1Յամի քսաներորդի եւթներորդի Յերոբովամայ արքայի Իսրայելի, թագաւորեաց Ազարիա որդի Ամասեայ արքայի Յուդայ։ 2Որդի վեշտասան ամաց էր ի թագաւորել իւրում, եւ յիսուն եւ երկուս ամս թագաւորեաց յԵրուսաղէմ, եւ անուն մօր նորա Յեքեղիա յԵրուսաղեմէ։ 3Եւ արար բարի առաջի Տեառն ըստ ամենայնի զոր արար Ամասիա հայր նորա, 4բաց ի բարձանցն զոր ոչ եբարձ, եւ տակաւին ժողովուրդն զոհէր եւ արկանէր խունկս ի բարձունսն։ 5Եւ արկ Տէր ձեռն ի թագաւորն, եւ էր բորոտեալ մինչեւ ցօր մահուան իւրոյ. եւ նստէր ի տան ափփուսովթ, եւ Յովաթամ որդի արքայի էր ի վերայ տանն դատել զժողովուրդ երկրին։

6Եւ մնացորդք բանից Ազարեայ եւ ամենայն ինչ զոր արար, ո՞չ աւանիկ գրեալ են ի գիրս բանից աւուրց թագաւորացն Յուդայ։ 7Եւ ննջեաց Ազարիա ընդ հարս իւր, եւ թաղեցին զնա առ հարս իւր ի քաղաքի Դաւթի. եւ թագաւորեաց Յովաթամ որդի նորա ընդ նորա։

8Յամի երեսներորդի ութերորդի Ազարեայ արքայի Յուդա թագաւորեաց Զաքարիա որդի Յերոբովամայ ի վերայ Իսրայելի ի Սամարիա ամիսս վեց։ 9Եւ արար չար առաջի Տեառն որպէս արարին հարք նորա, եւ ոչ մեկնեցաւ ի մեղացն Յերոբովամայ որդւոյ Նաբատայ որ յանցոյցն զԻսրայէլ։ 10Եւ գումարեցան ի վերայ նորա Սեղղում որդի Յաբիսայ եւ Կեբդաամ, եւ հարին զնա յանդիման ժողովրդեանն եւ սպանին՝՝ զնա, եւ թագաւորեաց Սեղղում ընդ նորա։

11Եւ մնացորդք բանից Զաքարեայ ահա գրեալ են ի գիրս բանից աւուրց թագաւորացն Իսրայելի։ 12Այս է բան Տեառն զոր խօսեցաւ առ Յէու եւ ասէ. Որդիք չորրորդք նստցին քեզ յաթոռն Իսրայելի. եւ եղեւ այնպէս։

13Եւ Սեղղում որդի Յաբիսայ թագաւորեաց յամին երեսներորդի իններորդի Ազարեայ արքայի Յուդայ. եւ թագաւորեաց Սեղղում ամսօրեայ մի աւուրց ի Սամարիա։ 14Եւ ել Մանայեմ որդի Գադդեայ ի Թերսայ, եւ եմուտ ի Սամարիա եւ եհար զՍեղղում զորդի Յաբիսայ ի Սամարիա, եւ սպան զնա եւ թագաւորեաց ընդ նորա։

15Եւ մնացորդք բանից Սեղղումայ եւ գումարութիւնք նորա զոր գումարեցաւ՝ ահաւանիկ գրեալ են ի գիրս բանից աւուրց թագաւորացն Իսրայելի։

16Յայնմ ժամանակի եհար Մանայեմ զԹափսա եւ զամենայն ինչ որ ի նմա, եւ զսահմանս նորա ի Թերսայէ. քանզի ոչ բացին նմա. եւ եհար զնա եւ զյղիս նորա պատառեաց։

17Յամի երեսներորդի իններորդի Ազարեայ արքայի Յուդայ թագաւորեաց Մանայեմ որդի Գադդեայ ի վերայ Իսրայելի ի Սամարիա ամս տասն։ 18Եւ արար չար առաջի Տեառն, եւ ոչ մեկնեցաւ յամենայն մեղացն Յերոբովամու որդւոյ Նաբատայ որ յանցոյցն զԻսրայէլ մեղօք իւրովք՝՝։ 19Եւ ել Փուա արքայ Ասորեստանեայց ի վերայ երկրին. եւ Մանայեմ ետ Փուայ հազար տաղանդ արծաթոյ՝ լինել ձեռին նորա ընդ նմա, հաստատել զթագաւորութիւնն ի ձեռն սորա՝՝։ 20Եւ արկ Մանայեմ զարծաթն ի վերայ Իսրայելի, ի վերայ ամենայն զօրաւորի զօրութեամբ՝ տալ արքային Ասորեստանեայց յիսուն սիկղ արծաթոյ առ այր մի, եւ դարձաւ արքայն Ասորեստանեայց, եւ ոչ եկաց յերկրին։

21Եւ մնացորդք բանից Մանայեմայ եւ ամենայն ինչ զոր արար՝ ո՞չ աւանիկ գրեալ են ի գիրս բանից աւուրց թագաւորացն Իսրայելի։ 22Եւ ննջեաց Մանայեմ ընդ հարս իւր, եւ թագաւորեաց Փակէիա որդի նորա ընդ նորա։

23Յամի յիսներորդի Ազարեայ արքայի Յուդայ թագաւորեաց Փակէիա ի վերայ Իսրայելի ի Սամարիա ամս տասն։ 24Եւ արար չար առաջի Տեառն, եւ ոչ մեկնեցաւ ի մեղացն Յերոբովամայ որդւոյ Նաբատայ որ յանցոյցն զԻսրայէլ։ 25Եւ գումարեցաւ ի վերայ նորա Փակէէ որդի Ռովմելայ սպառազէն իւր, եւ եհար զնա ի Սամարիա առաջի տանն՝՝ արքայի. եւ ընդ նմա Արգոբ, եւ ընդ նմա Արիէ, եւ ընդ նմա յիսուն այր ի չորեքհարիւրոցն. եւ սպան զնա եւ թագաւորեաց ընդ նորա։

26Եւ մնացորդք բանիցն Փակէի եւ ամենայն ինչ զոր արար՝ ահա գրեալ են ի գիրս բանից աւուրց թագաւորացն Իսրայելի։

27Յամի յիսներորդի եւ երկրորդի Ազարեայ արքայի Յուդայ թագաւորեաց Փակէէ որդի Ռովմելայ ի վերայ Իսրայելի ի Սամարիա ամս քսան։ 28Եւ արար չար առաջի Տեառն, եւ ոչ մեկնեցաւ յամենայն մեղացն՝՝ Յերոբովամայ որդւոյ Նաբատայ որ յանցոյցն զԻսրայէլ։ 29Յաւուրս Փակէի արքայի Իսրայելի եկն Թագղաթփաղասար արքայ Ասորեստանեայց, եւ առ զԱյին եւ զԿաբեէլ, զԲեթմաաքա եւ զՅանովթ եւ զԿենէզ՝՝ եւ զԱսովր եւ զԳաղաադ եւ զԳալիլեայ, զամենայն երկիրն Նեփթաղիմայ, եւ խաղացոյց զնոսա յԱսորեստանեայս։ 30Եւ գումարեաց գունդ Ովսէէ որդի Եղայ ի վերայ Փակէի որդւոյ Ռովմելայ, եւ եհար զնա եւ սպան զնա, եւ թագաւորեաց ընդ նորա յամի քսաներորդի Յովաթամայ որդւոյ Ոզիայ։

31Եւ մնացորդք բանից Փակէի եւ ամենայն ինչ զոր արար՝ ահաւանիկ գրեալ են ի գիրս բանից աւուրց թագաւորացն Իսրայելի։

32Յամի երկրորդի Փակէի որդւոյ Ռովմելայ թագաւորի Իսրայելի թագաւորեաց Յովաթամ որդի Ոզիայ արքայի Յուդայ։ 33Որդի քսան եւ հինգ ամաց էր ի թագաւորել իւրում, եւ վեշտասան ամ թագաւորեաց յԵրուսաղէմ, եւ անուն մօր նորա Յերուսա դուստր Սադովկայ։ 34Եւ արար ուղղութիւն առաջի Տեառն ըստ ամենայնի զոր արար Ոզիա հայր նորա, 35բաց ի բարձանցն զոր ոչ եբարձ, եւ տակաւին ժողովուրդն զոհէր եւ արկանէր խունկս ի բարձունսն. նա շինեաց զդուռն տանն Տեառն զվերին։

36Եւ մնացորդք բանից Յովաթամայ եւ ամենայն ինչ զոր արար՝ ո՞չ աւանիկ գրեալ են ի գիրս բանից աւուրց թագաւորացն Յուդայ։

37Յաւուրսն յայնոսիկ սկսաւ Տէր առաքել ի Յուդա զՌասոն արքայ Ասորւոց, եւ զՓակէէ որդի Ռովմելայ։ 38Եւ ննջեաց Յովաթամ ընդ հարս իւր, եւ թաղեցաւ առ հարս իւր ի քաղաքին Դաւթի հօր իւրոյ. եւ թագաւորեաց Աքազ որդի նորա ընդ նորա։