1Որդի քսան եւ հինգ ամաց էր Յովաթամ ի թագաւորելն իւրում, եւ վեշտասան ամ թագաւորեաց յԵրուսաղէմ. եւ անուն մօր նորա Յերուսայ դուստր Սադովկայ։ 2Եւ արար ուղղութիւն առաջի Տեառն ըստ ամենայնի զոր ինչ արար Ոզիաս հայրն նորա. բայց ոչ եմուտ ի տաճարն Տեառն. եւ տակաւին եւս ժողովուրդն ապականեալ էր։ 3Նա շինեաց զդուռն տանն Տեառն զբարձր, եւ ի պարսպին Ոփղայ շինեաց բազումս։ 4Եւ քաղաքս շինեաց ի լերինն Յուդայ, եւ յանտառս բնակութիւնս եւ աշտարակս։ 5Նա կռուեցաւ ընդ արքայի որդւոց Ամոնայ, եւ զօրացաւ ի վերայ նոցա. եւ տային նմա որդիքն Ամոնայ ի միում տարւոջ հարեւր տաղանդ արծաթոյ, եւ տասն հազար քոռ ցորենոյ, եւ գարի՝ տասն հազար քոռ. բերէր զայն նմա արքայն Ամոնայ ամի ամի. եւ յառաջնում ամին եւ յերկրորդին եւ յերրորդին՝՝։ 6Եւ զօրացաւ Յովաթամ, վասն զի պատրաստեաց զճանապարհս իւր առաջի Տեառն Աստուծոյ իւրոյ։

7Եւ մնացեալ բանքն Յովաթամայ եւ պատերազմն նորա եւ մարտք իւր՝՝ ահա գրեալ են ի գիրս թագաւորացն Յուդայ եւ Իսրայելի։ 8Քսան եւ հինգ ամաց էր յորժամ թագաւորեաց, եւ վեշտասան ամ թագաւորեաց յԵրուսաղէմ։ 9Եւ ննջեաց Յովամաթ ընդ հարս իւր, եւ թաղեցաւ ի քաղաքին Դաւթի, եւ թագաւորեաց Աքազ որդի նորա փոխանակ նորա։