1Եւ էր Եզեկիաս ի թագաւորելն իւրում քսան եւ հինգ ամաց, եւ ամս քսան եւ ինն թագաւորեաց յԵրուսաղէմ. եւ անուն մօր նորա Աբիա դուստր Զաքարեայ։ 2Եւ արար ուղղութիւն առաջի Տեառն՝ ըստ ամենայնի զոր ինչ արար Դաւիթ հայրն նորա։

3Եւ եղեւ իբրեւ եկաց ի թագաւորութեանն իւրում՝՝, յառաջնում ամսեանն եբաց զդրունս տանն Տեառն, եւ կազմեաց զնոսա։ 4Եւ տարաւ ի ներքս զքահանայսն եւ զՂեւտացիս, եւ կացոյց զնոսա ի կողմն արեւելից։ 5Եւ ասէ ցնոսա. Լուարուք, Ղեւտացիք. այսուհետեւ սրբեցարուք, եւ սրբեցէք զտունն Տեառն Աստուծոյ հարցն ձերոց, եւ ի բաց հանէք զպղծութիւնսն ի սրբութեանցն. 6վասն զի ապստամբեցին հարքն մեր, եւ արարին չար առաջի Տեառն, եւ թողին զնա եւ դարձուցին զերեսս ի խորանէն Տեառն, եւ ընդվզեցան. 7եւ փակեցին զդրունս տաճարին, եւ շիջուցին զճրագունսն, եւ խունկս ոչ ծխեցին նմա, եւ ոչ ողջակէզս մատուցին սրբոյն Աստուծոյ Իսրայելի։ 8Եւ բարկացաւ սրտմտութեամբ Տէր ի վերայ Յուդայ եւ Երուսաղեմի, եւ ետ զնոսա ի յիմարութիւն եւ յապականութիւն եւ ի շըչիւն, որպէս դուք տեսանէք աչօք ձերովք։ 9Եւ ահա վիրաւորեցան հարքն մեր սուսերօք, եւ ուստերք ձեր եւ դստերք ձեր եւ կանայք ձեր են ի գերութեան յերկրի ոչ իւրեանց, ուր ենն այժմ՝՝։ 10Եւ այսուհետեւ լիցի ի սիրտս մեր՝՝ դնել ուխտ Տեառն Աստուծոյ Իսրայելի, եւ դարձուսցէ զսրտմտութիւն բարկութեան իւրոյ ի մէնջ։ 11Արդ մի՛ ինչ նուազէք առնել յայսմ հետէ՝՝. վասն զի զձեզ ընտրեաց Տէր կալ եւ պաշտել առաջի իւր, եւ լինել նմա սպասաւոր, եւ ծխել խունկս։

12Եւ յարեան Ղեւտացիքն՝ Մայէթ որդի Ամասեայ եւ Յովէլ որդի Ազարեայ, յորդւոցն Կահաթու եւ յորդւոցն Մերարեայ, Կիս որդի Աբդիայ եւ Ազարիաս որդի Յելելայ, եւ յորդւոցն Գերսոնի՝ Յովա որդի Զեմաթայ եւ Յովադան որդի Յովաքայ, 13եւ յորդւոցն Եղիսափանայ՝ Սամարի եւ Յէիէլ, եւ յորդւոցն Ասափայ՝ Զաքարիաս եւ Մատթանիաս, 14եւ յորդւոցն Եմանայ՝ Յէքիէլ եւ Սեմէի, եւ յորդւոցն Իդիթունայ՝ Սամիաս եւ Ոզիէլ։ 15Եւ ժողովեցին զեղբարսն իւրեանց, եւ սրբեցան ինքեանք՝՝ ըստ պատուիրանի թագաւորին հրամանաւ Տեառն, սրբել զտունն Տեառն։ 16Եւ մտին քահանայքն ի տունն Տեառն սրբել զնա, եւ հանին արտաքս զամենայն աղտեղութիւնս որք գտան ի տանն Տեառն եւ ի սրահի՝՝ տանն Տեառն. եւ առին Ղեւտացիքն հանել զայն ի հեղեղատն Կեդրոնի արտաքս։ 17Եւ սկսան յաւուրն առաջնում յամսամտի առաջնոյ ամսոյն սրբել զնա. եւ որ օր ութ էր ամսոյն՝ մտին ի տաճարն Տեառն, եւ սրբեցին զտունն Տեառն յաւուրս ութ, եւ յաւուրն վեշտասաներորդի ամսոյն առաջնոյ կատարեցին։ 18Եւ մտին ի ներքս առ Եզեկիաս արքայ եւ ասեն. Սրբեցաք զամենայն որ ինչ էր ի տանն Տեառն, զսեղան ողջակիզացն եւ զսպասն նորա, զսեղանն առաջադրութեան եւ զսպասն իւր, 19եւ զամենայն կահն զոր պղծեաց թագաւորն Աքազ յիւրում թագաւորութեանն եւ յապստամբութեանն իւրում, պատրաստեցաք եւ սրբեցաք, եւ ահա է առաջի սեղանոյն Տեառն։

20Եւ կանխեաց Եզեկիաս արքայ՝ ժողովեաց զիշխանս քաղաքին, եւ ել ի տուն Տեառն. 21եւ եհան զուարակս եւթն եւ խոյս եւթն եւ որոջս եւթն եւ նոխազս այծեաց եւթն՝ վասն մեղաց թագաւորութեանն եւ վասն սրբութեանցն եւ Իսրայելի. եւ ասէ ցորդիսն Ահարոնի ցքահանայս. Մատերուք առ սեղանն Տեառն։ 22Եւ զենէք զզուարակսն։ Եւ ընկալան քահանայքն զարիւնն, եւ հեղին զնա առ սեղանովն. եւ զենին զխոյսն, եւ հեղին զարիւնն առ սեղանովն. եւ զենին զորոջսն, եւ հեղին զարիւնն առ սեղանովն։ 23Եւ մատուցին զնոխազսն զվասն մեղացն առաջի արքային եւ ժողովրդեանն, եւ եդին զձեռս իւրեանց ի վերայ նոցա։ 24Եւ զենին զնոսա քահանայքն, եւ քաւեցին զարիւնն նոցա առ սեղանովն, եւ արարին քաւութիւնս ամենայն Իսրայելի, զի յաղագս ամենայն Իսրայելի ասաց թագաւորն զողջակէզսն եւ զվասն մեղացն առնել։ 25Եւ կացուցին զՂեւտացիսն ի տանն Տեառն՝ ծնծղայիւք եւ տաւղօք եւ քնարօք, ըստ պատուիրանին Դաւթայ արքայի, եւ Գադայ տեսանողի թագաւորին եւ Նաթանայ մարգարէի. վասն զի պատուիրանաւ Տեառն էր հրամանն ի ձեռն մարգարէիցն։ 26Եւ կացին Ղեւտացիքն նուագարանօքն Դաւթայ, եւ քահանայքն փողովքն։ 27Եւ ասաց Եզեկիա հանել զողջակէզսն ի վերայ սեղանոյն. եւ իբրեւ սկսան հանել զողջակէզսն, սկսան երգել Տեառն փողովքն եւ նուագարանօքն Դաւթայ արքայի Իսրայելի։ 28Եւ ամենայն եկեղեցին երկիր պագանէր, եւ սաղմոսանուագքն երգէին, եւ հարկանէին զփողսն մինչեւ կատարեցան ողջակէզքն։ 29Եւ իբրեւ կատարեցին մատուցանել, խոնարհեցաւ թագաւորն եւ ամենայն քահանայքն եւ երկիր պագին։ 30Եւ ասաց արքայ Եզեկիաս եւ իշխանքն ցՂեւտացիսն օրհնել զՏէր բանիւքն Դաւթի եւ Ասափայ մարգարէի. եւ օրհնէին ուրախութեամբ, եւ անկան ի վերայ երեսաց եւ երկիր պագին։ 31Պատասխանի ետ Եզեկիաս եւ ասէ. Այժմ լցէք զձեռս ձեր Տեառն, մերձեցարուք այսուհետեւ եւ բերէք ի տուն Տեառն։ Եւ եբեր եկեղեցին պատարագս օրհնութեան, եւ ամենայն որ ոք յօժարեալ էր սրտիւ՝ ողջակէզս։ 32Եւ եղեւ թիւ ողջակիզին զոր մատոյց եկեղեցին, զուարակք եւթանասուն, խոյք հարեւր, որոջք երկերիւր. յողջակէզսն Տեառն ամենեքեան այնոքիկ։ 33Եւ որք նուիրեցանն, զուարակք վեց հարեւր, ոչխարք երեք հազար։ 34Այլ քահանայքն էին սակաւք եւ ոչ կարէին զենուլ զողջակէզսն, եւ օգնէին նոցա եղբարքն իւրեանց Ղեւտացիքն՝ մինչեւ կատարեցաւ գործն եւ մինչեւ սրբեցան քահանայքն. վասն զի Ղեւտացիքն յօժարութեամբ սրբեցան քան զքահանայսն. 35եւ ողջակէզքն էին բազումք ի ճարպս կատարմանն եւ ի փրկութիւնսն՝՝ եւ ի նուէրս ողջակիզացն. եւ յօրինեցաւ գործն ի տանն Տեառն։ 36Եւ ուրախ եղեւ Եզեկիաս եւ ամենայն ժողովուրդն վասն պատրաստելոյ զսպասն Աստուծոյ՝՝ ժողովրդեանն. քանզի յանկարծակի եղեւ բանն։