1Եւ նստան զերեամ, եւ ոչ էր պատերազմ ի մէջ Ասորւոց եւ ի մէջ Իսրայելի։ 2Եւ եղեւ յամին երրորդի էջ Յովսափատ արքայ Յուդայ առ արքայ Իսրայելի։ 3Եւ ասէ արքայն Իսրայելի ցծառայս իւր. Ո՞չ գիտէք եթէ մեր է Ռամովթ Գաղաադ, եւ մեք լռեալ կամք առնուլ զնա ի ձեռաց արքային Ասորւոց։ 4Եւ ասէ արքայ Իսրայելի՝՝ ցՅովսափատ. Ելցե՞ս ընդ մեզ յՌամովթ Գաղաադ ի պատերազմ։ Եւ ասէ Յովսափատ ցարքայն Իսրայելի. Որպէս ես՝ նոյնպէս եւ դու, եւ որպէս զօրք իմ՝ զօրք քո, եւ որպէս երիվարք իմ՝ երիվարք քո։

5Եւ ասէ Յովսափատ արքայ Յուդայ՝՝ ցարքայն Իսրայելի. Աղէ, հարցէք այսօր զՏէր։ 6Եւ ժողովեաց արքայն Իսրայելի զամենայն մարգարէս՝՝ իբրեւ արս չորեքհարեւր. եւ ասէ ցնոսա արքայ. Երթա՞յց յՌամովթ Գաղաադ ի պատերազմ, թէ զտեղի կալայց։ Եւ ասեն. Ել, եւ տալով տացէ Տէր ի ձեռս արքայի։ 7Եւ ասէ Յովսափատ ցարքայն Իսրայելի. Իցէ՞ ոք արդեւք աստ մարգարէ Տեառն՝ թէ չիցէ՝՝, եւ հարցցուք զՏէր նովաւ։ 8Եւ ասէ արքայն Իսրայելի ցՅովսափատ. Է աստ այր մի հարցանել նովաւ զՏէր, եւ ես ատեցի զնա, զի ոչ խօսի զինէն բարի, այլ չար. Միքիա որդի Յեմլեայ։ Եւ ասէ Յովսափատ արքայ Յուդայ՝՝. Մի՛ ասասցէ այդպէս արքայ։

9Եւ կոչեաց արքայն Իսրայելի ներքինի մի եւ ասէ. Վաղվաղակի ած այսր զՄիքիա որդի Յեմլեայ։ 10Եւ արքայն Իսրայելի եւ Յովսափատ արքայ Յուդայ նստէին այր իւրաքանչիւր յաթոռ իւրում վառեալ ի դրունս Սամարեայ, եւ ամենայն մարգարէքն մարգարէանային առաջի նոցա։ 11Եւ արար իւր Սեդեկիա որդի Քանանու եղջեւրս երկաթիս եւ ասէ. Այսպէս ասէ Տէր. Սոքօք խեթկեսցես զԱսորիս մինչեւ սպառեսցին։ 12Եւ ամենայն մարգարէքն մարգարէանային նոյնպէս, եւ ասէին. Ել յՌամովթ Գաղաադ, եւ յաջողեսցիս, եւ տացէ Տէր ի ձեռս քո զարքայն Ասորւոց՝՝։

13Եւ հրեշտակն որ չոգաւ կոչել զՄիքիա, պատմեաց նմա եւ ասէ. Ահաւանիկ ամենայն մարգարէքն խօսին իբրեւ ընդ մի բերան բարի զարքայէ. արդ եղիցի բան քո իբրեւ զմիոյ ի նոցանէն, եւ խօսեաց բարի։ 14Եւ ասէ Միքիա. Կենդանի է Տէր, եթէ ոչ զոր ինչ ասասցէ ցիս Տէր, զայն խօսեցայց։

15Եւ եկն առ արքայ, եւ ասէ ցնա արքայ. Միքիա, ելի՞ց յՌամովթ Գաղաադ ի պատերազմ, եթէ զտեղի կալայց։ Եւ ասէ. Ել եւ յաջողեսցիս, եւ տացէ Տէր ի ձեռս արքայի։ 16Եւ ասէ ցնա արքայ. Դարձեալ կրկին երդմնեցուցեալ՝՝ զքեզ, զի խօսեսցիս ընդ իս ճշմարտութեամբ յանուն Տեառն։ 17Եւ ասէ. Ոչ այդպէս է.՝՝ Տեսի զամենայն Իսրայէլ ցրուեալ ընդ լերինս իբրեւ զհօտ որոյ ոչ գուցէ հովիւ. եւ ասէ Տէր. Ոչ գոն դոցա տեարք, դարձցին իւրաքանչիւր ոք ի տուն իւր խաղաղութեամբ։ 18Եւ ասէ արքայն Իսրայելի ցՅովսափատ արքայ Յուդայ՝՝. Ո՞չ ասացի քեզ թէ՝ Ոչ մարգարէանայ նա ինձ բարի, բայց եթէ չար։ 19Եւ ասէ Միքիա. Ոչ այդպէս. ոչ ես ինչ, այլ՝՝ լուր զպատգամ Տեառն. ո՞չ ապաքէն տեսի զՏէր Աստուած Իսրայելի՝՝ նստեալ ի վերայ աթոռոյ իւրոյ, եւ ամենայն զօրք երկնից կային շուրջ զնովաւ յաջմէ եւ յահեկէ. 20եւ ասէ Տէր. Ո՞ պատրեսցէ զԱքաաբ արքայ Իսրայելի՝՝, եւ ելցէ անկցի յՌամովթ Գաղաադ. եւ ասէ ոմն այսպէս, եւ ոմն այնպէս։ 21Եւ ել ոգի եւ եկաց առաջի Տեառն եւ ասէ. Ես պատրեցից զնա։ 22Եւ ասէ ցնա Տէր. Ի՞ւ։ Եւ ասէ. Ելից եւ եղէց ոգի սուտ ի բերան ամենայն մարգարէից նորա։ Եւ ասէ. Պատրեսցես եւ կարասցես. ել եւ արա այդպէս։ 23Եւ արդ ահա ետ Տէր ոգի սուտ ի բերան ամենայն մարգարէիցդ քոց այդոցիկ, եւ Տէր խօսեցաւ ի վերայ քո չարիս։

24Եւ մատեաւ Սեդեկիա որդի Քանանու, եւ եհար Միքիայի զծնօտս նորա, եւ ասէ. Ո՞ր Հոգի Տեառն է այն, որ անց յինէն եւ խօսեցաւ ի քեզ։ 25Եւ ասէ Միքիա. Ահա դու իսկ տեսցես յաւուր յայնմիկ յորում մտանիցես սենեակ ի սենեկէ թաքչել։

26Եւ ասէ արքայն Իսրայելի. Կալայք զՄիքիա եւ տուք ցԱմոն քաղաքապետ եւ ցՅովաս որդի արքայի, 27եւ ասասջիք. Այսպէս ասէ արքայ. Դիք զդա ի բանտի, եւ կերիցէ հաց նեղութեան եւ ջուր նեղութեան, մինչեւ դարձայց խաղաղութեամբ։ 28Եւ ասէ Միքիա. Եթէ դու դառնալով դարձցիս խաղաղութեամբ, ապա ոչ խօսեցաւ յիս Տէր. եւ ասէ. Լուարուք, զօրքդ ամենեքեան։

29Եւ ել արքայն Իսրայելի եւ Յովսափատ արքայն Յուդայ ընդ նմա յՌամովթ Գաղաադ։ 30Եւ ասէ արքայն Իսրայելի ցՅովսափատ արքայն Յուդայ՝՝. Այլակերպեցայց եւ մտից ի պատերազմ, եւ դու զգեցիր զիմ հանդերձ՝՝։ Եւ այլակերպեցաւ արքայն Իսրայելի, եւ եմուտ ի ճակատն։ 31Եւ արքայն Ասորւոց պատուէր ետ կառապետաց իւրոց եւ ասէ. Մի՛ մարտնչիցիք ընդ մեծի կամ ընդ փոքու, այլ միայն ընդ արքային Իսրայելի։ 32Եւ եղեւ իբրեւ տեսին կառապետքն զՅովսափատ արքայ Յուդայ՝՝, եւ ասեն ցմիմեանս. Թուի թէ սա իցէ արքայն Իսրայելի։ Եւ պատեցին զնա պատերազմել. եւ աղաղակեաց Յովսափատ։ 33Եւ եղեւ իբրեւ տեսին կառապետքն եթէ չէ նա արքայն Իսրայելի, դարձան ի նմանէ։ 34Եւ ձգեաց մի ոմն կորովութեամբ զաղեղն իւր, եւ եհար զարքայն Իսրայելի ընդ զրահսն եւ ընդ թոքառաջսն. եւ ասէ ցկառապետն իւր. Դարձո զձեռն քո եւ հան զիս ի պատերազմէս զի խոցեալ եմ։ 35Եւ սաստկացաւ պատերազմն յաւուր յայնմիկ. եւ արքայ կայր ի վերայ կառացն ընդդէմ Ասորւոցն յայգուէ մինչեւ ցերեկոյ՝՝. եւ հոսէր արիւնն ի վիրէ անտի եւ լնոյր զծոց կառացն. եւ իբրեւ ընդ երեկս եղեւ, ել ոգին՝՝։ 36Եւ եկաց քարոզ զօրուն ի բանակին ընդ մտանել արեւուն եւ ասէ. Իւրաքանչիւր ոք ի քաղաք իւր եւ յերկիր իւր, զի մեռաւ արքայ։ 37Եւ եկն՝՝ ի Սամարիա, եւ թաղեցին զարքայ ի Սամարիա։ 38Եւ լուացին զկառսն յաւազանս Սամարեայ. եւ լիզէին խոզք եւ՝՝ շունք զարիւն նորա, եւ բոզք լուացան յարեանն՝՝, ըստ բանին Տեառն զոր խօսեցաւ։

39Եւ մնացորդք բանիցն Աքաաբու, եւ ամենայն ինչ զոր արար, եւ տունն փղոսկրեայ զոր շինեաց, եւ ամենայն քաղաքքն զորս արար, ահաւանիկ գրեալ է ի գիրս բանից աւուրց թագաւորացն Իսրայելի։ 40Եւ ննջեաց Աքաաբ ընդ հարս իւր, եւ թագաւորեաց Ոքոզիա որդի նորա ընդ նորա։

41Եւ Յովսափատ որդի Ասայի թագաւորեաց ի վերայ Յուդայ, յամին չորրորդի Աքաաբու արքայի Իսրայելի թագաւորեաց։ 42Յովսափատ որդի երեսուն եւ հինգ ամաց էր ի թագաւորել իւրում, եւ քսան եւ հինգ ամ թագաւորեաց յԵրուսաղէմ. եւ անուն մօր նորա Ասուբա դուստր Սաղաղայ։ 43Եւ գնաց յամենայն ճանապարհս Ասայի հօր իւրոյ, եւ ոչ խոտորեցաւ ի նմանէ առնել ուղղութիւն առաջի Տեառն։ 44Բաց ի բարձանցն զի ոչ եբարձ, քանզի տակաւին զոհէր ժողովուրդն եւ արկանէր խունկս ի վերայ բարձանց։ 45Եւ խաղաղութեամբ էր Յովսափատ ընդ արքային Իսրայելի։

46Եւ մնացորդք բանիցն Յովսափատու եւ զօրութիւնքն զոր արար եւ որչափ պատերազմեցաւ, ո՞չ աւանիկ գրեալ են ի գիրս բանից աւուրց թագաւորացն Յուդայ։ 47Եւ զաւելորդս նուիրելոցն՝՝ որ մնացին յաւուրս հօր նորա՝ քաղեաց յերկրէն։

48Եւ թագաւոր ոչ գոյր յԵդովմ հաստատեալ։

49Եւ արքայ Յովսափատ արար նաւս Թարսսացիս երթալ յՈփիր զոսկւոյ, եւ ոչ գնացին, քանզի խորտակեցան նաւքն ի Գասիոնգաբեր։ 50Յայնժամ ասէ Ոքոզիա որդի Աքաաբու ցՅովսափատ. Երթիցեն ծառայք քո ընդ ծառայս իմ, եւ նաւք քո ընդ նաւս իմ՝՝. եւ ոչ կամեցաւ Յովսափատ։ 51Եւ ննջեաց Յովսափատ ընդ հարս իւր, եւ թաղեցաւ առ հարս իւր ի քաղաքի Դաւթի հօր իւրոյ. եւ թագաւորեաց Յովրամ որդի նորա ընդ նորա։

52Եւ Ոքոզիա որդի Աքաաբու թագաւորեաց ի վերայ Իսրայելի ի Սամարիա, յամին եւթնուտասներորդի Յովսափատայ արքայի Յուդայ. եւ թագաւորեաց Իսրայելի ամս երկուս։ 53Եւ արար չար առաջի Տեառն, եւ գնաց զճանապարհս Աքաաբու հօր իւրոյ, եւ զճանապարհս Յեզաբելայ մօր իւրոյ, եւ ի մեղս տանն Յերոբովամայ որդւոյ Նաբատայ որ յանցոյցն զԻսրայէլ. 54եւ ծառայեաց Բահաղիմացն, եւ երկիր եպագ նոցա. եւ բարկացոյց զՏէր Աստուած Իսրայելի ըստ ամենայն եղելոցն յառաջ քան զնա՝՝։