1Եւ եկին արք Կարիաթարիմայ, եւ հանին անտի զտապանակ ուխտին Տեառն, եւ տարան զնա ի տուն Ամինադաբայ որ ի բլրին. եւ զԵղիազար զորդի նորա սրբեցին պահել զտապանակ ուխտին Տեառն։ 2Եւ եղեւ յօրէ յորմէ հետէ էր տապանակն ի Կարիաթարիմ՝ բազմացան աւուրքն եւ եղեն ամք քսան. եւ հայեցաւ ամենայն տունն Իսրայելի զկնի Տեառն։ 3Եւ խօսեցաւ Սամուէլ ընդ ամենայն տանն Իսրայելի եւ ասէ. Թէ յամենայն սրտէ ձերմէ դարձեալ էք առ Տէր, ի բաց արարէք զաստուածսն օտարոտիս ի միջոյ ձերմէ եւ զանտառսն, եւ պատրաստեցէք զսիրտս ձեր առ Տէր, եւ ծառայեցէք նմա միայնոյ, եւ փրկեսցէ զձեզ ի ձեռաց այլազգեացն։ 4Եւ ի բաց արարին որդիքն Իսրայելի զԲահաղիմսն եւ զանտառսն Աստարովթայ՝՝, եւ ծառայեցին նմա միայնոյ։ 5Եւ ասէ Սամուէլ. Ժողովեցէք զամենայն Իսրայէլ ի Մասփա, եւ կացից յաղօթս վասն ձեր առ Տէր։ 6Եւ ժողովեցան ի Մասփա եւ հանին ջուր, եւ եհեղ յերկիր առաջի Տեառն. եւ պահեցին յաւուր յայնմիկ, եւ ասեն. Մեղաք առաջի Տեառն։ Եւ դատեցաւ Սամուէլ զորդիսն Իսրայելի ի Մասփա։

7Եւ լուան այլազգիքն եթէ ժողովեցան որդիքն Իսրայելի ի Մասփա, եւ ելին նախարարք այլազգեացն ի վերայ Իսրայելի. եւ լուան որդիքն Իսրայելի եւ երկեան յերեսաց այլազգեացն։ 8Եւ ասեն որդիքն Իսրայելի ցՍամուէլ. Մի՛ դադարեր ի գոչելոյ վասն մեր առ Տէր Աստուած քո, եւ փրկեսցէ զմեզ ի ձեռաց այլազգեացն։ 9Եւ ա՛ռ Սամուէլ գառն մի դիեցիկ, եւ եհան զնա ողջակէզ Տեառն հանդերձ ամենայն ժողովրդեամբն՝՝. եւ գոչեաց Սամուէլ առ Տէր վասն Իսրայելի, եւ լուաւ նմա Տէր։

10Եւ մինչդեռ մատուցանէր Սամուէլ զողջակէզն, մերձեցան այլազգիքն ի պատերազմ ի վերայ Իսրայելի. եւ որոտաց Տէր մեծաւ բարբառով յաւուր յայնմիկ ի վերայ այլազգեացն, եւ շփոթեցան եւ անկան առաջի Իսրայելի։ 11Եւ ելին արքն Իսրայելի ի Մասփաթ եւ հալածեցին զայլազգիսն, եւ հարին զնոսա մինչեւ ի ներքոյ Բեթքովրայ։ 12Եւ ա՛ռ Սամուէլ վէմ մի, եւ կանգնեաց ի մէջ Մասփայ եւ ի մէջ Բեթսանայ հնոյն՝՝. եւ կոչեաց զանուն նորա Աբենեզեր, վէմ օգնականի.՝՝ եւ ասէ. Մինչեւ ցայս վայր օգնեաց մեզ Տէր։ 13Եւ կորացոյց Տէր զայլազգիսն. եւ ոչ եւս յաւելին ելանել ի վերայ սահմանացն Իսրայելի. եւ եղեւ ձեռն Տեառն ի վերայ այլազգեացն զամենայն աւուրս Սամուելի։ 14Եւ դարձուցին զքաղաքսն զոր առին այլազգիքն յորդւոցն Իսրայելի, եւ ետուն զնոսա անդրէն Իսրայելի, յԱսկաղոնէ մինչեւ ցԳէթ. եւ զսահմանս Իսրայելի հանին՝՝ ի ձեռաց այլազգեացն. եւ էր խաղաղութիւն ի մէջ Իսրայելի եւ ի մէջ Ամովրհացւոցն։

15Եւ դատեաց Սամուէլ զԻսրայէլ զամենայն աւուրս կենաց իւրոց։ 16Երթայր ամ յամէ, եւ պատէր զԲեթէլ եւ զԳաղաադ եւ զՄասփա, եւ դատէր զԻսրայէլ յամենայն սրբեալսն յայնոսիկ։ 17Եւ դարձ իւր էր յԱրիմաթեմ, զի անդ էր տուն նորա. եւ անդ դատէր զԻսրայէլ, եւ շինեաց անդ սեղան Տեառն։