1Եւ յերեսներորդ ութերորդ ամի թագաւորութեանն Ասայի ել Բաաս արքայ Իսրայելի ի վերայ Յուդայ, եւ շինեաց զՌամա, ոչ տալով ելս Ասայի արքայի՝՝ Յուդայ։ 2Եւ ա՛ռ Ասա ոսկի եւ արծաթ ի գանձուց տանն Տեառն եւ ի տանէ թագաւորին, եւ առաքեաց առ որդին Ադերայ՝՝ արքայն Ասորւոց որ բնակէր ի Դամասկոս, եւ ասէ. 3Դիր ուխտ ի մէջ իմ եւ քո, եւ ի մէջ հօր իմոյ եւ հօր քո. ահաւադիկ առաքեցի քեզ արծաթ եւ ոսկի, եկ եւ մերժեա յինէն զԲաաս արքայ՝՝ Իսրայելի, եւ գնասցէ ի բաց յինէն։ 4Եւ լուաւ որդին Ադերայ արքայ Ասորւոց՝՝, եւ առաքեաց զիշխանս զօրացն իւրոց ի քաղաքսն Իսրայելի. եւ եհար զԱւոն եւ զԴան եւ զԱբելմային, եւ զամենայն շուրջ զգաւառաւն՝՝ Նեփթաղիմայ։ 5Եւ եղեւ իբրեւ լուաւ Բաաս, ի բաց արձակեաց՝ ոչ եւս շինել զՌամա. եւ դադարեաց գործն նորա՝՝։ 6Եւ Ասա արքայ ած զամենայն Յուդաս, եւ առ զքարինս Ռամայ եւ զփայտս նորա զոր շինեաց Բաաս, եւ շինեաց նոքօք զԳաբաա եւ զՄասփա։

7Ի ժամանակին յայնմ եկն Անանիաս մարգարէ առ Ասա արքայ Յուդայ եւ ասէ ցնա. Վասն զի յուսացար դու յարքայն Ասորեաց եւ ոչ յուսացար ի Տէր Աստուած քո, յաղագս այնորիկ ապրեցաւ զօր արքային Իսրայելի ի ձեռաց քոց։ 8Ո՞չ ապաքէն Եթէովպացիք եւ Լիբէացիք էին զօրք բազումք, համարձակութեամբ բազում հեծելովք յոյժ եկին՝՝, եւ ի յուսալն քո ի Տէր՝ մատնեաց զնոսա Տէր ի ձեռս քո. 9վասն զի աչք Տեառն հային յամենայն երկիր զօրացուցանել յամենայն լի սրտից զնա՝՝։ եւ արդ տգիտացար յայդմիկ. յայսմ հետէ եղիցի քեզ պատերազմ։ 10Եւ սրտմտեցաւ Ասա մարգարէին եւ եդ զնա ի բանտի. վասն զի բարկացաւ յաղագս այնորիկ. եւ ժանտացաւ Ասա ի ժողովուրդն՝՝ ի ժամանակին յայնմ։

11Եւ ահա բանք Ասայի առաջինք եւ վերջինք՝ գրեալ են ի գիրս թագաւորացն Յուդայ եւ Իսրայելի։ 12Եւ ախտացան Ասայի ոտք յերեսներորդի եւ յիններորդի ամի թագաւորութեանն իւրոյ, եւ յոյժ հիւանդացաւ. եւ ի հիւանդանալն իւրում ոչ խնդրեաց զՏէր, այլ խնդրեաց բժիշկս։ 13Եւ ննջեաց Ասա ընդ հարս իւր, եւ վախճանեցաւ ի քառասներորդի եւ յառաջնում ամի թագաւորութեանն իւրոյ։ 14Եւ թաղեցին զնա ի շիրմին զոր փորեաց իւր ի քաղաքին Դաւթի, եւ ընկողմանեցուցին զնա ի գահոյսն, եւ լցին խնկովք եւ ազգի ազգի իւղովք իւղեփեցաց, եւ արարին նմա յուղարկութիւն մեծ՝՝ յոյժ։