1Յութ եւ տասներորդի ամի թագաւորութեանն Յերոբովամայ թագաւորեաց Աբիա ի վերայ Յուդայ եւ Երուսաղեմի ամս երիս՝՝. 2եւ անուն մօր նորա Մաաքա դուստր Աբիսողոմայ՝՝. եւ էր պատերազմ ի մէջ Աբիայ եւ ի մէջ Յերոբովամայ։ 3Եւ կարգեցաւ Աբիա ի պատերազմին զօրաւոր մարտկօք չորեք հարեւր հազարօք արամբք զօրաւորօք. եւ Յերոբովամ ճակատեցաւ ընդդէմ նորա ի պատերազմին ութ հարեւր հազարօք զօրաւորօք պատերազմողաց զօրութեամբ։

4Եւ յարեաւ Աբիա ի լեռնէն Սոմորոնայ, որ էր ի լերինն Եփրեմի, եւ ասէ. Լուարուք, Յերոբովամ եւ ամենայն Իսրայէլ. 5ո՞չ է ձեր ճանաչել եթէ Տէր Աստուած Իսրայելի ետ զթագաւորութիւնն Իսրայելի յաւիտեան՝ Դաւթի՝՝ եւ որդւոց նորա ուխտ աղի։ 6Եւ յարեաւ Յերոբովամ որդի Նաբատայ՝ ծառայ Սողոմոնի որդւոյ Դաւթի, եւ ապստամբեաց ի տեռնէ իւրմէ. 7եւ ժողովեցան առ նա արք ժանտք, որդիք անօրէնք. եւ ընդդէմ եկաց Ռոբովամայ որդւոյ Սողոմոնի. եւ Ռոբովամ էր մանուկ եւ երկչոտ սրտիւ, եւ ոչ եկաց ընդդէմ նորա։ 8Եւ արդ դուք ասէք կալ հակառակ երեսաց թագաւորութեան Տեառն, որ է ի ձեռս որդւոց Դաւթի. եւ դուք բազում էք յոյժ, եւ ընդ ձեզ երինջքդ ոսկեղէնք զորս արար ձեզ Յերոբովամ յաստուածս։ 9Միթէ ո՞չ հանէք դուք զքահանայսն Տեառն զորդիսն Ահարոնի եւ զՂեւտացիսն, եւ արարէք ձեզ քուրմս ի ժողովրդենէ երկրիդ. ամենեքեան որ գային լնուլ զձեռս զուարակօք յարջառոց եւ եւթն խոյօք, եւ լինէր քուրմ չաստուածոցն։ 10Եւ մեք զՏէր Աստուած մեր ոչ թողաք, եւ քահանայքն նորա պաշտեն զՏէր, որդիք Ահարոնի եւ Ղեւտացիք, եւ հանապազորդեալքն ի նոցանէ՝՝ 11ծխեն խունկս Տեառն, եւ զողջակէզս՝ ընդ առաւօտս եւ ընդ երեկոյս, եւ զխունկսն խառնուածոյս. եւ հացքն առաջադրութեան ի վերայ սուրբ սեղանոյն, եւ աշտանակն ոսկեղէն եւ ճրագունքն վառեալք՝ յերեկորեայ լուցեալք. վասն զի պահեմք մեք զպահպանութիւնս Տեառն Աստուծոյ հարցն մերոց՝՝, եւ դուք թողէք զնա։ 12Եւ ահաւասիկ ընդ մեզ իշխան Տէր, եւ քահանայք նորա եւ փողք նշանակաց նշանակել ի մեզ. եւ դուք, որդիք Իսրայելի, պատերազմի՞ք ընդ Տեառն Աստուծոյ հարցն մերոց, եւ ոչ եւս՝՝ աջողեսցի ձեզ։

13Եւ Յերոբովամ դարձոյց զդարանակալսն գալ նմա զկնի կողմանէ՝՝, եւ եղեն առաջի Յուդայ, եւ դարանակալքն յետուստ։ 14Եւ դարձաւ Յուդաս, եւ ահա պատերազմն նոցա առաջի եւ զկնի. եւ գոչեցին առ Տէր, եւ քահանայքն հարին զփողսն, 15եւ գոչեցին արք Յուդայ. եւ եղեւ ի գոչել արանց Յուդայ եւ Տէր եհար զՅերոբովամ եւ զԻսրայէլ առաջի Աբիայ եւ Յուդայ։ 16Եւ փախեան որդիքն Իսրայելի յերեսաց Յուդայ, եւ մատնեաց զնոսա Տէր ի ձեռս նոցա։ 17Եւ եհար ի նոցանէ Աբիա եւ զօրն նորա հարուածս մեծամեծս, եւ անկան վիրաւորք յԻսրայելէ հինգ հազար՝՝ արք զօրաւորք։ 18Եւ նկուն եղեն որդիքն Իսրայելի յաւուր յայնմիկ, եւ զօրացան որդիքն Յուդայ. վասն զի յուսացան ի Տէր Աստուած հարցն իւրեանց։ 19Եւ հալածեաց Աբիա զՅերոբովամ, եւ ա՛ռ ի նմանէ քաղաքս, զԲեթէլ եւ զգեղս նորա, եւ զԱնա եւ զգեղս նորա, եւ զԵփրոն եւ զդստերս նորա, եւ զԲեա եւ զգեղս նորա՝՝։ 20Եւ ոչ եւս գոյր զօրութիւն Յերոբովամայ զամենայն աւուրս Աբիայ. եւ եհար զնա Տէր եւ վախճանեաց։

21Եւ զօրացաւ Աբիա, եւ ա՛ռ իւր կանայս չորեքտասան, եւ ծնաւ ուստերս քսան եւ երկուս եւ դստերս վեշտասան։ 22Եւ մնացեալ բանքն Աբիայ եւ գործք նորա եւ խօսք նորա, ահա գրեալ են ի գիրս մարգարէին Ադդովայ։