1Եւ ննջեաց Յովսափատ ընդ հարս իւր, եւ թաղեցաւ ընդ հարս իւր ի քաղաքի Դաւթի. եւ թագաւորեաց Յովրամ որդի նորա փոխանակ նորա։ 2Եւ նորա էին եղբարք՝ որդիք Յովսափատու վեց, Ազրիա եւ Յեքիէլ եւ Զաքարիաս եւ Միսայէլ եւ Սափատիաս եւ Ազարիու, ամենեքեան սոքա որդիք Յովսափատու արքայի Յուդայ։ 3Եւ ետ նոցա հայրն իւրեանց պարգեւս բազումս, արծաթ եւ ոսկի եւ զէնս, հանդերձ պարսպաւոր քաղաքօքն Յուդայ. եւ զթագաւորութիւնն ետ Յովրամայ, վասն զի նա էր անդրանիկ։ 4Եւ յարեաւ Յովրամ ի թագաւորութեանն իւրում եւ զօրացաւ, եւ սպան զամենեսեան զեղբարսն իւր սրով, եւ յիշխանացն Իսրայելի։

5Էր ինքն երեսուն եւ երկուց ամաց յորժամ եկաց ի թագաւորութեանն իւրում, եւ զութ ամ թագաւորեաց յԵրուսաղէմ։ 6Եւ գնաց ի ճանապարհս թագաւորացն Իսրայելի, որպէս արար տունն Աքաաբու. վասն զի դուստր Աքաաբու էր նորա կին, եւ արար չար առաջի Տեառն։ 7Եւ ոչ կամեցաւ Տէր սատակել զտունն Դաւթի վասն ուխտին զոր եդ ընդ Դաւթի. եւ որպէս ասացն ցնա՝ տալ նմա ճրագ եւ որդւոց նորա զամենայն աւուրս։

8Յաւուրսն յայնոսիկ ապստամբեաց Եդովմ ի Յուդայ, եւ թագաւորեցուցին ի վերայ իւրեանց թագաւոր։ 9Եւ գնաց Յովրամ հանդերձ իշխանօքն, եւ ամենայն երիվարք ընդ նմա. եւ եղեւ ի յառնելն նորա գիշերի, եհար Եդովմ զայնոսիկ՝՝ որ պատեցին զնա, եւ զիշխանս կառացն. եւ փախեաւ զօրն ի բնակութիւնս իւրեանց։՝՝ 10Եւ ի բաց եկաց Եդովմ ի ձեռանէ Յուդայ մինչեւ յօրս յայս. յայնժամ ապստամբեաց Ղոբնա ի ձեռանէ նորա ի ժամանակին յայնմիկ. վասն զի թողին զՏէր Աստուած հարցն իւրեանց՝՝։ 11Քանզի արար իւր բարձունս ի քաղաքսն Յուդայ, եւ պոռնկեցոյց զբնակիչսն Երուսաղեմի, եւ մոլորեցոյց զՅուդաս։ 12Եւ եկն նմա գիր յԵղիայէ մարգարէէ, եւ ասէ. Այսպէս ասէ Տէր Աստուած Դաւթի հօր քո. Փոխանակ զի ոչ գնացեր դու ի ճանապարհս Յովսափատու հօր քո, եւ ոչ ի ճանապարհս Ասայի արքայի Յուդայ, 13այլ գնացեր ի ճանապարհս թագաւորին Իսրայելի, եւ պոռնկեցուցեր զՅուդա եւ զբնակիչսն Երուսաղեմի, որպէս պոռնկեցաւ տունն Աքաաբու, եւ զեղբարս քո զորդիս հօր քո, զլաւագոյնսն քան զքեզ, սպաներ, 14եւ ահա Տէր հարցէ զքեզ հարուածովք մեծօք ի ժողովրդեան քում, եւ զորդիս քո եւ զկանայս քո եւ զամենայն ստացուածս քո. 15եւ դու չար հիւանդութեամբ եւ ախտիւ որովայնի հաշեսցիս, մինչեւ ելցէ որովայն քո հիւանդութեամբն հանդերձ՝ աւուրց յաւուրս։

16Եւ յարոյց Տէր ի վերայ Յովրամայ այլազգիս, եւ զԱրաբացիս եւ զմերձաւորսն Եթէովպացւոց. 17եւ ելին ի վերայ Յուդայ եւ հարստահարէին զնա. եւ դարձուցին զամենայն պատրաստութիւնն զոր գտին ի տան արքային, եւ զուստերս նորա եւ զդստերս նորա. եւ ոչ մնաց նմա որդի, բայց Ոքոզիաս միայն՝ կրտսերագոյն յորդիս նորա։

18Եւ յետ այսր ամենայնի եհար զնա Տէր ախտիւ որովայնի որոյ ոչ գոյր բժշկութիւն։ 19Եւ եղեւ աւուրց յաւուրս, իբրեւ եկն ժամանակ աւուրցն նորա, յերկուս աւուրս ել որովայն նորա հանդերձ ախտիւն՝՝, եւ մեռաւ ի չար հիւանդութեանն յայնմիկ. եւ ոչ արար նմա ժողովուրդն յուղարկութիւն, իբրեւ զյուղարկաւորութիւն հարցն նորա։ 20Էր ամաց երեսուն եւ երկուց յորժամ թագաւորեաց, եւ զութ ամ թագաւորեաց յԵրուսաղէմ. եւ մեռաւ ոչ գովութեամբ, եւ թաղեցաւ ի քաղաքին Դաւթի, եւ ոչ ի գերեզմանս թագաւորացն։