1Յամի եւթնուտասներորդի Փակէի որդւոյ Ռովմելայ թագաւորեաց Աքազ որդի Յովաթամայ արքայի Յուդայ։ 2Որդի ամաց քսանից էր Աքազ ի թագաւորել իւրում, եւ վեշտասան ամ թագաւորեաց յԵրուսաղէմ. եւ ոչ արար ուղղութիւն առաջի Տեառն Աստուծոյ հաւատարմութեամբ՝՝ իբրեւ զԴաւիթ զհայր իւր. 3եւ գնաց զճանապարհ Յերոբովամայ որդւոյ Նաբատայ արքայի՝՝ Իսրայելի, նա եւ զորդի իւր անցոյց ընդ հուր ըստ գարշութեանց ազգացն զորս եբարձ Տէր յերեսաց որդւոցն Իսրայելի։ 4Եւ զոհէր եւ արկանէր խունկս ի բարձունս, եւ ի վերայ բլրոց եւ ի ներքոյ անտառախիտ ծառոց։

5Յայնժամ ել Ռասոն արքայ Ասորւոց եւ Փակէէ որդի Ռովմելայ արքայ Իսրայելի յԵրուսաղէմ ի պատերազմ, եւ պաշարէին զնա ի վերայ Աքազու. եւ ոչ կարէին պատերազմել։ 6Ի ժամանակին յայնմիկ դարձոյց Ռասոն արքայ Ասորւոց զԵլաթ յԱսորիս, եւ եհան զՀրեայսն յԵլաթայ, եւ եկին Եդովմայեցիք յԵլաթ եւ բնակեցին անդ մինչեւ ցայսօր։ 7Եւ առաքեաց Աքազ հրեշտակս առ Թագղաթփաղասար արքայ Ասորեստանեայց եւ ասէ. Ծառայ քո եւ որդի քո եմ ես, ել եւ փրկեա զիս ի ձեռաց արքային Ասորւոց եւ ի ձեռաց արքային Իսրայելի՝ յարուցելոց ի վերայ իմ։ 8Եւ ա՛ռ Աքազ զարծաթ եւ զոսկի զգտեալս ի տան Տեառն եւ ի գանձս տան թագաւորին, եւ առաքեաց արքային Ասորեստանեայց պատարագս։ 9Եւ լուաւ նմա արքայն Ասորեստանեայց, եւ ել արքայն Ասորեստանեայց ի Դամասկոս եւ առ զնա, եւ վարեաց զնա ի գերութիւն ի Կիւրէն, եւ զՌասոն սպան։ 10Եւ չոգաւ արքայ Աքազ ընդ առաջ Թագղաթփաղասարայ արքային Ասորեստանեայց ի Դամասկոս, եւ ետես զսեղանն որ ի Դամասկոս, եւ առաքեաց արքայ Աքազ առ Ուրիա քահանայ զնմանութիւն սեղանոյն եւ զձեւ նորա՝ ըստ ամենայն գործուածոյն նորա։ 11Եւ շինեաց Ուրիա քահանայ զսեղանն ըստ ամենայնի որպէս առաքեաց արքայ Աքազ ի Դամասկոսէ, նոյնպէս արար Ուրիա քահանայ մինչեւ ի գալ արքայի Աքազու ի Դամասկոսէ։ 12Ետես զսեղանն՝՝, եւ մատեաւ արքայ ի սեղանն եւ ել ի վեր՝՝. 13եւ ճենճերեաց զողջակէզսն իւր եւ զզոհսն. եւ նուիրեաց զնուէրս իւր, եւ եհեղ զարիւն խաղաղականաց իւրոց։ 14Եւ զսեղանն պղնձի որ կայր առաջի Տեառն՝ փոխեաց յերեսաց տանն Տեառն ի տեղւոջէ իւրմէ՝՝, եւ եդ զնա ի կողմանէ սեղանոյն ընդ հիւսիսի։ 15Եւ պատուէր ետ արքայ Աքազ Ուրիայ քահանայի եւ ասէ. Ի վերայ մեծի սեղանոյդ մատուցանիցես զողջակէզս առաւօտինս եւ զզոհս երեկոյինս եւ զողջակէզս արքայի եւ զզոհս նորա, եւ զողջակէզս ժողովրդեան երկրիս եւ զզոհս նոցա եւ զնուէրս նոցա, եւ զամենայն արիւն ողջակիզաց եւ զամենայն արիւն զոհից ի վերայ նորա հեղուցուս. բայց սեղանն պղնձի եղիցի ինձ յառաւօտինս։ 16Եւ արար Ուրիա քահանայ ըստ ամենայնի որպէս պատուիրեաց նմա արքայ Աքազ։ 17Եւ կոտորեաց արքայ Աքազ զաղխսն մեքենովթացն, եւ փոխեաց ի նոցանէն զաւազանսն, եւ զծովն իջոյց ի ցլուցն պղնձեաց երկոտասանեցունց որ ի ներքոյ նորա, եւ եդ զնա ի վերայ քարեղէն խարսխի։ 18Եւ զհիմն աթոռոյն՝՝ շինեաց ի տան Տեառն, եւ զմուտ թագաւորին զարտաքին դարձոյց ի տուն Տեառն յերեսաց արքային Ասորեստանեայց։

19Եւ մնացորդք բանից Աքազու զոր արար՝ ո՞չ աւանիկ գրեալ են ի գիրս բանից աւուրց թագաւորացն Յուդայ։ 20Եւ ննջեաց Աքազ ընդ հարս իւր, եւ թաղեցաւ ընդ հարս իւր ի քաղաքին Դաւթի. եւ թագաւորեաց Եզեկիա որդի նորա ընդ նորա։