1Յամի երկոտասաներորդի Աքազու արքայի Յուդայ, թագաւորեաց Ովսէէ որդի Եղայ ի վերայ Իսրայելի ի Սամարիա ամս ինն։ 2Եւ արար չար առաջի Տեառն, բայց ոչ իբրեւ զթագաւորսն Իսրայելի որ էին յառաջ քան զնա։ 3Ի վերայ նորա ել Սաղմանասար արքայ Ասորեստանեայց, եւ եղեւ նորա Ովսէէ ծառայ, եւ տայր տանել նմա մաննայ։ 4Եւ եգիտ արքայ Ասորեստանեայց յՈվսէէ վնաս. զի առաքեաց հրեշտակս առ Սովա արքայ Եգիպտացւոց, եւ ոչ ետ մաննա արքային Ասորեստանեայց ի տարւոջն յայնմիկ՝՝. եւ պաշարեաց զնա արքայն Ասորեստանեայց. եւ կապեաց զնա ի տան բանտի։ 5Եւ ել արքայն Ասորեստանեայց յամենայն երկիրն, ել եւ ի Սամարիա եւ պաշարեաց զնա ամս երիս։

6Յամին իններորդի Ովսեայ ա՛ռ արքայ Ասորեստանեայց զՍամարիա, եւ խաղացոյց զԻսրայէլ յԱսորեստանեայս, եւ բնակեցոյց զնոսա յԱղաթ եւ յԱբովր՝ զգետովն Գովզանայ եւ զլերամբքն Մարաց։ 7Եւ եղեւ իբրեւ մեղան որդիքն Իսրայելի Տեառն Աստուծոյ իւրեանց որ եհան զնոսա յերկրէն Եգիպտացւոց՝ ի ձեռաց փարաւոնի արքային Եգիպտացւոց, եւ երկեան յաստուածոց օտարաց, 8եւ գնացին ըստ կրօնից ազգացն զորս եբարձ Տէր յերեսաց որդւոցն Իսրայելի։ 9Եւ թագաւորքն Իսրայելի որչափ ինչ արարին եւ որչափ ինչ՝՝ պաճուճեցին որդիքն Իսրայելի բան, ոչ այնպէս ինչ զՏեառնէ՝՝ Աստուծոյ իւրեանց. եւ շինեցին իւրեանց բարձունս յամենայն քաղաքս իւրեանց, յաշտարակէ պահապանացն մինչեւ ի քաղաքն ամուր։ 10Եւ կանգնեցին իւրեանց արձանս եւ անտառս յամենայն բլուրս բարձունս, եւ ի ներքոյ ամենայն անտառախիտ ծառոց. 11եւ արկանէին խունկս յամենայն բարձունս, իբրեւ զամենայն ազգսն զորս մերժեաց Տէր յերեսաց նոցա. արարին զովօղս եւ ընկերշակեցին՝՝ առ ի բարկացուցանելոյ զՏէր. 12եւ պաշտեցին զկուռս, որովք ասաց նոցա Տէր թէ՝ Մի՛ առնիցէք զբանդ զայդ Տեառն։

13Եւ եդ վկայութիւն Տէր ընդ Իսրայելի եւ ընդ Յուդայ ի ձեռն ամենայն մարգարէից իւրոց, ամենայն տեսանողաց, եւ ասէ. Դարձարուք ի ճանապարհաց ձերոց չարաց, եւ պահեցէք զպատուիրանս իմ եւ զիրաւունս իմ եւ զամենայն օրէնս՝՝ զոր պատուիրեցի հարց ձերոց, զորս առաքեցի առ ձեզ ի ձեռն ծառայից իմոց մարգարէից։ 14Եւ ոչ լուան նոքա, եւ խստացուցին զողն իւրեանց քան զողն հարց իւրեանց, որ ոչ հաւատացին ի Տէր Աստուած իւրեանց. 15եւ ընկեցին ի բաց զհաստատութիւնս իւրեանց, եւ զդաշինսն զոր կռեաց ընդ հարս նոցա, եւ զվկայութիւնս նորա զոր ուխտեաց նոցա ոչ պահեցին. եւ գնացին զհետ սնոտեաց, եւ սնոտեցան զհետ ազգացն որ շուրջ զնոքօք, յորոց պատուիրեաց նոցա Տէր չառնել ըստ նմին օրինակի։ 16Թողին զամենայն պատուիրանս Տեառն Աստուծոյ իւրեանց, եւ արարին իւրեանց ձուլածոյս, երկուս երինջս, եւ երկիր պագին՝՝ զօրութեան երկնից, եւ պաշտեցին զԲահաղ, 17եւ անցուցին զուստերս եւ զդստերս իւրեանց ընդ հուր, եւ դիւթեցին դիւթութիւնս եւ հմայեցին հմայս, եւ համարձակեցան առնել չար առաջի Տեառն առ ի բարկացուցանելոյ զնա։ 18Եւ բարկացաւ Տէր յոյժ Իսրայելի, եւ մերժեաց զնոսա յերեսաց իւրոց. եւ ոչ մնաց՝ բայց միայն ցեղն Յուդայ։

19Սակայն եւ Յուդայ ոչ պահեցին զպատուիրանս Տեառն Աստուծոյ իւրեանց, եւ գնացին ըստ կրօնիցն Իսրայելի զոր արարին։ 20Եւ մերժեցին զՏէր յամենայն զաւակէն՝՝ Իսրայելի. եւ շարժեաց զնոսա եւ ետ զնոսա ի ձեռս աւարառուաց իւրեանց, մինչեւ ընկէց զնոսա յերեսաց իւրոց։ 21Սակայն Իսրայէլ առ տամբն իսկ Դաւթի՝՝ թագաւորեցուցին զՅերոբովամ որդի Նաբատայ. եւ մերժեաց Յերոբովամ զԻսրայէլ ի գնացից Տեառն, եւ մեղոյց զնոսա մեղս մեծամեծս։ 22Եւ արարին որդիքն Իսրայելի ըստ ամենայն մեղաց Յերոբովամու զոր արար, եւ ոչ մերժեցան ի նոցանէն, 23մինչեւ փոխեաց Տէր զԻսրայէլ յերեսաց իւրոց, որպէս եւ խօսեցաւ Տէր ի ձեռն ամենայն ծառայից իւրոց մարգարէից. եւ վարեցաւ Իսրայէլ յերկրէ իւրմէ յԱսորեստանեայս մինչեւ ցայսօր։ 24Եւ ած արքայն Ասորեստանեայց ի Բաբելոնէ եւ ի Քութայ եւ յԱյայ եւ յԵմաթայ եւ ի Սեփարուիմայ, եւ բնակեցան ի քաղաքս Սամարիայ փոխանակ որդւոցն Իսրայելի, եւ ժառանգեցին զՍամարիա, եւ բնակեցին ի քաղաքս նորա։ 25Եւ եղեւ ի սկզբան բնակութեան նոցա անդ ոչ երկեան ի Տեառնէ. եւ առաքեաց Տէր առեւծս եւ կոտորէին զնոսա։ 26Եւ խօսեցան ընդ արքային Ասորեստանեայց եւ ասեն. Ազգքն զոր փոխեցեր եւ նստան փոխանակաւ ի քաղաքս Սամարիայ՝ ոչ գիտեն զկրօնս Աստուծոյ երկրին, եւ առաքեաց Տէր ի նոսա առեւծս, եւ ահա կոտորեն զնոսա. քանզի ոչ գիտեն զկրօնս Աստուծոյ երկրին։ 27Եւ հրաման ետ արքայն Ասորեստանեայց եւ ասէ. Տարայք անդր զմի ոք ի քահանայիցն գերելոց անտի զի երթեալ բնակեսցէ անդ, եւ ցուցցէ զկրօնս Տեառն, եւ լուսաւորեսցէ զնոսա իրաւամբք՝՝ Աստուծոյ երկրին։ 28Եւ տարան զմի ի քահանայիցն զոր գերեցին ի Սամարիայ. եւ նստաւ ի Բեթէլ, եւ լուսաւորէր զնոսա, զի երկնչիցին ի Տեառնէ։ 29Եւ արարին ազգք ազգք աստուածս իւրեանց, եւ եդին ի տունս բարձանցն զոր արարին Սամարացիքն. իւրաքանչիւր ազգքն ի քաղաքս իւրեանց յորս ինքեանք բնակէին։ 30Եւ արք Բաբելոնի արարին զՍոքքովթ Բանովթ, եւ արք Քութայ արարին զԱնգեղ, եւ արք Եմաթայ արարին զԱսիմաթ, 31եւ Այիացիք արարին զԱբլազեր եւ՝՝ զՆեբաս եւ զԹարթակ եւ զՍեփարուիմ, ուր՝՝ այրէին զորդիս իւրեանց ի հուր Ադրամելեքայ եւ Ամամելեքայ աստուածոց Սեփարուիմայ. 32եւ երկնչէին ի Տեառնէ, եւ բնակեցուցին զգարշելիսն իւրեանց ի տունս բարձանցն զոր արարին ի Սամարիա իւրաքանչիւր ազգաց յորում բնակէին։՝՝ Եւ երկնչէին ի Տեառնէ, եւ արարին իւրեանց քուրմս բարձանց։ 33Եւ երկնչէին ի Տեառնէ, եւ պաշտէին զաստուածս իւրեանց, ըստ կրօնից ազգացն՝ զորս Աստուած մերժեաց անտի։

34Եւ մինչեւ ցայսօր առնէին նոքա ըստ կրօնից նոցա, եւ երկնչէին ի Տեառնէ. եւ՝՝ առնէին ըստ կրօնից նոցա եւ ըստ իրաւանց նոցա եւ՝՝ ըստ օրինաց եւ ըստ պատուիրանին զոր պատուիրեաց Տէր որդւոցն Յակոբայ, որում եդ անուն Իսրայէլ։ 35Եւ ուխտեաց Տէր ուխտ եւ պատուիրեաց նոցա եւ ասէ. Մի՛ երկնչիցիք յաստուածոց օտարաց, եւ մի՛ երկիր պագանիցէք նոցա, եւ մի՛ պաշտիցէք զնոսա, եւ մի՛ զոհիցէք նոցա. 36այլ Տեառն Աստուծոյ որ եհան զձեզ յերկրէն Եգիպտացւոց մեծաւ զօրութեամբ եւ բարձր բազկաւ, ի նմանէ երկնչիցիք, եւ նմա երկիր պագանիցէք եւ նմա զոհիցէք. 37եւ իրաւանց եւ դատաստանաց եւ օրինաց եւ պատուիրանացն զորս գրեաց ձեզ՝ զգուշանայցէք առնել. եւ մի՛ երկնչիցիք յաստուածոց օտարաց. 38եւ զուխտն զոր ուխտեաց ընդ ձեզ՝ մի՛ ցրիցէք. եւ մի՛ երկնչիցիք յաստուածոց օտարաց. 39այլ ի Տեառնէ Աստուծոյ ձերմէ երկնչիցիք, եւ նա փրկեսցէ զձեզ յամենայն թշնամեաց ձերոց։ 40Եւ մի՛ ունկնդիր լինիցիք կրօնից նոցա զոր նոքա առնիցեն՝՝։ 41Եւ երկնչէին ազգքն այնոքիկ ի Տեառնէ, եւ դրօշելոց իւրեանց ծառայէին. եւ որդիք նոցա եւ որդիք որդւոց նոցա որպէս արարին հարք իւրեանց, առնեն մինչեւ ցայսօր։