1Յամին երկրորդի Յովասայ որդւոյ Յովաքազու արքայի Իսրայելի, թագաւորեաց Ամասիա որդի Յովասու թագաւոր Յուդայ։ 2Որդի քսան եւ հինգ ամաց էր ի թագաւորել իւրում, եւ քսան եւ ինն ամ թագաւորեաց յԵրուսաղէմ, եւ անուն մօր նորա Յովադին յԵրուսաղեմէ։ 3Եւ արար ուղղութիւն առաջի Տեառն, բայց ոչ իբրեւ զԴաւիթ զհայր իւր. ըստ ամենայնի զոր ինչ արար Յովաս հայր իւր՝ արար։ 4Բայց զբարձունսն ոչ եբարձ, եւ տակաւին ժողովուրդն զոհէր եւ արկանէր խունկս ի բարձունսն։ 5Եւ եղեւ իբրեւ հաստատեցաւ թագաւորութիւնն ի ձեռս նորա, եւ եհար զծառայսն իւր որ հարին զարքայ զհայր նորա։ 6Եւ զորդիս սպանողացն ոչ սպան, որպէս գրեալ է ի գիրս օրինացն Մովսիսի, զոր օրինակ պատուիրեաց Տէր եւ ասէ. Մի՛ մեռցին հարք վասն որդւոց, եւ մի՛ որդիք մեռցին վասն հարց, այլ իւրաքանչիւր ոք ի մեղս իւրում մեռցի։ 7Նա եհար զԵդովմ ի Մայիլա տասն հազար, եւ առ զՎէմն պատերազմաւ. եւ կոչեաց զանուն նորա Յեկթովէլ մինչեւ ցայսօր։

8Յայնմ ժամանակի առաքեաց Ամասիա հրեշտակս առ Յովաս որդի Յովաքազու որդւոյ Յէուայ արքայի Իսրայելի՝ եւ ասէ. Եկ յանդիման լիցուք միմեանց երեսօք։ 9Եւ առաքեաց Յովաս արքայ Իսրայելի առ Ամասիա արքայ Յուդայ եւ ասէ. Ակքան ի Լիբանանէ յղեաց առ եղեւնափայտն որ ի Լիբանան՝ եւ ասէ. Տուր զդուստր քո որդւոյ իմում կնութեան. եւ անցին գազանք անապատի որ ի Լիբանան եւ կոխեցին զԱկքանն։ 10Հարկանելով հարեր զԵդովմ, եւ հպարտացոյց զքեզ սիրտ քո. մեծարեաց եւ նիստ ի տան քում. ընդէ՞ր գրգռէ զքեզ չարութիւն քո, եւ անկանիցիս դու եւ Յուդա ընդ քեզ։ 11Եւ ոչ անսաց Ամասիա. եւ ել Յովաս արքայ Իսրայելի, եւ երեւեցան երեսօք, ինքն եւ Ամասիա արքայ Յուդայ, ի Բեթսամիւս Հրէաստանի։ 12Եւ պարտեցաւ Յուդա յերեսաց Իսրայելի եւ փախեաւ այր իւրաքանչիւր ի բնակութիւն իւր։ 13Եւ զԱմասիա զարքայ Յուդայ, զորդի Յովասու որդւոյ Ոքոզեայ, կալաւ Յովաս որդի Յովաքազու՝՝ արքայ Իսրայելի ի Բեթսամիւս. եւ եկն յԵրուսաղէմ եւ եհատ զպարիսպն Երուսաղեմի ի դրանէ Եփրեմի մինչեւ ցդուռն Անկեանցն, չորեքհարեւր կանգուն։ 14Եւ առ զոսկի եւ զարծաթ եւ զամենայն անօթս գտեալ ի տանն Տեառն եւ ի գանձս տան թագաւորին, եւ զորդիս խառնակութեանցն՝՝, եւ դարձաւ ի Սամարիա։

15Եւ մնացորդք բանից Յովասու եւ որ ինչ արար զօրութեամբ իւրով եւ պատերազմն զոր պատերազմեցաւ ընդ Ամասեայ արքայի Յուդայ, ո՞չ աւանիկ գրեալ են ի գիրս բանից աւուրց թագաւորացն Իսրայելի։ 16Եւ ննջեաց Յովաս ընդ հարս իւր, եւ թաղեցաւ ի Սամարիա ընդ թագաւորս Իսրայելի. եւ թագաւորեաց Յերոբովամ որդի նորա ընդ նորա։

17Եւ եկաց Ամասիա որդի Յովասու արքայ Յուդայ յետ մահուանն Յովասու որդւոյ Յովաքազու թագաւորի Իսրայելի՝ ամս հնգետասան։ 18Եւ մնացորդք բանից Ամասեայ եւ ամենայն ինչ զոր արար՝՝, ո՞չ աւանիկ գրեալ են ի գիրս բանից աւուրց թագաւորացն Յուդայ։ 19Եւ գումարեցան ի վերայ նորա գունդք յԵրուսաղէմ, եւ փախեաւ ի Լաքիս. եւ առաքեցին զկնի նորա ի Լաքիս եւ սպանին զնա անդ։ 20Եւ բարձին զնա ձիովք, եւ թաղեցաւ յԵրուսաղէմ ընդ հարս իւր ի քաղաքի Դաւթի։ 21Եւ ա՛ռ ամենայն ժողովուրդն Յուդայ զԱզարիա, եւ նա էր ամաց վեշտասանից, եւ թագաւորեցուցին զնա փոխանակ հօր իւրոյ Ամասեայ։ 22Նա շինեաց զԵլաթ, եւ դարձոյց զնա անդրէն ի Յուդա, յետ ննջելոյ արքայի ընդ հարս իւր։

23Յամի հնգետասաներորդի Ամասեայ որդւոյ Յովասու արքայի Յուդայ, թագաւորեաց Յերոբովամ որդի Յովասու արքայի Իսրայելի ի վերայ Իսրայելի՝՝ ի Սամարիա ամս քառասուն եւ մի։ 24Եւ արար չար առաջի Տեառն, եւ ոչ մեկնեցաւ յամենայն մեղաց Յերոբովամու որդւոյ Նաբատայ որ յանցոյցն զԻսրայէլ։ 25Նա մերժեաց զսահմանս Իսրայելի ի մտիցն Եմաթայ մինչեւ ցծովն Արաբայ ըստ բանին Տեառն Աստուծոյ Իսրայելի՝ զոր խօսեցաւ ի ձեռն ծառայի իւրոյ Յովնանու որդւոյ Ամաթեայ մարգարէի ի Գեթքոբերայ։ 26Զի ետես Տէր զտառապանս Իսրայելի զյոյժ դառնութեան, եւ սակաւաւորս եւ նեղեալս եւ անօսրացեալս եւ լքեալս, եւ ոչ ոք էր որ օգնէր Իսրայելի։ 27Եւ ոչ խօսեցաւ Տէր ջնջել զզաւակ Իսրայելի ի ներքոյ երկնից. եւ փրկեաց զնոսա Տէր ի ձեռաց Յերոբովամու որդւոյ Յովասու։

28Եւ մնացորդք բանից Յերոբովամայ եւ ամենայն ինչ զոր արար եւ զօրութիւնք նորա զոր պատերազմեցաւ, եւ որպէս դարձոյց զԴամասկոս եւ զԵմաթ անդրէն առ Յուդա յԻսրայելէ՝՝, ո՞չ աւանիկ գրեալ են ի գիրս բանից աւուրց թագաւորացն Իսրայելի։ 29Եւ ննջեաց Յերոբովամ ընդ հարս իւր ընդ թագաւորս Իսրայելի, եւ թագաւորեաց Զաքարիա որդի նորա փոխանակ հօր իւրոյ՝՝։