1Եւ ա՛ռ Սամուէլ զսրուակն իւղոյ եւ եհեղ ի գլուխ նորա, եւ համբուրեաց զնա եւ ասէ ցնա. Ո՞չ ապաքէն օծ զքեզ Տէր ի վերայ ժառանգութեան իւրոյ իշխան, եւ ի վերայ ժողովրդեան իւրոյ Իսրայելի. եւ դու իշխեսցես ժողովրդեան Տեառն, եւ փրկեսցես զնա ի ձեռաց թշնամեաց իւրոց շուրջանակի. եւ այն եղիցի քեզ նշանակ՝ եթէ Տէր օծ զքեզ։՝՝ 2Իբրեւ երթայցես այսօր յինէն, գտցես երկուս արս առ գերեզմանաւն Հռաքելի՝ ի լերինն Բենիամինի, զի մեծամեծս վազիցեն՝՝, եւ ասիցեն ցքեզ. Գտան էշքն յորոց դուն ի խնդիր երթեալ էիր. եւ թողեալ հօր քո զիրս իշոցն՝ հոգայ վասն ձեր. եւ ասէ. Զի՞նչ արարից վասն որդւոյ իմոյ։ 3Եւ երթիցես անտի եւս անդր, եւ հասցես մինչեւ ի կաղնին Դեբովրայ, եւ գտցես անդ երիս արս որ ելանիցեն առ Աստուած ի Բեթէլ. միոյն բարձեալ ուլս երիս, եւ միոյն բարձեալ երիս ամանս հացի, եւ միոյն բարձեալ տիկ մի գինւոյ։ 4Եւ հարցցեն զքէն ի խաղաղութիւն, եւ տացեն քեզ երկուս պտուղս հացի՝՝, եւ առցես ի ձեռաց նոցա։ 5Եւ ապա մտցես ի բլուրն Աստուծոյ, ուր է գունդ այլազգեացն. եւ եղիցի յորժամ մտանիցես ի քաղաքն, դիպեսցիս պարու մարգարէից իջելոց ի Բամայ, եւ առաջի նոցա սրինգ եւ թմբուկ եւ փող եւ քնար, եւ ինքեանք մարգարէացեալք։ 6Եւ խաղասցէ ի վերայ քո Հոգի Տեառն, եւ մարգարէասցիս եւ դու ընդ նոսա, եւ դարձցիս յայր յայլ։ 7Եւ եղիցի յորժամ գայցեն նշանքս այսոքիկ ի վերայ քո, արասցես զամենայն ինչ զոր գտանիցէ ձեռն քո, զի Աստուած ընդ քեզ է։ 8Եւ իջցես յառաջ քան զիս ի Գաղգաղա. եւ ահա ես իջից առ քեզ մատուցանել ողջակէզս եւ զոհս խաղաղականս. զեւթն օր դադարեսցես մինչեւ եկից առ քեզ, եւ իմացուցից քեզ զոր ինչ առնիցես։

9Եւ եղեւ ի դարձուցանել զթիկունս իւր գնալոյ ի Սամուելէ՝ շրջեաց նմա Աստուած սիրտ այլ, եւ եկին հասին նմա ամենայն նշանքն յաւուր յայնմիկ։ 10Եւ եկն անտի ի բլուրն, եւ ահա պար մարգարէից ընդ առաջ նորա. եւ խաղաց ի վերայ նորա Հոգի Աստուծոյ, եւ մարգարէացաւ ի միջի նոցա։ 11Եւ եղեւ իբրեւ ծանեան զնա ամենեքին որոց յերէկն եւ յեռանդ տեսեալ էր զնա, եթէ ահա եւ նա ի մէջ մարգարէիցն մարգարէանայր, ասէ ժողովուրդն իւրաքանչիւր ցընկեր իւր. Զի՞նչ է այդ որ եղեւ որդւոյ Կիսեայ, կամ թէ եւ Սաւո՞ւղ ընդ մարգարէս իցէ։ 12Եւ պատասխանի ետ ոմն ի նոցանէ եւ ասէ. Եւ ո՞վ է հայր նորա, եթէ ոչ Կիս՝՝. վասն այնորիկ եղեւ յառակս թէ՝ Եւ Սաւո՞ւղ ի մարգարէս։ 13Եւ վախճանեաց զմարգարէանալն, եւ եկն ի բլուրն։

14Եւ ասէ ընտանի նորա ցնա եւ ցծառայն նորա. Յո՞ չոգայք։ Եւ ասեն. Խնդրել զէշսն. եւ իբրեւ տեսաք թէ չեն ուրեք, մտաք առ Սամուէլ։ 15Եւ ասէ ընտանին ցՍաւուղ. Պատմեա ինձ զի՞նչ ասաց քեզ Սամուէլ։ 16Եւ ասէ Սաւուղ ցընտանին իւր. Պատմելով պատմեաց ինձ եթէ գտան էշքն։ Բայց զբան թագաւորութեանն ոչ եհան նմա ի վեր, զոր ասաց նմա Սամուէլ։

17Եւ ժողովեաց Սամուէլ զամենայն ժողովուրդն առ Տէր ի Մասփա։ 18Եւ ասէ ցորդիսն Իսրայելի. Այսպէս խօսեցաւ Տէր Աստուած Իսրայելի եւ ասէ. Ես եմ որ հանի զորդիսն Իսրայելի յԵգիպտոսէ, եւ փրկեցի զձեզ ի ձեռաց փարաւոնի արքային՝՝ Եգիպտացւոց, եւ յամենայն թագաւորութեանց նեղչաց ձերոց։ 19Եւ դուք այսօր անարգեցէք զԱստուած՝՝, որ է փրկիչ ձեր յամենեցունց որ շուրջ զձեւք են եւ նեղեն զձեզ՝՝, եւ ասացէք՝ Ոչ այդպէս, այլ զի կացուսցես ի վերայ մեր թագաւոր. եւ արդ կացէք առաջի Տեառն ըստ իշխանութեանց ձերոց, եւ՝՝ ըստ գաւազանաց ձերոց, եւ ըստ հազարաւորաց ձերոց։ 20Եւ մատոյց Սամուէլ զամենայն գաւազանսն Իսրայելի, եւ ել վիճակն գաւազանին Բենիամինի։ 21Եւ մատոյց զգաւազանն Բենիամինի ըստ ցեղից, եւ ելանէր վիճակն ցեղին Մատտարեայ. եւ մատուցին զցեղն Մատտարեայ ըստ արանց,՝՝ եւ ելանէր վիճակն Սաւուղայ որդւոյ Կիսեայ. եւ խնդրէր զնա եւ ոչ գտանէր։ 22Եւ եհարց միւսանգամ Սամուէլ՝՝ զՏէր. Եթէ գայցէ՞ այսր այրն։ Եւ ասէ Տէր. Աւադիկ թաքուցեալ է ընդ կարասեաւ։ 23Եւ ընթացաւ եւ ա՛ռ զնա անտի, եւ կացոյց զնա՝՝ ի մէջ ժողովրդեանն. եւ բարձրացաւ քան զամենայն ժողովուրդն թիկամբք չափ ի վեր։ 24Եւ ասէ Սամուէլ ցամենայն ժողովուրդն, եթէ՝ Տեսանիցէ՞ք զոր ընտրեացդ իւր Տէր, զի ոչ գոյ նման դորա յամենեսին ի ձեզ։ Եւ ծանեան՝՝ ամենայն ժողովուրդն եւ ասեն. Կեցցէ՜ արքայ։ 25Եւ ասաց Սամուէլ ժողովրդեանն զիրաւունս թագաւորին, եւ գրեաց ի մատենի եւ եդ առաջի Տեառն. եւ արձակեաց Սամուէլ զամենայն ժողովուրդն, եւ գնաց իւրաքանչիւր ոք ի տեղի իւր։ 26Եւ Սաւուղ գնաց ի տուն իւր ի Գաբաա. եւ գնացին որդիք զօրութեան զորոց գրգռեաց Տէր զսիրտս նոցա՝ ընդ Սաւուղայ։ 27Եւ որդիք ժանտք ասէին թէ՝ Ո՞ է սա որ փրկիցէ զմեզ. եւ անարգեցին զնա, եւ ոչ բերին նմա պատարագս։