1Եւ առաքեաց Քիրամ արքայ Տիւրոսի զծառայս իւր առ Սողոմոն. քանզի լուաւ թէ զնա օծին ի թագաւոր փոխանակ Դաւթի հօր իւրոյ. զի սիրէր Քիրամ զԴաւիթ զամենայն աւուրս։ 2Եւ առաքեաց Սողոմոն առ Քիրամ եւ ասէ. 3Դու ինքնին գիտես զԴաւիթ զհայր իմ, զի ոչ կարաց շինել տուն անուան Տեառն Աստուծոյ իմոյ յերեսաց պատերազմաց որ շուրջ էին զնովաւ, մինչեւ տալ Տեառն զնոսա ընդ ոտիւք նորա։ 4Եւ արդ ցածոյց Տէր Աստուած իմ շուրջ զինեւ, եւ ոչ գոյ վնասակար եւ ոչ պատահար չար։ 5Եւ ահա ես ասեմ շինել տուն անուան Տեառն Աստուծոյ իմոյ, որպէս խօսեցաւ Տէր Աստուած ընդ Դաւթի հօր իմում եւ ասէ. Որդի քո զոր տաց փոխանակ քո յաթոռ քո՝ նա շինեսցէ տուն անուան իմոյ։ 6Եւ արդ հրաման տուր, եւ հարցեն ինձ փայտ ի Լիբանանէ. եւ ահա ծառայք իմ եղիցին ընդ ծառայս քո. եւ զվարձս ծառայութեան քո՝՝ տաց քեզ ըստ ամենայնի զոր եւ ասասցես. զի դու ինքնին գիտես, զի ոչ գոյ մեր այր որ գիտէ հարկանել փայտ իբրեւ զՍիդոնացիս։

7Եւ եղեւ իբրեւ լուաւ Քիրամ զբանս Սողոմոնի՝ ուրախ եղեւ յոյժ եւ ասէ. Օրհնեալ Տէր Աստուած այսօր, որ ետ որդի իմաստուն Դաւթի ի վերայ բազում ժողովրդեանն այնորիկ։ 8Եւ առաքեաց Քիրամ առ Սողոմոն եւ ասէ. Լուայ վասն ամենայնի զոր առաքեցեր առ իս. ես արարից զամենայն զկամս քո. եղեւնափայտ եւ մայր՝՝ 9իջուսցեն ծառայք իմ ի Լիբանանէ ի ծով, եւ ես արարից զնոսա լաստս ի ծովու մինչեւ ցտեղի յոր առաքեսցես առ իս, եւ հանից յեզր՝՝ եւ դու առցես, եւ արասցես զկամս իմ տալ հաց տան իմոյ։ 10Եւ տայր Քիրամ Սողոմոնի եղեւնափայտս եւ մայրս, զամենայն զկամս նորա։ 11Եւ Սողոմոն տայր Քիրամայ քսան հազար քոռ ցորենոյ եւ քսան հազար սափոր իւղոյ՝՝ մզելոյ, զոր տայր Սողոմոն Քիրամայ ի տարւոջ։ 12Եւ ետ Տէր իմաստութիւն Սողոմոնի, որպէս եւ խօսեցաւ ընդ նմա. եւ էր խաղաղութիւն ի մէջ Քիրամայ եւ ի մէջ Սողոմոնի, եւ ուխտեցին ուխտ ի մէջ իւրեանց։

13Եւ արկ արքայ Սողոմոն մարդահարկ յամենայն Իսրայէլ, եւ էր հարկն երեսուն հազար արանց։ 14Եւ առաքէր զնոսա ի Լիբանան տասն հազար յամսեան, փոխանակաւ կային ամիս մի ի Լիբանան եւ զերկուս ամիսս ի տունս իւրեանց. եւ Ադոնիրամ ի վերայ հարկին։ 15Եւ էին Սողոմոնի եւթանասուն հազար բեռնակրաց եւ ութսուն հազար քարահատաց ի լերինն, 16թող զիշխանս կացուցեալս Սողոմոնի ի վերայ գործոյն, երեք հազարք եւ հինգ հարեւր, ի վերայ ժողովրդեանն որ գործէին զգործն։ 17Եւ հրաման ետ արքայ եւ բերին վէմս մեծամեծս, քարինս պատուականս ի հիմն տանն, եւ քարինս անտաշս։ 18Եւ տաշեցին որդիքն Սողոմոնի եւ որդիքն Քիրամայ եւ Բիբլացիքն. եւ պատրաստեցին զփայտն եւ զքար զերիս ամս՝՝ շինել զտունն։