1Եւ զիւր տունն շինեաց Սողոմոն զերեքտասան ամ, եւ կատարեաց զամենայն զտունն իւր։

2Եւ շինեաց զտուն անտառին Լիբանանու՝ հարեւր կանգուն երկայնութիւն եւ յիսուն կանգուն լայնութիւն նորա, եւ երեսուն կանգուն բարձրութիւն նորա, եւ երից՝՝ կարգաց սեանցն եղեւնափայտից, եւ ուսք եղեւնեայք ի վերայ սեանցն. 3եւ էյարկ զտունն ի վերայ կողմանոցաց սեանցն՝՝. եւ թիւ սեանցն քառասուն եւ հինգ, եւ հնգետասան կարգ։ 4Եւ պատուարք երեք, եւ անջրպետք առ անջրպետօք՝՝ երեքկին։ 5Եւ ամենայն դրունք եւ ամենայն անջրպետք չորեքկուսի պատուարաւորք, եւ ի դրանէ ի դուռն՝՝ երեքկին։

6Եւ զկամար սեանցն՝՝ արար յիսուն կանգուն յերկայնութիւն եւ երեսուն ի լայնութիւն, զօդեալ կամարքն հանդէպ միմեանց, եւ սիւնքն եւ խարիսխք ի դիմաց կողմանէ կամարացն։ 7Եւ զկամար աթոռոցն ուր դատէր ի կամարի ատենին՝ արար, եւ յարկ՝՝ եղեւնափայտիւք ի յատակէ մինչեւ ցյատակ։

8Եւ տան նորա յորում նստիցի՝ սրահ մի կամարակապ ըստ նմին գործոյ. եւ տուն դստերն փարաւոնի զոր ա՛ռ Սողոմոն՝ ըստ նմին օրինակի կամարակապ։ 9Ամենայն ի քարանց պատուականաց, չափով յանկոփից կցեալ ընդ միմեանս յերկարաւոր՝՝ ի ներքոյ եւ արտաքոյ, ի հիմանէ մինչեւ ցառաստաղն. եւ արտաքուստ ի սրահին մեծի՝՝ 10հաստատեալ քարամբք մեծամեծօք տասնկանգնէիւք եւ ութկանգնէիւք, 11եւ ի վերուստ կողմանէ քարամբք պատուականօք ըստ նմին չափոյ անտաշիւք, եւ եղեւնափայտիւք։ 12Զսրահն մեծ շուրջանակի երեքկարգեանս յանտաշից, եւ կարգ մի մածուցեալ եղեւնափայտիւ։ Եւ շինեաց զսրահ տանն Տեառն՝ զներքին կամարաց տան Տեառն հանդէպ տաճարին՝՝։

13Եւ առաքեաց արքայ Սողոմոն, եւ առ զՔիրամ ի Տիւրոսէ, 14որդի կնոջ այրւոյ, եւ նա էր ի ցեղէն Նեփթաղիմայ, եւ հայր նորա այր Տիւրացի. ճարտարապետ պղնձոյ եւ լի արուեստիւ եւ իմաստութեամբ եւ գիտութեամբ՝ գործել զամենայն գործ պղնձոյ. եւ եմուտ առ արքայ Սողոմոն, եւ արար զամենայն զգործն։ 15Եւ ձուլեաց զերկոսին սիւնսն կամարի տանն՝՝, ութ եւ տասն կանգուն բարձրութիւն սեանն, եւ շուրջ զնովաւ չափ չորեքտասան կանգուն շուրջանակի թանձրութիւն սեանն, եւ ի չորից մատանց մատնէքն՝՝. նոյնպէս եւ երկրորդ սիւնն։ 16Եւ երկուս խոյակս արար տալ ի վերայ գլխոց սեանցն ձոյլ պղնձիս. հինգ կանգուն բարձրութիւն միոյ խոյակին, եւ հինգ կանգուն բարձրութիւն երկրորդ խոյակին։ 17Եւ արար երկուս վանդակս ծածկել զխոյակն, եւ արար երկուս եւս վանդակս ծածկել զերկրորդ խոյակն, գործ կախաղանաւ. 18եւ երկոցունց սեանցն նռնաձեւս պղնձիս ի վանդակապատսն, գործ կախաղանաւ, կարգ առ կարգ. եւ այնպէս արար երկրորդի խոյակին 19ի վերայ գլխոյ սեանցն՝՝ գործ շուշանագործ առ կամարաւ՝՝ ի չորից կանգնոց։ 20Եւ պատուար ի վերայ երկոցունց սեանցն ի վերուստ ի կողմանոցաց խոյակին պատուար, եւ նռնաձեւացն երկերիւր կարգ՝՝ շուրջ զերկրորդիւ խոյակաւն։ 21Եւ կանգնեաց զսիւնս կամարի տաճարին, եւ կանգնեաց զմի սիւնն, եւ կոչեաց զանուն նորա Յաքում. եւ կանգնեաց զսիւնն երկրորդ, եւ կոչեաց զանուն նորա Բոոզ։ 22Եւ ի վերայ գլխոյ սեանցն՝ գործ շուշանագործ. եւ կատարեցաւ գործ սեանցն։

23Եւ արար զծովն ձուլածոյ, տասն կանգուն շրթանէ ի շուրթն, գործ բոլորշի նոյնաձեւ. հինգ կանգուն բարձրութիւն նորա, եւ գոգեալք երեսուն եւ երիւք կանգնովք պատէին՝՝ զնա շուրջանակի։ 24Եւ նեցուկք ի ներքոյ նորա՝ շուրջանակի պատէին զնա ի տասն կանգնոյ շուրջանակի՝՝, երկու կարգ մութից ձուլեալք ի ձուլին նորա հաստատեալք։ 25Եւ երկոտասան եզն ի ներքոյ ծովուն. երեքն հայէին ընդ հիւսիսի, եւ երեքն հայէին ընդ ծով, եւ երեքն հայէին ընդ հարաւ, եւ երեքն հայէին ընդ արեւելս. եւ ծովն ի վերայ նոցա ի վերուստ կողմանէ. եւ ամենեցուն թիկունք ի տունն՝՝։ 26Եւ թանձրութիւն նորա թզաւ, եւ շուրթն նորա իբրեւ զգործ շրթան բաժակի. եւ բոյս շուշանի ի վերայ նորա. եւ տանէր իբրեւ երկուս հազարս մարս։

27Եւ արար մեքենովթս տասն պղնձիս. հինգ կանգուն երկայնութիւն միոյ մեքենովթայ, եւ չորք կանգունք լայնութիւն նորա, եւ վեց կանգուն բարձրութիւն նորա։ 28Եւ այս գործ էր մեքենովթացն, խորշք խորշք ի վերայ, եւ խորշք ի մէջ առանցիցն։ 29Եւ ի վերայ խորշից նոցա ի մէջ առանցիցն՝՝ առեւծք եւ եզինք եւ քերոբք, եւ ի վերայ առանցիցն նոյնպէս ի վերոյ, եւ ի ներքոյ առիւծուցն եւ եզանց՝ տեղիք գործ առ ի թափի։ 30Եւ չորք անիւք պղնձիք միում մեքենովթայն եւ առանցք պղնձիք. եւ ի չորեցունց կողմանց նոցա ուսք նոցա ի ներքոյ աւազանացն եւ ուսք ձուլեալք հանգոյնք մարդոյ առ ընթերակացք՝՝. 31եւ բերան նորա ի ներքուստ ի խոյակէն եւ ի վեր կանգնաւ. եւ բերան նորա գործ բոլորշի՝՝, նոյնպէս ի կանգնոյ եւ ի կիսոյ թանձրութիւն նորա. եւ առ բերանով նորա ճախարակեայ հաստատուն՝՝ չորեքկուսի եւ ոչ բոլորշի։ 32Եւ չորք անիւք ի ներքոյ հաստատելոցն, եւ ձեռք յանիւսն, ի մեքենովթսն. եւ բարձրութիւն միոյ անուոյ ի կանգնոյ եւ ի կիսոյ։ 33Եւ գործ անուոցն՝ իբրեւ զգործած անուոց կառաց, եւ ձեռք նոցա եւ պարանոցք իւրեանց եւ թիկունք իւրեանց եւ ամենայն արար նոցա ձուլածոյ։ 34Եւ չորք ուսք ի վերայ չորեցունց անկեանց միոյ մեքենովթայն. անդստին ի մեքենովթայն ուսք իւր։ 35Եւ ի գլուխ մեքենովթայն կէս կանգնոյ մեծ բոլորակ շուրջ զնովաւ ի վերայ գլխոյ մեքենովթայն, եւ սկիզբն ձեռաց նորա եւ խորշք՝՝ նորա անդստին ի նմանէ։ 36Եւ բանային ի սկիզբն ձեռաց նորա, եւ խորշք՝՝ նորա քերոբք եւ առիւծունք եւ արմաւենիք կանգնեալք առ նովաւ. իւրաքանչիւր հանդէպ երեսաց իւրոց ի ներքս եւ՝՝ շուրջանակի։ 37Ըստ նմին օրինակի արար զամենայն զտասնեսին մեքենովթսն. մի պայման եւ մի չափ եւ մի օրինակ ամենեցուն։

38Եւ արար տասն պուտնարդս պղնձիս. եւ ունէր պուտնարդ մի քառասուն սափոր. ի չորից կանգնոց պուտնարդ մի չափով, եւ պուտնարդ մի ի վերայ միոյ մեքենովթայ՝ տասնեցունց մեքենովթացն։ 39Եւ եդ զմեքենովթսն հինգ յուսոյ տանն յաջմէ, եւ զհինգն յուսոյ տանն ի ձախմէ. եւ ծովն յուսոյ տանն ընդ աջմէ՝ ընդ արեւելս ի հարաւոյ կողմանէ։

40Եւ արար Քիրամ զսանսն եւ զջեռուցիչսն եւ զտաշտսն. եւ կատարեաց Քիրամ առնել զամենայն գործն զոր արար արքայի Սողոմոնի ի տան Տեառն. 41սիւնս երկուս, եւ շրջանակս քանդակագործից սեանցն ի վերայ գլխոյ սեանցն. երկուս երկուս վանդակապատս՝ ծածկել զերկոսին շրջանակսն քանդակագործացն որ էին ի վերայ սեանցն. 42զնռնաձեւսն զչորեքհարեւր երկոցունց վանդակացն, երկու կարգ նռնաձեւաց միոյ վանդակի, ծածկել շուրջ զերկոսին շրջանակս մեքենովթացն ի վերայ երկոցունց սեանցն. 43եւ զմեքենովթսն եւ զպուտնարդսն տասնեսին ի վերայ մեքենովթացն. 44եւ զծովն զմի, եւ զերկոտասանեսին եզինսն ի ներքոյ ծովուն. 45եւ զսանսն եւ զջեռուցիչսն զերեսին եւ զտաշտսն, եւ զամենայն կահն զոր արար Քիրամ արքայի Սողոմոնի ի տանն Տեառն եւ սիւնք քառասուն եւ ութ տանն արքայի եւ տանն Տեառն. զամենայն գործ զարքայի պատրաստեաց Քիրամ պղնձի համօրէն. եւ ոչ գոյր կշիռ պղնձոյն որով արար զամենայն զգործսն զայնոսիկ ի բազմութենէ անտի յոյժ, եւ ոչ գոյր չափ կշռոյ պղնձոյն՝՝ փայլնոյ։ 46Առ ափն Յորդանանու ձուլեաց զայն արքայի, ի թանձրութեան երկրին ի մէջ Սոկքովթայ եւ ի մէջ Սիրարթամայ։ 47Եւ ետ արքայ Սողոմոն յամենայն կահն, քանզի կարի յոյժ էր բազմութեամբ եւ ոչ գոյր թիւ պղնձոյն։

48Եւ արար Սողոմոն զամենայն կահն որ ի տան Տեառն, զզոհանոցն ոսկի, եւ զսեղանն յորոյ վերայ հացն պատարագի՝ ոսկի, 49եւ զաշտանակսն հինգ ընդ աջմէ եւ հինգ ընդ ձախմէ հանդէպ դաբիրայն ի զուտ ոսկւոյ, եւ զբազմակալսն եւ զճրագունսն եւ զյարդարիչսն ոսկիս, 50եւ զդրանդսն եւ զբեւեռսն՝՝ եւ զտաշտսն եւ զսկաւառակսն եւ զտուփսն՝՝ ոսկիս զուտ, եւ զդրունս տանն ներքնոյ, զսրբութեան սրբութեանցն, եւ զդրունս տան տաճարին՝ ոսկիս։

51Եւ բովանդակեցաւ ամենայն գործն զոր արար արքայ Սողոմոն զտանն Տեառն. եւ տարաւ արքայ Սողոմոն զսրբութիւնսն Դաւթի հօր իւրոյ եւ զամենայն սրբութիւնս Սողոմոնի՝՝ զարծաթ եւ զոսկի եւ զկահ՝ ետ ի գանձս տանն Տեառն։