1Եւ էր արքայ Սողոմոն թագաւորեալ ի վերայ Իսրայելի։ 2Եւ այս էին իշխանք նորա. Ազարիա որդի Սադովկայ՝ քահանայ, 3Եղիարեփ եւ Աքիա որդիք Սիսայ՝ դպիրք, եւ Յովսափատ որդի Աքիղիդայ՝ ի վերայ յիշատակաց, 4եւ Բանեա որդի Յովիդայեայ՝ ի վերայ զօրաց, եւ Սադովկ եւ Աբիաթար՝ քահանայք, 5եւ Ազարիա որդի Նաթանայ՝ ի վերայ գործավարաց, եւ Զաբութ որդի Նաթանայ՝ քահանայ բարեկամ արքայի, 6եւ Աքիսար էր հրամանատար, եւ Եղիակ՝ հազարապետ, եւ Եղիափ որդի Սափայ՝ շահապ,՝՝ եւ Ադոնիրամ որդի Աբդովայ՝ ի վերայ հարկաց։ 7Եւ էին Սողոմոնի երկոտասան գործակալք ի վերայ ամենայն Իսրայելի, տալ ռոճիկ արքայի եւ տան նորա մէն մի ամիս ի տարւոջ։ 8Եւ այս են անուանք նոցա. Բէին որդի Ովրայ՝՝ ի լերինն Եփրեմի. 9մի որդի Դակարայ՝ ի Մաքմաս եւ ի Սաղաբիմ եւ ի Բեթսամիւս եւ յԱյիղոմ մինչեւ ցԲեթանան. 10որդի Եսդայ՝ յԱրաբովթն, նորա Սոքով եւ ամենայն երկիրն Ոփերայ. 11որդի Աբինադաբայ ամենայն Նեփադովր, որոյ Տափաթ դուստր Սողոմոնի՝ էր նորա կնութեան. 12Բաանա՝ որդի Աքեղովթայ, զԹանաք եւ զՄաքդով եւ զամենայն տունն Սանայ, որ առ Եղսարթանաւ՝՝, ի ներքոյ Եզրայելի, եւ ի Բեթսանայ մինչեւ ցԱբէլմաուլա, եւ մինչեւ ցՄամբրաղա. 13Եկմաաղ որդի՝՝ Գաբերայ՝ յՌամովթ Գաղաադ, նորա Աւիովթ Յայիրայ որդւոյ Մանասէի ի Գաղաադ, նորա վիճակն Արգոբ որ ի Բասան. վաթսուն քաղաքք մեծամեծք պարսպաւորք պղնձանիգք. 14Աքինադաբ որդի Ադդովայ՝ ի Մայենեմ. 15Աքիմաս՝ ի Նեփթաղիմ. սա առ զՄասեմաթ դուստր Սողոմոնի կնութեան. 16Բաանաս որդի Քուսեայ՝ յԱսեր եւ ի Բաաղովթ. 17Յովսափատ որդի Փարուայ՝ յԻսաքար. 18Սեմէի որդի Եղայ՝ ի Բենիամին. 19Գաբեր որդի Արայի՝ յերկրին Գաղաադու, յերկրին Սեհոնի արքայի Ամովրհացւոց եւ Ովգայ արքայի Բասանու. Նաբիփ յերկրին՝՝։

20Յուդա եւ Իսրայէլ բազում էր իբրեւ զաւազ առ եզր ծովու բազմութեամբ. ուտէին եւ ըմպէին եւ ուրախ լինէին։ 21Եւ Սողոմոն իշխան էր թագաւորութեանց՝ ի գետոյ երկրին այլազգեաց՝՝ մինչեւ ի սահմանս Եգիպտոսի. բերէին պատարագս եւ ծառայէին Սողոմոնի զամենայն աւուրս կենաց նորա։

22Եւ այս ռոճիկք էին Սողոմոնի ի միում աւուր. երեսուն քոռ նաշհոյ, եւ քառասուն քոռ ալեր գերմակոյ, 23եւ տասն եզն ընտիր, եւ քսան կով արօտական, եւ հարեւր ոչխար. թող զեղջերու եւ զայծեամն եւ զընտիր ընտիր հաւուց պարարելոց։ 24Զի էր իշխան ամենայնի յայնկոյս գետոյն՝ ի Թափսայ մինչեւ ցԳազա, ամենայն թագաւորութեանց յայնմ կողմանէ գետոյն. եւ էր նմա խաղաղութիւն յամենայն կողմանց շուրջանակի։ 25Եւ բնակեալ էր Յուդա եւ Իսրայէլ վստահութեամբ, իւրաքանչիւր ոք ընդ որթով իւրով եւ ընդ թզենեաւ իւրով ուտէին եւ ըմպէին՝՝ ի Դանայ մինչեւ ցԲերսաբէէ զամենայն աւուրս Սողոմոնի։

26Եւ էին Սողոմոնի քառասուն հազար մատակ ձիոց ի կառս, եւ երկոտասան հազար երիվարաց։ 27Եւ տային այնպէս ռոճիկ գործակալքն արքայի Սողոմոնի, եւ զամենայն հրամանս սեղանոյն արքայի՝՝ զիւրաքանչիւր ամիս, եւ ոչ սխալէին բան մի։ 28Նոյնպէս եւ զգարին եւ զյարդն երիվարացն եւ կառամտացն՝՝ բերէին ի տեղին ուր էր արքայ՝՝ իւրաքանչիւր ոք ըստ սակի իւրում։

29Եւ ետ Տէր իմաստութիւն Սողոմոնի եւ հանճար բազում յոյժ, եւ զեղումն սրտի իբրեւ զաւազ առ եզեր ծովու։ 30Եւ բազմացաւ իմաստութիւնն Սողոմոնի յոյժ քան զհանճար ամենայն նախնեաց մարդկան՝՝ եւ քան զամենայն իմաստնոց Եգիպտոսի։ 31Եւ իմաստնացաւ քան զամենայն մարդիկ, եւ իմաստնացաւ քան զԳեթան Զարաացի՝՝, եւ զԵման, եւ զՔաղքաղ եւ զԴարդան որդիս Մաւուղայ. եւ էր անուանի յամենայն ազգս շուրջանակի։ 32Եւ խօսեցաւ Սողոմոն երիս հազարս առակս. եւ էին օրհնութիւնք նորա հինգ հազար՝՝։ 33Եւ խօսեցաւ զփայտից՝ զեղեւնափայտէն որ ի Լիբանան, մինչեւ ցզոպայն որ յորմն ելանէ. եւ խօսեցաւ զանասնոց եւ զթռչնոց եւ զձկանց։ 34Եւ գային ամենայն ազգք՝՝ լսել զիմաստութիւնն Սողոմոնի, յամենայն թագաւորաց երկրի՝ որ լսէին զիմաստութիւն նորա։