1Որդի քսան ամաց էր Աքազ ի թագաւորելն իւրում, եւ վեշտասան ամ թագաւորեաց յԵրուսաղէմ. եւ ոչ արար ուղղութիւն առաջի Տեառն իբրեւ զԴաւիթ զհայր իւր։ 2Եւ գնաց ըստ ճանապարհաց թագաւորացն Իսրայելի. քանզի արար դրօշեալս. 3եւ կռոց նոցա զոհէր յերկրին Բենոմայ՝՝, եւ անցուցանէր զորդիս իւր ընդ հուր, ըստ գարշութեան ազգացն զորս սատակեաց Տէր յերեսաց որդւոցն Իսրայելի. 4եւ ծխէր խունկս ի վերայ բարձանց եւ ի վերայ տանեաց եւ ի ներքոյ ամենայն վարսաւոր ծառոց։

5Եւ մատնեաց զնա Տէր Աստուած նորա ի ձեռս արքային Ասորեաց, եւ եհար զնա, եւ գերեաց ի նոցանէ գերութիւն բազում, եւ տարաւ ի Դամասկոս. եւ ի ձեռս արքային Իսրայելի մատնեաց զնա, եւ եհար զնա հարուածս մեծամեծս։ 6Եւ կոտորեաց Փակէէ որդի Ռովմելայ արքայ Իսրայելի՝՝ ի Յուդայ ի միում աւուր հարեւր եւ քսան հազար արանց զօրաւորաց զօրութեամբ, ի թողուլն նոցա զՏէր Աստուած հարցն իւրեանց։ 7Եւ սպան Զեքրի զօրաւորն Եփրեմի զԱմասիաս զորդի արքային, եւ զԵզրիկամ իշխան տան նորա, եւ զԵղկանա զփոխանորդ արքային։ 8Եւ գերեցին որդիքն Իսրայելի յեղբարցն իւրեանց երեք հարեւր՝՝ հազար կանայս, եւ ուստերս եւ դստերս, եւ աւար բազում առին ի նոցանէ. եւ տարան զաւարն ի Սամարիա։

9Եւ էր անդ մարգարէ Տեառն, Ովդեդ անուն նորա. ել նա ընդ առաջ զօրուն եկելոյ ի Սամարիա, եւ ասէ ցնոսա. Ահա բարկութիւն Տեառն Աստուծոյ հարցն ձերոց եղեւ ի վերայ Յուդայ, եւ մատնեաց զնոսա ի ձեռս ձեր, եւ կոտորեցէք զնոսա բարկութեամբ, եւ մինչեւ յերկինս ժամանեաց։ 10Եւ արդ զորդիսդ Յուդայ եւ զԵրուսաղեմի, դուք ասէք ստանալ ի ծառայս եւ յաղախնայս. ո՞չ ապաքէն աւասիկ եմ ընդ ձեզ, վկայ լինել՝՝ Տեառն Աստուծոյ ձերում։ 11Եւ արդ լուարուք ինձ, եւ դարձուցէք անդրէն զգերութիւնդ զորս գերեցէք դուք յեղբարց ձերոց. վասն զի բարկութիւն սրտմտութեան Տեառն լինի ի վերայ ձեր։ 12Եւ յարեան իշխանք որդւոցն Եփրեմի, Ազարիաս որդի Յովնանայ, եւ Բարաքիաս որդի Մոսոքղոմովթայ, եւ Եզեկիաս որդի Սեղումայ, եւ Ամեսայի որդի Ադղիայ ի վերայ եկելոցն ի պատերազմէն, 13եւ ասեն ցնոսա. Մի՛ ածէք զգերութիւնդ զայդ այսր առ մեզ. վասն զի մեղանչել մեզ առ Տէր դուք առնէք, եւ յաւելուլ ի մեղսն մեր եւ ի տգիտութիւնս. քանզի բազում են մեղք մեր այդոքիկ, եւ բարկութիւն սրտմտութեան Տեառն լինի ի վերայ Իսրայելի։ 14Եւ թողին պատերազմողքն զգերութիւնն եւ զաւարն առաջի իշխանացն եւ ամենայն եկեղեցւոյն։ 15Եւ յարեան ամենայն արք որ կոչեցան յանուանէ, եւ խնամակալութիւնս արարին գերութեանն. զամենեսեան զմերկսն զգեցուցին յաւարէն, եւ ագուցին նոցա կօշիկս, եւ ետուն ուտել՝՝, եւ օծին իւղով. եւ առին գրաստուք զամենայն տկարս, եւ տարան զնոսա յԵրիքով քաղաք Արմաւենեաց առ եղբարսն իւրեանց, եւ ինքեանք դարձան ի Սամարիա։

16Ի ժամանակին յայնմիկ առաքեաց Աքազ առ արքայն Ասորեաց՝՝ օգնել նմա. 17վասն զի Եդովմայեցիքն յարձակեցան ի վերայ, եւ հարին զՅուդա եւ գերեցին գերութիւն։ 18Եւ այլազգիքն դիմեցին ի քաղաքս դաշտին, եւ Լիբէացիքն եկին ի Յուդայ՝՝ եւ առին զԲեթսամիւս եւ զԱյեղոն եւ զԳադերովթ եւ զՍոկքով եւ զգեղս նորա, եւ զԹամնա եւ զգեղս նորա, եւ զԳամեզեր եւ զգեղս նորա, եւ բնակեցին անդ։ 19Վասն զի նկուն արար Տէր զՅուդա յաղագս Աքազու արքայի Յուդայ, զի՝՝ ի բաց եկաց ապստամբութեամբ ի Տեառնէ։ 20Եւ եկն ի վերայ նորա Թագղաթփաղասար արքայ Ասորեստանեայց, եւ եհար զնա։ 21Եւ՝՝ առ Աքազ զոր ինչ էր ի տանն Տեառն եւ ի տան թագաւորին եւ իշխանացն, եւ ետ արքային Ասորեստանեայց, եւ ոչ էր օգնականութիւն ինչ նոցա, 22այլ նեղել զնոսա. եւ՝՝ յաւել եւս ի բաց կալ ի Տեառնէ, 23եւ ասաց արքայն. Խնդրեցից զաստուածս Դամասկոսի որք հարին զիս. եւ ասէ. Եթէ աստուածք թագաւորին Ասորեստանեայց նոքա են զօրաւորք՝՝, նոցա այսուհետեւ զոհեցից եւ օգնեսցեն ինձ. եւ նոքա եղեն նմա խոչ եւ ամենայն Իսրայելի։ 24Եւ ի բաց արար՝՝ Աքազ զսպաս տանն Տեառն, կոտորեաց զայն՝՝ եւ փակեաց զդրունս տանն Տեառն. եւ արար իւր սեղան յամենայն անկիւնսն Երուսաղեմի։ 25Եւ յամենայն քաղաքսն Յուդայ արարին բարձունս, ծխել խունկս աստուածոց օտարաց, եւ բարկացուցին զՏէր Աստուած հարցն իւրեանց։

26Եւ մնացեալ բանքն նորա առաջինք եւ վերջինք՝ ահա գրեալ են ի գիրս բանից թագաւորացն Յուդայ եւ Իսրայելի։ 27Եւ ննջեաց Աքազ ընդ հարս իւր, եւ թաղեցաւ ի քաղաքին Դաւթի. վասն զի ոչ մուծին զնա ի գերեզմանս թագաւորացն. եւ թագաւորեաց Եզեկիաս փոխանակ նորա։