջս նոցա. եւ ճակատեցան որդիքն Իսրայելի ընդդէմ Ասորւոցն իբրեւ երկու երամակք այծից. եւ Ասորիքն լցին զերկիրն։

28Եւ մատեաւ այրն Աստուծոյ եւ ասէ ցարքայն Իսրայելի. Այսպէս ասէ Տէր. Փոխանակ զի ասացին Ասորիքն թէ Աստուած լերանց է Տէր Աստուած Իսրայելի՝՝ եւ ոչ Աստուած դաշտաց, նա տացէ զզօրն՝՝ զայն զմեծ ի ձեռս քո, եւ գիտասցես թէ ես եմ Տէր։ 29Եւ բանակեցան նոքա ընդդէմ սոցա զեւթն օր. եւ եղեւ յաւուրն եւթներորդի ընդխառնեցաւ պատերազմն. եւ եհար Իսրայէլ յԱսորւոցն հարեւր հազար հետեւակաց ի միում աւուր. 30եւ մնացեալքն փախեան յԱփեկա ի քաղաքն իւրեանց, եւ անկաւ պարիսպն ի վերայ քսան եւ եւթն հազար արանց մնացելոց. եւ որդին Ադերայ՝՝ փախեաւ եւ եմուտ ի տուն իւր՝՝ սենեակ ի սենեկէ։

31Եւ ասեն ցնա ծառայք իւր. Ահաւասիկ գիտեմք զի թագաւորք տանն Իսրայելի թագաւորք ողորմութեան են. արկցուք քուրձս զմիջովք մերովք եւ չուանս ի գլուխս մեր, եւ ելցուք առ արքայն Իսրայելի. թերեւս ապրեցուսցէ զանձինս մեր՝՝։ 32Եւ զգեցան քուրձս ի մէջս իւրեանց, եւ եդին չուանս ի գլուխս իւրեանց. եւ ասեն ցարքայն Իսրայելի՝՝. Ծառայ քո որդի Ադերայ՝՝ ասէ. Կեցցէ անձն իմ։ Եւ ասէ. Եթէ տակաւին կենդանի՞ իցէ, եղբայր իմ է։ 33Եւ արքն հմայեցին եւ նուիրեցին եւ քաղեցին զբանսն ի բերանոյ նորա. եւ ասեն. Եղբայր քո որդի Ադերայ՝՝ աստ է։ Եւ ասէ. Մտէք եւ ածէք զնա։ Եւ ել առ նա որդին Ադերայ՝՝, եւ հանին զնա առ նա ի կառսն։ 34Եւ ասէ ցնա. Զքաղաքսն զոր ա՛ռ հայր իմ ի հօրէ քումմէ՝ դարձուցից առ քեզ, եւ հանցես քեզ հարկս՝՝ ի Դամասկոս, որպէս եդ հայր իմ ի Սամարիա։ Եւ ասէ. Եւ ես արձակեցից զքեզ ուխտիւ։ Եւ եդ ընդ նմա ուխտ, եւ արձակեաց զնա։

35Եւ այր մի յորդւոց մարգարէիցն ասէ ցընկեր իւր բանիւ Տեառն. Հար զիս։ Եւ ոչ կամեցաւ այրն հարկանել զնա։ 36Եւ ասէ ցնա. Փոխանակ զի ոչ լուար ձայնի Տեառն, ահա իբրեւ գնասցես յինէն՝ սպանցէ զքեզ առեւծ։ Եւ իբրեւ գնաց ի նմանէ, եգիտ զնա առեւծ եւ սպան զնա։ 37Եւ եգիտ այլ այր եւ ասէ. Հար զիս։ Եւ եհար զնա այրն, եհար եւ ջաղջախեաց։ 38Եւ չոգաւ մարգարէն եւ եկաց առաջի արքայի ի վերայ ճանապարհին, եւ կապեաց պատանաւ զաչս իւր։ 39Եւ եղեւ իբրեւ անցանէր ընդ այն արքայ, եւ նա աղաղակեաց առ արքայ եւ ասէ. Ծառայ քո ել ընդ զօրու ի պատերազմի, եւ ահա այր մի ած առ իս այր եւ ասէ. Պահեա զայրդ զայդ, ապա թէ զերծանելով զերծցի, եղիցի անձն քո ընդ անձին դորա, կամ տաղանդ մի արծաթոյ կշռեսցես։ 40Եւ եղեւ մինչ ծառայ քո այսր եւ անդր հայէր, եւ նա չէր ուրեք. եւ ասէ արքայն Իսրայելի ցնա. Ահա եւ այդ յինէն կողմանէ դաւ է, սպանե՞ր ուրեմն՝՝։ 41Եւ փութացաւ ի բաց առ զպատանն յաչաց իւրոց. եւ ծանեաւ զնա արքայն Իսրայելի թէ ի մարգարէից անտի է նա։ 42Եւ ասէ ցնա. Այսպէս ասէ Տէր. Փոխանակ զի հաներ դու զայրն վնասակար ի ձեռաց իմոց, եղիցի անձն քո փոխանակ անձին նորա, եւ ժողովուրդ քո փոխանակ ժողովրդեան նորա։ 43Եւ գնաց արքայն Իսրայելի ի տուն իւր տխրեալ եւ լքեալ, եւ եկն ի Սամարիա։