1Եւ ասէ Սամուէլ ցՍաւուղ. Զիս առաքեաց Տէր օծանել զքեզ ի թագաւոր ի վերայ ժողովրդեան իւրոյ Իսրայելի. եւ արդ լուր ձայնի պատգամաց Տեառն։ 2Այսպէս ասէ Տէր զօրութեանց. Արդ խնդրեցից զվրէժ, զոր արար Ամաղէկ ընդ Իսրայելի. զիա՛րդ պատահեաց նմա ի ճանապարհի ելանելոյ նորա յԵգիպտոսէ։ 3Եւ արդ երթ եւ հարցես զԱմաղէկ եւ զՅարիմ եւ՝՝ զամենայն որ ինչ նորա իցէ. եւ մի՛ ապրեցուցանիցես ի նոցանէ, եւ սատակեսցես զնա եւ կորուսցես յառնէ մինչեւ ցկին եւ ի տղայոյ մինչեւ ցստնդիացն, եւ յարջառոյ մինչեւ ցոչխար եւ յուղտուէ մինչեւ ցէշ։

4Եւ հրաման ետ Սաւուղ ժողովրդեանն, եւ հանդէս արար նոցա յԱղիմ, չորեք հարեւր հազար դասականաց, եւ երեսուն հազարաց դասականաց՝՝ Յուդայ։ 5Եւ եկն Սաւուղ մինչեւ ցքաղաքն Ամաղեկայ, եւ դարանամուտ եղեւ ի հեղեղատին։ 6Եւ ասէ Սաւուղ ցԿինեցին. Երթ խոյս տուր ի միջոյ Ամաղեկացւոյն, զի մի՛ սատակեցից զքեզ ընդ նմա. եւ դու արարեր ողորմութիւն ընդ ամենայն որդիսն Իսրայելի յելանելն նոցա յԵգիպտոսէ։ Եւ խոյս ետ Կինեցին ի միջոյ Ամաղեկայ։ 7Եւ եհար Սաւուղ զԱմաղէկ յԵւիլատայ մինչեւ ի Սուր, որ է հանդէպ Եգիպտոսի. 8եւ կալաւ զթագաւորն Ամաղեկայ զԱգագ կենդանւոյն, եւ զամենայն ազգն Յարիմայ կոտորեցին սրով սուսերի։ 9Եւ ապրեցոյց Սաւուղ եւ ամենայն ժողովուրդն զԱգագ կենդանի, եւ զընտիրս խաշանց եւ զանդւոց եւ զկերակրոց եւ զայգեաց եւ զամենայն բարութեանց՝՝, եւ ոչ կամեցաւ սատակել զնոսա. եւ զամենայն գործ զանարգ եւ զարհամարհեալ սատակեցին։

10Եւ եղեւ բան Տեառն առ Սամուէլ եւ ասէ. 11Զղջացեալ եմ զի թագաւորեցուցի զՍաւուղ ի թագաւոր. զի դարձաւ յինէն յետս, եւ զբանս իմ ոչ պահեաց։ Եւ տրտմեցաւ Սամուէլ, եւ գոչեաց Սամուէլ առ Տէր զգիշերն ամենայն։ 12Եւ կանխեաց Սամուէլ եւ գնաց ընդ առաջ Իսրայելի ընդ առաւօտն. եւ ազդ եղեւ Սամուելի եւ ասեն. Եկն Սաւուղ ի Կարմեղոս եւ կանգնեաց իւր ձեռն, եւ դարձոյց զկառսն՝՝ եւ էջ ի Գաղգաղա։

13Եւ եկն Սամուէլ առ Սաւուղ. եւ ահա նա մատուցանէր ողջակէզս Տեառն զառաջինս աւարոյն զոր ած յԱմաղեկայ։ Եւ եկն Սամուէլ առ Սաւուղ,՝՝ եւ ասէ ցնա Սաւուղ. Օրհնեալ դու ի Տեառնէ. կացուցի զոր ինչ խօսեցաւ Տէր։ 14Եւ ասէ Սամուէլ. Եւ զի՞նչ է բարբառ հօտիցդ այդոցիկ յականջս իմ, եւ բարբառ արջառոցդ զոր ես լսեմ։ 15Եւ ասէ Սաւուղ. ՅԱմաղեկայ ածի զայդ զոր ապրեցոյց ժողովուրդդ, զընտիրս խաշանց եւ զարջառոց, զի զոհեսցեն Տեառն Աստուծոյ քում. եւ զայլսն սատակեցի։ 16Եւ ասէ Սամուէլ ցՍաւուղ. Անսա եւ պատմեցից քեզ զոր խօսեցաւ Տէր ընդ իս յայսմ գիշերի։ Եւ ասէ ցնա. Խօսեաց։ 17Եւ ասէ Սամուէլ ցՍաւուղ. Ո՞չ ապաքէն փոքր ես դու առաջի նորա զօրավար գաւազանի ցեղին՝՝ Իսրայելի, եւ օծ զքեզ Տէր թագաւոր ի վերայ Իսրայելի. 18եւ առաքեաց զքեզ Տէր ի ճանապարհ, եւ ասէ ցքեզ. Երթ եւ սատակեա զմեղանչականն յիս զԱմաղէկ. եւ տացես ընդ նոսա պատերազմ մինչեւ վախճանեսցես զնոսա. 19եւ ընդէ՞ր ոչ լուար ձայնի Տեառն, այլ յարձակեցար դիմել ի վերայ աւարիդ, եւ արարեր չար առաջի Տեառն։ 20Եւ ասէ Սաւուղ ցՍամուէլ. Վասն լսելոյ իմոյ ձայնի ժողովրդեանն՝՝. եւ չոգայ ի ճանապարհն զոր առաքեաց զիս Տէր, եւ ածի զԱգագ արքայ Ամաղեկայ, եւ զԱմաղէկ սատակեցի։ 21Եւ ա՛ռ ժողովուրդս յաւարէ անտի հօտս եւ անդեայս զընտիրս սատակմանն՝ առաջի Տեառն Աստուծոյ զոհել՝՝ ի Գաղգաղա։ 22Եւ ասէ Սամուէլ. Եթէ հաճո՞յ իցէ Տեառն ողջակէզ եւ զոհ իբրեւ զլսել ձայնի Տեառն. ահա լաւ է ունկնդրութիւն քան զզոհ ընտիր, եւ հնազանդութիւն քան զճարպ խոյոց։ 23Զի հմայք մեղք են, եւ ցաւս եւ աշխատութիւնս ածէ թերափդ ի վերայ՝՝. զի արհամարհեցեր զբան Տեառն, արհամարհեսցէ զքեզ Տէր չլինել թագաւոր ի վերայ Իսրայելի՝՝։ 24Եւ ասէ Սաւուղ ցՍամուէլ. Մեղայ զի անցի զբանիւ Տեառն եւ զբանիւ քով, զի երկեայ ի ժողովրդենէն եւ լուայ ձայնի նոցա։ 25Եւ արդ բարձ զմեղս իմ, եւ դարձիր ընդ իս, եւ պագից երկիր Տեառն Աստուծոյ քում։ 26Եւ ասէ Սամուէլ ցՍաւուղ. Ոչ դարձայց ընդ քեզ. զի արհամարհեցեր զբանն Տեառն, եւ արհամարհեսցէ զքեզ Տէր չլինել թագաւոր ի վերայ Իսրայելի։ 27Եւ դարձոյց Սամուէլ զերեսս իւր ի գնալ, եւ բուռն եհար Սաւուղ զտտնոյ կրկնոցի նորա եւ պատառեաց զնա՝՝։ 28Եւ ասէ ցնա Սամուէլ. Պատառեաց Տէր զթագաւորութիւնդ ի ձեռաց քոց յԻսրայելէ այսօր, եւ տացէ զդա ընկերի քում լաւագունի քան զքեզ։ 29Եւ բաժանեսցի Իսրայէլ ընդ երկու. եւ ոչ դարձցի եւ ոչ զղջասցի Տէր.՝՝ զի ոչ եթէ իբրեւ զմարդ է ի զղջանալ. ինքնին սպառնասցի։՝՝ 30Եւ ասէ Սաւուղ. Մեղայ. այլ մեծարեա զիս առաջի ծերոց ժողովրդեան իմոյ, եւ առաջի Իսրայելի. եւ դարձիր ընդ իս, եւ երկիր պագից Տեառն Աստուծոյ քում։ 31Եւ դարձաւ Սամուէլ զկնի Սաւուղայ, եւ երկիր եպագ Տեառն։

32Եւ ասէ Սամուէլ. Մատուցէք առ իս զԱգագ թագաւորն Ամաղեկայ։ Եւ մատեաւ առ նա Ագագ դողալով. եւ ասէ Ագագ. Եթէ այսպէ՜ս դառն իցէ մահ՝՝։ 33Եւ ասէ Սամուէլ ցԱգագ. Զոր օրինակ որդեկոտոր արար սուր քո զկանայս, նոյնպէս որդեկոտոր լիցի ի կանանց մայր քո։ Եւ սպան Սամուէլ զԱգագ առաջի Տեառն ի Գաղգաղա։ 34Եւ գնաց Սամուէլ յԱրիմաթեմ, եւ Սաւուղ ել ի տուն իւր ի Գաբաա։ 35Եւ ոչ եւս յաւել Սամուէլ տեսանել զՍաւուղ մինչեւ յօր մահուան իւրոյ. զի սուգ ունէր Սամուէլ ի վերայ Սաւուղայ. եւ զղջացաւ Տէր զի թագաւորեցոյց զՍաւուղ ի վերայ Իսրայելի։