1Եւ յետ բանիցս այսոցիկ՝ եւ ճշմարտութեանս այսորիկ եկն Սենեքերիմ արքայ Ասորեստանեայց ի վերայ Յուդայ, եւ բանակեցաւ զպարսպաւոր քաղաքօքն, եւ ասէր առնուլ զնոսա։ 2Եւ ետես Եզեկիաս թէ եկն Սենեքերիմ դէմ յանդիման նորա պատերազմել ընդ Երուսաղեմի, 3խորհեցաւ ընդ ծերսն եւ ընդ զօրաւորսն խնուլ զջուրս աղբերացն որք էին արտաքոյ քաղաքին, եւ խցին զնոսա։ 4Եւ գումարեաց ժողովուրդ բազում, եւ խցին զջուրս աղբերցն, եւ զգետն որ բաժանէր անցանելով ընդ մէջ քաղաքին, եւ ասեն. Մի՛ գուցէ եկեալ արքայն Ասորեստանի գտցէ ջուր բազում եւ զօրասցի՝՝։ 5Եւ հզօրացաւ Եզեկիաս, եւ շինեաց զամենայն պարիսպս կործանեալս եւ զաշտարակս, եւ արտաքոյ զառաջին պարիսպսն եւ զմեւսն եւս՝՝. եւ զօրացոյց զպատուարսն քաղաքին Դաւթի, եւ կազմեաց զէնս բազումս։ 6Եւ արար իշխանս պատերազմի ի վերայ զօրուն, եւ ժողովեցան առ նա ի հրապարակ ձորոյն՝՝. խօսեցաւ ի սիրտս նոցա եւ ասէ. 7Զօրացարուք եւ քաջ լերուք, մի՛ երկնչիք յերեսաց թագաւորին Ասորեստանեայց, եւ մի՛ յերեսաց ամենայն ազգացն որ ընդ նմա. վասն զի ընդ մեզ բազումք են քան ընդ նմա։ 8Ընդ նմա բազուկք մարմնեղէնք, եւ ընդ մեզ Տէր Աստուած մեր՝ ապրեցուցանել զմեզ, եւ պատերազմել զպատերազմ մեր։ Եւ քաջալերեցաւ ժողովուրդն բանիւքն Եզեկեայ արքայի Յուդայ։

9Եւ յետ այսորիկ առաքեաց Սինեքերիմ արքայ Ասորեստանեայց զծառայս իւր յԵրուսաղէմ, եւ ինքն էր ի Լաքիս, եւ ամենայն զօրք ընդ նմա. եւ առաքեաց առ Եզեկիա արքայ Յուդայ յԵրուսաղէմ, եւ ասէ. 10Այսպէս ասէ Սենեքերիմ արքայ Ասորեստանեայց. Յո՞ դուք յուսացեալ նստիք յամրոցդ Երուսաղեմի. 11ո՞չ ապաքէն Եզեկիաս խաբէ զձեզ, մատնել զձեզ ի մահ, ի սով եւ ի ծարաւ. եւ ասէ. Տէր Աստուած մեր փրկեսցէ զմեզ ի ձեռաց արքայի Ասորեստանեայց։ 12Ո՞չ այդ Եզեկիաս է, որ քակեաց զսեղանս նորա եւ զբարձունս նորա, եւ ասաց ցՅուդայ եւ ցբնակիչսն Երուսաղեմի. Առաջի սեղանոյս այսորիկ միայն երկիր պագէք, եւ ի վերայ սորա զոհեցէք։ 13Ո՞չ գիտացէք զինչ արարի ես եւ հարքն իմ ամենայն ժողովրդոց եւ գաւառաց. միթէ կարելով կարացի՞ն աստուածք ազգաց ամենայն երկրի փրկել զժողովուրդ իւրեանց ի ձեռաց իմոց։ 14Զո՞ ոք յամենայն աստուածոց ազգացն այնոցիկ ոչ սատակեցին հարքն իմ. միթէ կարացի՞ն ապրեցուցանել զժողովուրդ իւրեանց ի ձեռաց իմոց. եւ զիա՞րդ կարասցէ Աստուածդ ձեր փրկել զձեզ ի ձեռաց իմոց։ 15Արդ մի՛ խաբեսցէ զձեզ Եզեկիաս, եւ մի՛ յուսացուսցէ զձեզ յայդ. մի՛ հաւատայք դմա. վասն զի ոչ կարացին աստուածք ամենայն ազգաց եւ թագաւորութեանց ապրեցուցանել զժողովուրդս իւրեանց ի ձեռաց իմոց եւ ի ձեռաց հարցն իմոց. եւ Աստուածդ ձեր ոչ փրկէ զձեզ ի ձեռաց իմոց։ 16Եւ այլ եւս խօսեցան ծառայք նորա ի Տէր Աստուած եւ յԵզեկիաս ծառայ նորա։ 17Եւ թուղթ գրեաց թշնամանել զՏէր Աստուած Իսրայելի, եւ ասաց յաղագս նորա. Զոր օրինակ աստուածք ազգաց երկրի ոչ փրկեցին զժողովուրդս իւրեանց ի ձեռաց իմոց, նոյնպէս եւ Աստուածդ Եզեկեայ զժողովուրդ իւր ոչ ապրեցուսցէ ի ձեռաց իմոց։ 18Եւ գոչեաց մեծաձայն Հրէարէն առ ժողովուրդն Երուսաղեմի որ էր ի վերայ պարսպին, օգնական լինել ինքեանց եւ կործանել զպարիսպն, զի վաղվաղակի՝՝ առցեն զքաղաքն։ 19Եւ խօսեցան յԱստուածն Երուսաղեմի որպէս յաստուածս ժողովրդոց երկրի, ի գործս ձեռաց մարդկան։

20Եւ յաղօթս կացին Եզեկիաս արքայ եւ Եսայիաս որդի Ամովսայ մարգարէ՝ յաղագս այնորիկ եւ գոչեցին յերկինս։ 21Եւ առաքեաց Տէր հրեշտակ, եւ սատակեաց զամենայն զօրաւոր եւ պատերազմող, զիշխան եւ զզօրագլուխ ի բանակի արքային Ասորեստանեայց. եւ դարձոյց զերեսս իւր ամօթով յերկիրն իւր, եւ չոգաւ ի տուն աստուածոյն իւրոյ. եւ որք ելեալ էին յորովայնէ նորա՝ ընկեցին զնա անդ սրով։ 22Եւ ապրեցոյց Տէր զԵզեկիաս եւ զբնակիչս Երուսաղեմի ի ձեռաց Սենեքերիմայ արքային Ասորեստանեայց եւ ի ձեռաց ամենեցունց. եւ հանգոյց զնոսա շուրջանակի։ 23Եւ բազումք բերէին պատարագս Տեառն յԵրուսաղէմ, եւ ընծայս Եզեկեայ արքայի Յուդայ. եւ ամբարձաւ առաջի աչաց ամենայն ազգաց յետ այսորիկ։

24Յաւուրսն յայնոսիկ հիւանդացաւ Եզեկիաս մերձ ի մահ. եւ յաղօթս եկաց առ Տէր, եւ լուաւ նմա եւ ետ նմա նշան։ 25Եւ ոչ ըստ հատուցմանն զոր ետ նմա Աստուած՝ հատոյց անդրէն Եզեկիաս, այլ բարձրացաւ սիրտ նորա. եւ եղեւ ի վերայ նորա բարկութիւն, եւ ի վերայ Յուդայ եւ Երուսաղեմի։ 26Եւ խոնարհեցաւ Եզեկիաս ի բարձրութենէ սրտին իւրոյ եւ բնակիչքն Երուսաղեմի, եւ ոչ եկն ի վերայ նոցա բարկութիւն Տեառն յաւուրս Եզեկեայ։

27Եւ եղեւ Եզեկեայ մեծութիւն եւ փառք բազում յոյժ. եւ արար իւր գանձս ոսկւոյ եւ արծաթոյ եւ ականց պատուականաց, եւ խունկս եւ զէնս եւ անօթս ցանկալիս։ 28Եւ քաղաքս յարմտիս ցորենոյ եւ գինւոյ եւ ձիթոյ, եւ գեղս եւ կայանս ամենայն անասնոց եւ գոմս հօտից։ 29Եւ քաղաքս զոր շինեաց իւր, եւ պատրաստութիւն խաշանց եւ արջառոց բազում. վասն զի ետ նմա Տէր ստացուածս բազումս յոյժ։ 30Ինքն Եզեկիաս եխից զելս ջրոցն Գեհոնի զվերին, եւ ուղղեաց զնա խոնարհագոյն յարեւմուտս կողմն քաղաքին Դաւթի. եւ յաջողեցաւ Եզեկիա յամենայն ի գործսն իւր։

31Եւ այսպէս արար հրեշտակաց իշխանաց որք ի Բաբելոնէ առաքեցան առ նա հարցանել վասն նորա եւ՝՝ նշանաց որ եղեն ի վերայ երկրի. եւ եթող զնա Տէր փորձել զնա եւ գիտել թէ զի՞նչ է ի սրտի նորա։

32Եւ մնացեալ բանքն Եզեկեայ եւ ողորմութիւն նորա ահա գրեալ է ի մարգարէութեանն Եսայեայ որդւոյ Ամովսայ մարգարէի, եւ ի գիրս թագաւորացն Յուդայ եւ Իսրայելի։ 33Եւ ննջեաց Եզեկիաս ընդ հարս իւր եւ թաղեցին զնա ի բարձաւանդակի գերեզմանաց որդւոցն Դաւթի. եւ փառս եւ պատիւ ետուն նմա ի մահուն նորա ամենայն Յուդայ եւ բնակիչք Երուսաղեմի. եւ թագաւորեաց Մանասէ որդի նորա փոխանակ նորա։