1Եւ եղեւ յամին չորեքհարիւրորդի եւ քառասներորդի ելանելոյ որդւոցն Իսրայելի յԵգիպտոսէ, յամին չորրորդի ամսեանն երկրորդի՝՝ թագաւորելոյ արքայի Սողոմոնի ի վերայ Իսրայելի՝ շինէր զտունն Տեառն։

2Եւ տունն զոր շինեաց արքայ Սողոմոն Տեառն՝ վաթսուն կանգուն երկայնութիւն նորա, եւ քսան կանգուն լայնութիւն նորա, եւ քսան կանգուն բարձրութիւն նորա։ 3Եւ կամարակապ առաջի տանն, ի քսան կանգնոյ երկայնութիւն նորա՝ հանդէպ բարձրութեան տանն, եւ ի տասն կանգնոյ լայնութիւն նորա՝ առաջի երեսաց տանն. եւ շինեաց զտունն եւ կատարեաց զնա։՝՝ 4Եւ արար տանն պատուհանս հայեցիկս ծածուկս։ 5Եւ ած զորմովք տանն պատուարս շուրջանակի՝ առ որմովք տանն շուրջանակի տաճարին եւ դաբիրայն. եւ արար կողմանոցս շուրջանակի։ 6Կողմանոցին ներքնոյ՝ ի հինգ կանգնոյ լայնութիւն նորա, եւ միջնոյն՝ ի վեց կանգնոյ լայնութիւն, եւ երրորդին՝ յեւթն կանգնոյ լայնութիւն նորա. քանզի անջրպետութիւն ետ տանն շուրջանակի արտաքուստ կողմանէ տանն, զի մի՛ հարկանիցին ընդ որմս տանն։ 7Եւ ի շինել տանն ապառաժ եւ անգործ քարամբք շինեցաւ, եւ մուրճ եւ ամենայն ինչ՝՝ երկաթի ոչ հնչեաց ի շինել նորա։ 8Եւ դուռն կողմանոցին ի ներքոյ աջոյ՝՝ ուսոյ տանն, եւ ելանելի շուրջանակաւ՝ ի միջինն, եւ ի միջնոյն՝ յերրորդ յարկն։ 9Եւ շինեաց զտունն եւ կատարեաց զնա, եւ դրուագեաց զտունն տախտակամածօք պահանգօք եւ յօրինուածովք եղեւնափայտից։ 10Եւ շինեաց զկոզակս ամենայն տանն՝՝, ի հինգ կանգնոյ բարձրութիւն նոցա, եւ պատեաց զկոզակսն եղեւնափայտիւ։

11Եւ եղեւ բան Տեառն առ Սողոմոն եւ ասէ. 12Զտունդ զոր շինես դու, եթէ ըստ հրամանաց իմոց գնասցես եւ զիրաւունս իմ արասցես եւ պահեսցես զամենայն պատուիրանս իմ գալ զնոքօք, հաստատեցից զբան իմ ընդ քեզ՝ զոր խօսեցայ ընդ Դաւթի հօր քո. 13եւ բնակեցայց ի մէջ որդւոցն Իսրայելի, եւ ոչ թողից զժողովուրդ իմ զԻսրայէլ։

14Եւ շինեաց Սողոմոն զտունն եւ կատարեաց զնա։ 15Եւ շինեաց զորմս տանն ի ներքուստ յեղեւնափայտից, ի յատակէ տանն մինչեւ ցորմսն եւ մինչեւ ցգերանսն, եւ՝՝ պատեաց շուրջանակի փայտիւ ի ներքուստ, եւ դրուագեաց ի ներքոյ տանն կողմանոցօք՝՝ մայրիւք։ 16Եւ շինեաց քսան կանգուն ի ծագէ որմոյն զմի կողմանոցն՝՝ ի յատակէ տանն մինչեւ ցհեծանսն. եւ արար ի ներքոյ կողմանէ նորա զդաբիրն ի սրբութեան՝՝ սրբութեանցն։ 17Ի քառասուն կանգնոյ էր տունն, տաճարն ներքին՝՝։ 18Եւ դրուագեաց զտունն ի ներքոյ եղեւնափայտիւք զկամարսն եւ զկոզակս, եւ զդրօշուածս՝՝ զամենայն յեղեւնափայտից, եւ ոչ երեւէր քարն. 19հանդէպ դաբիրայն՝՝ ի մէջ տանն ի ներքուստ կողմանէ պատրաստեաց, դնել անդ զտապանակ ուխտին Տեառն։ 20Եւ հանդէպ դաբիրայն քսան կանգուն յերկայնութիւն եւ քսան կանգուն ի լայնութիւն, եւ քսան կանգուն ի բարձրութիւն նորա. եւ դրուագեաց զնա ոսկւով ձուլով. եւ արար սեղան եղեւնափայտեայ՝՝։ 21Եւ դրուագեաց Սողոմոն զտունն ի ներքուստ ոսկւով զտով. եւ հաստատեաց ոսկի բեւեռօք՝՝ հանդէպ դաբիրայն՝ եւ պատեաց զնա ոսկւով։ 22Եւ զամենայն տունն օծ ոսկւով մինչեւ ի սպառ ամենայն տանն. եւ ամենայն ներքին կողման դաբիրայն՝ արար թիթղունս ոսկիս՝՝։

23Եւ արար ի ներքս ի դաբիրն երկուս քերովբէս ի փայտից նոճից, ի տասն կանգնոյ մեծութիւն միոյն՝ կշռով՝՝։ 24Եւ ի հինգ կանգնոյ թեւ մի նորա, եւ ի հինգ կանգնոյ թեւն երկրորդ. տասն կանգուն թեւէ ի թեւ թեւոց նորա։ 25Նոյնպէս եւ երկրորդի քերովբէին, միով չափով մի բովանդակութիւն քերովբէիցն։ 26Եւ բարձրութիւն միոյ քերովբէի ի տասն կանգնոյ, նոյնպէս եւ երկրորդի քերովբէին։ 27Եւ եդ զերկոսին քերովբէսն ի մէջ տանն ներքնոյ, եւ տարածեաց զթեւս նոցա. եւ հասանէր թեւ միոյն յորմն, եւ հասանէր թեւ քերովբէին երկրորդի՝ յորմն երկրորդ. եւ թեւք նոցա ի մէջ տանն հասանէին թեւէ ի թեւ. 28եւ պատեաց զքերովբէսն ոսկւով։

29Եւ զամենայն որմս տանն շուրջանակի քանդակեալ գրեաց գրչաւ քերոբս եւ արմաւենիս, եւ դրօշուածս հայելիս՝՝ ի ներքսագոյնն եւ յարտաքինն։ 30Եւ զյատակ տանն դրուագեաց ոսկւով զներքնոյն եւ զարտաքնոյն։

31Եւ դրաց դաբիրայն արար դուրս ի փայտից գիոց, եւ սեամս հնգեկինս։ 32Եւ երկուս դուրս ի փայտից մայրից, եւ քանդակս ի նոցանէ մածուցեալս քերոբս եւ արմաւենիս եւ թիթղունս թռուցեալս՝՝, եւ պատեաց ոսկւով, եւ իջանէր ի վերայ քերովբէիցն եւ արմաւենեացն ոսկին։

33Այնպէս արար դրաց տաճարին սեամս ի փայտից գիոց չորեքկինս. 34եւ երկոցունց դրանցն փայտս մայրս, երկբացիկս, մի մի դուռն. եւ ծխնիք նոցա երկբացիկք։ 35Եւ դուռն երկրորդ շրջանակաւ՝ դրօշեալ՝՝ ի նմա քերոբս եւ արմաւենիս, եւ թռուցեալ թիթղունս, եւ պատեալ՝՝ ոսկւով իջելով ի վերայ յօրինուածոյն։

36Եւ շինեաց զսրահն ներքին երեքկարգեան յանտաշից, եւ պարիսպ գործեալ յեղեւնափայտից՝՝։

37Յամին չորրորդի արկ հիմն տանն Տեառն, յամսեանն Զիու՝ յերկրորդում ամսեանն,՝՝ 38եւ յամին մետասաներորդի՝ յամսեանն ի Բուլ, այն է ամիսն ութերորդ, կատարեցաւ տունն ըստ ամենայն բանի նորա, եւ ըստ ամենայն յօրինուածոյն իւրոյ. եւ շինեաց զնա զեւթն ամ։