1Եւ սկսաւ Սողոմոն շինել զտունն Տեառն յԵրուսաղէմ, ի լերինս Ամովրհացւոցն՝՝, ուր երեւեցաւ Տէր Դաւթի հօր նորա, ի տեղւոջն յորում պատրաստեաց Դաւիթ, ի կալն Ոռնայ Յեբուսացւոյ։ 2Եւ սկսաւ շինել յամսեանն երկրորդի, յամին չորրորդի թագաւորութեանն իւրոյ. 3եւ սկսաւ Սողոմոն՝՝ շինել զտունն Աստուծոյ. երկայնութիւն չափոյ առաջնոյն ի վաթսուն կանգնոյ, եւ լայնութիւն ի քսան կանգնոյ։ 4Եւ էղամ դէմ յանդիման տանն, երկայնութիւնն առաջին՝ եւ լայնութիւն՝՝ տանն կանգնոց քսանից, եւ բարձրութիւն հարեւր եւ քսան կանգնոյ. եւ պատեաց զնա ոսկւով սրբով ի ներքուստ։ 5Եւ զտունն մեծ դրուագեաց մայր փայտիւք, եւ պատեաց ոսկւով սրբով, եւ քանդակեաց ի նմա արմաւենիս եւ շղթայագործս։ 6Եւ զարդարեաց զտունն ակամբք պատուականօք ի փառս. եւ ոսկւով սրբով ի Սեփարուիմայ՝՝։ 7Եւ պատեաց զտունն ոսկւով, եւ զորմսն եւ զդրունսն եւ զձեղունն եւ զդուրս, եւ քանդակեաց քերովբէս յորմսն։

8Եւ արար զտունն սրբութեան սրբութեանցն, զերկայնութիւն նորա առաջոյ կողմանէ՝՝ ի քսան կանգնոյ, եւ զլայնութիւնն ի քսան կանգնոյ, եւ պատեաց զնա մաքուր ոսկւով ի քերովբէս վեց հարեւր տաղանդով։ 9Եւ կշիռ բեւեռացն միոյ միոյ կշռութիւն յիսուն սիկղ ոսկւոյ. եւ զվերնատունն պատեաց ոսկւով։ 10Եւ արար ի տան սրբութեան սրբութեանցն քերովբէս երկուս գործ. եւ պատեաց զնոսա ոսկւով. 11եւ թեւք քերովբէիցն՝ երկայնութիւն քսան կանգուն. թեւ մի ի հինգ կանգնոյ կցեալ յորմս տանն, եւ թեւն մեւս ի հինգ կանգնոյ՝ կցեալ ի թեւ քերովբէին միւսոյ. 12եւ թեւն քերովբէին միւսոյ ի հինգ կանգնոյ կցեալ յորմս տանն, եւ մեւս թեւն ի հինգ կանգնոյ կցեալ ի թեւ քերովբէին միւսոյ։ 13Եւ թեւք քերովբէիցն տարածեալք ի քսան կանգնոյ. եւ ինքեանք կային ի վերայ ոտից իւրեանց, եւ դէմք նոցա ի տունն։

14Եւ արար զվարագոյրն ի կապուտակէ եւ ի ծիրանւոյ, ի կարմրոյ եւ ի բեհեզոյ, եւ անկանէր ի նմա քերովբէս։

15Եւ արար առաջի տանն սիւնս երկու յերեսուն եւ հինգ կանգնոյ բարձրութիւն, եւ զխոյակս նոցա ի հինգ կանգնոյ։ 16Եւ արար վանդակապատ ի դաբիրայն, եւ եդ ի վերայ գլխոյ սեանցն. եւ արար նռնաձեւս հարեւր, եւ եդ ի վերայ շղթայագործացն։ 17Եւ կանգնեաց զսիւնսն առաջի տաճարին, զմին յաջմէ եւ զմեւսն յահեկէ. եւ կոչեաց զանուն այնորիկ որ յաջմէն էր՝ Ուղղութիւն, եւ զանուն այնորիկ որ ի ձախմէն էր՝ Զօրութիւն։