1Եւ եկն Ռոբովամ յԵրուսաղէմ, եւ ժողովեաց զՅուդաս եւ զԲենիամին հարեւր եւ ութսուն հազար երիտասարդաց որք առնէին պատերազմ, եւ տայր՝՝ պատերազմ ընդ Իսրայելի դարձուցանել զթագաւորութիւնն յինքն։ 2Եւ եղեւ բան Տեառն առ Սամէաս այրն Աստուծոյ եւ ասէ. 3Խօսեաց ընդ Ռոբովամայ որդւոյ Սողոմոնի եւ ընդ ամենայն Յուդայ եւ Բենիամինի՝ եւ ասասցես. 4Այսպէս ասէ Տէր. Մի՛ ելանէք եւ մի՛ պատերազմիք ընդ եղբարս ձեր, դարձցի իւրաքանչիւր ոք ի տուն իւր. վասն զի յինէն եղեւ բանդ այդ։ Եւ լուան բանին Տեառն, դարձան ոչ եւս երթալ ի վերայ Յերոբովամայ։

5Եւ բնակեաց Ռոբովամ յԵրուսաղէմ, եւ շինեաց քաղաքս պարսպաւորս ի Հրէաստանի. 6եւ շինեաց զԲեթղեհեմ եւ զԵտանի եւ զԹեկուա 7եւ զԲեթսուրա եւ զՍոկքով եւ զՈդողամ 8եւ զԳէթ եւ զՄարիսան եւ զԶիփ 9եւ զԱդովրայիմ եւ զԼաքիս եւ զԱզեկա եւ զՍարաա 10եւ զԱեղոն եւ զՔեբրոն որ էր Յուդայ եւ ի Բենիամին քաղաքս պարսպաւորս։ 11Եւ ամրացոյց զնոսա պարսպօք՝՝, եւ ետ ի նոսա իշխանս եւ համբարս կերակրոց՝ ձէթ եւ գինի. 12ըստ քաղաքաց վահանս եւ նիզակս, եւ զօրացոյց զնոսա յաճախութեամբ յոյժ. եւ էին նորա Յուդաս եւ Բենիամին։

13Եւ քահանայքն եւ Ղեւտացիքն որք էին յամենայն Իսրայելի, ժողովեցան առ նա յամենայն սահմանացն. 14(վասն զի թողին Ղեւտացիքն զբնակութիւնս կալուածոց իւրեանց, եւ գնացին առ Յուդայ եւ յԵրուսաղէմ. քանզի եհան զնոսա Յերոբովամ եւ որդիք նորա, ոչ եւս պաշտել զՏէր։ 15Եւ կացոյց իւր քուրմս բարձանցն եւ կռոցն՝՝ եւ սնոտւոցն, եւ երնջոցն զորս արար Յերոբովամ.) 16եւ եհան զնոսա ի ցեղիցն՝՝ Իսրայելի, որք ետուն զսիրտս իւրեանց խնդրել զՏէր Աստուած Իսրայելի, եւ եկին յԵրուսաղէմ զոհել Տեառն Աստուծոյ հարցն իւրեանց։ 17Եւ զօրացուցին զթագաւորութիւնն Յուդայ. եւ հզօրացաւ Ռոբովամ որդի Սողոմոնի ամս երիս. վասն զի գնաց ի ճանապարհս Դաւթի եւ Սողոմոնի զերիս ամս։

18Եւ ա՛ռ իւր Ռոբովամ կին զՄովղաթ դուստր Յերիմութայ որդւոյ Դաւթի, եւ զԱբիադ դուստր Եղիաբայ որդւոյ Յեսսեայ. 19եւ ծնան նմա որդիս զՅերում եւ զՍամարիա եւ զԶաամ։ 20Եւ յետ այսորիկ առ զՄաաքա դուստր Աբիսողոմայ, եւ ծնաւ նմա զԱբիա եւ զԵթթի եւ զԻզա եւ զՍաղեմովթ։ 21Եւ սիրեաց Ռոբովամ զՄաաքա դուստր Աբիսողոմայ քան զամենայն կանայս իւր եւ զհարճս իւր. վասն զի կանայս ունէր ութուտասն եւ հարճս վաթսուն, եւ ծնաւ ուստերս քսան եւ ութ եւ դստերս վաթսուն։ 22Եւ կացոյց իշխան Ռոբովամ զԱբիա որ էր ի Մաաքայ, իշխան ի վերայ եղբարցն իւրոց, վասն զի թագաւորեցուցանել խորհէր զնա։ 23Եւ աճեաց առաւել քան զամենայն որդիս նորա՝՝ յամենայն սահմանս Յուդայ եւ Բենիամինի, ի քաղաքսն ամուրս, եւ եդ ի նոսա կերակուր բազում յոյժ. եւ խնդրեաց բազմութիւն կանանց։