1Եւ Եղիսէ մարգարէ կոչեաց զմի յորդւոց մարգարէիցն եւ ասէ ցնա. Պնդեա զմէջ քո, եւ առ զսրուակ իւղոյս ի ձեռին քում, եւ երթ յՌամովթ Գաղաադ։ 2Եւ մտցես անդր, եւ տեսցես անդ զՅէու զորդի Յովսափատայ որդւոյ Նամեսսեայ. եւ մտցես եւ յարուսցես զնա ի միջոյ եղբարց իւրոց, եւ տարցես զնա սենեակ ի սենեկի. 3եւ առցես զսրուակդ իւղոյ, եւ արկցես ի գլուխ նորա եւ ասասցես. Այսպէս ասէ Տէր. Օծի զքեզ թագաւոր ի վերայ Իսրայելի. եւ բացցես զդուռն եւ փախիցես, եւ մի՛ մնասցես։ 4Եւ գնաց պատանեակն մարգարէ յՌամովթ Գաղաադ։

5Եւ եմուտ անդր. եւ ահա իշխանք զօրուն նստէին. եւ ասէ. Բան ինչ է ինձ ընդ քեզ, իշխանդ։ Եւ ասէ Յէու. Առ ո՞ յամենեցունց ի մէնջ։ Եւ ասէ. Առ քեզ, իշխանդ։ 6Եւ յարեաւ եմուտ ի սենեակն, եւ արկ զեւղն ի գլուխ նորա, եւ ասէ ցնա. Այսպէս ասէ Տէր Աստուած Իսրայելի. Օծի զքեզ ի թագաւոր ժողովրդեան Տեառն ի վերայ Իսրայելի. 7եւ սատակեսցես զտունն Աքաաբու տեառն քո յերեսաց քոց, եւ առցես՝՝ զվրէժ արեան ծառայից իմոց մարգարէից, եւ զարեանց ամենայն ծառայից Տեառն ի ձեռաց Յեզաբելայ եւ ի ձեռաց ամենայն տան նորա։ 8Եւ սատակեսցես զտանն Աքաաբու՝՝ որ միզիցէ զորմով, եւ զնեղեալն եւ զմնացեալն յԻսրայելէ. 9տալ զտունն Աքաաբու իբրեւ զտունն Յերոբովամու որդւոյ Նաբատայ եւ իբրեւ զտունն Բաասայ որդւոյ Աքիայ. 10եւ զՅեզաբէլ կերիցեն շունք ի վիճակին Յեզրայելի, եւ ոչ ոք իցէ որ թաղիցէ։ Եւ եբաց զդուրսն եւ փախեաւ։

11Եւ Յէու ել առ ծառայս տեառն իւրոյ. եւ ասեն ցնա. Ողջո՞յն է. զի՞ եկն առ քեզ մոլին այն։ Եւ ասէ ցնոսա. Դուք ինքնին գիտէք զայրն եւ զբաջաղանս նորա։ 12Եւ ասեն. Անիրաւութիւն է այդ՝՝. պատմեա մեզ։ Եւ ասէ ցնոսա Յէու. Այսպէս եւ այսպէս խօսեցաւ ընդ իս, եւ ասէ. Այսպէս ասէ Տէր. Օծի զքեզ թագաւոր ի վերայ Իսրայելի։ 13Իբրեւ լուան, փութացան եւ առին իւրաքանչիւր զբաճկոն իւր, եւ եդին ի ներքոյ նորա ի վերայ միոյ աստիճանացն ուր նստէին, եւ փող հարին եղջերեաւն՝ եւ ասեն. Թագաւորեաց Յէու։

14Եւ զօրաժողով եղեւ Յէու որդի Յովսափատայ որդւոյն Նամեսսեայ ի վերայ Յովրամայ. եւ Յովրամ զգուշացեալ էր յՌամովթ Գաղաադ, ինքն եւ ամենայն Իսրայէլ, յերեսաց Ազայելի արքայի Ասորւոց. 15եւ դարձաւ Յովրամ արքայ բժշկել ի Յեզրայէլ ի վիրաց անտի զոր խոցեցին զնա Ասորիքն ի պատերազմել նորա ընդ Ազայելի արքայի Ասորւոց. եւ ասէ Յէու. Եթէ իցէ ոգի ձեր ընդ իս, մի՛ ելցէ փախստական ի քաղաքէ աստի երթալ պատմել ի Յեզրայէլ։ 16Եւ հեծաւ Յէու եւ գնաց, եւ էջ՝՝ Յեզրայէլ. զի Յովրամ արքայ Իսրայելի բժշկէր ի Յեզրայէլ ի նետիցն զոր խոցեցին զնա յՌամովթ ի պատերազմել ընդ Ազայելի արքայի Ասորւոց. զի նա զօրաւոր էր եւ այր զօրութեան. եւ ննջեաց՝՝ անդ. եւ Ոքոզիա արքայ Յուդայ էջ տեսանել զՅովրամ։ 17Եւ դէտն ել յաշտարակն՝՝ Յեզրայելի, եւ ետես փոշի ի գալն Յէուայ եւ ասէ. Փոշի տեսանեմ ես։ Եւ ասէ Յովրամ. Ա՛ռ հեծեալ մի եւ առաքեա ընդ առաջ նոցա, եւ ասասցէ. Ողջո՞յն է։ 18Եւ չոգաւ հեծեալն ձիոյ ընդ առաջ նորա եւ ասէ. Այսպէս ասէ արքայ, թէ՝ Ողջո՞յն իցէ։ Եւ ասէ Յէու. Զի՞ կայ քո եւ ողջունի. դարձիր զկնի իմ։ Եւ պատմեաց դէտն եւ ասէ. Եհաս ի նոսա հրեշտակն եւ ոչ դարձաւ։ 19Եւ արձակեաց երկրորդ հեծեալ մի ձիոյ եւ ասէ. Այսպէս ասէ արքայ, թէ՝ Ողջո՞յն իցէ։ Եւ ասէ Յէու. Զի՞ կայ քո եւ ողջունի. դարձիր զկնի իմ։ 20Եւ պատմեաց դէտն եւ ասէ. Եհաս ի նոսա եւ ոչ դարձաւ։ եւ վարելն իբրեւ զվարելն զՅէուայ որդւոյ Նամեսսեայ, քանզի տագնապաւ եհաս։ 21Եւ ասէ Յովրամ. Լծեա։ Եւ լծեցին կառս. եւ ամբարձաւ Յովրամ արքայ Իսրայելի, եւ Ոքոզիա արքայ Յուդայ՝ այր յիւրաքանչիւր ի կառս իւր, եւ ելին ընդ առաջ Յէուայ. եւ գտին զնա ի վիճակին Նաբովթայ Յեզրայելացւոյ։ 22Եւ եղեւ իբրեւ ետես Յովրամ զՅէու, եւ ասէ. Ողջո՞յն է, Յէու։ Եւ ասէ Յէու. Զի՞նչ ողջոյն է, տակաւին պոռնկութիւն Յեզաբելայ մօր քո եւ կախարդութիւնք նորա յաճախիցե՞ն։ 23Եւ դարձոյց Յովրամ զձեռս իւր եւ փախեաւ, եւ ասէ ցՈքոզիա. Դաւ է, Ոքոզիա։ 24Եւ Յէու ընդ գիրկս եմուտ, եւ եհար զՅովրամ ընդ մէջ թիկանց նորա, եւ ել նետն ընդ սիրտ նորա, եւ կծկեցաւ ի վերայ ծնգաց իւրոց՝՝։ 25Եւ ասէ ցԲադեկար սպառազէնն իւր. Ընկեա զդա ի վիճակ ագարակին Նաբովթայ Յեզրայելացւոյ. զի յիշեմ մինչդեռ ես եւ դու հեծեալ էաք ի զոյգս զկնի Աքաաբու հօր դորա, եւ Տէր ա՛ռ ի վերայ դորա զառածս զայս. 26եթէ ոչ զարիւն Նաբովթայ եւ զարիւն որդւոց նորա զոր տեսի երէկ, ասէ Տէր, հատուցից նմա ի վիճակիս յայսմիկ, ասէ Տէր. եւ արդ ա՛ռ ընկեա զդա ի վիճակ այդր ըստ բանին Տեառն։

27Եւ Ոքոզիա արքայ Յուդայ ետես եւ փախեաւ ընդ ճանապարհ Բեթանգանայ. եւ պնդեցաւ զհետ նորա Յէու եւ ասէ. Հապա, եւ զդա եւս։ Եւ եհար զնա ի կառսն մինչդեռ ելանէր ընդ զառ ի վերն Բերայի, որ է Յեբղաամ. եւ փախեաւ ի Մակեդդով, եւ անդ մեռաւ։ 28Եւ հանին զնա ծառայք իւր յԵրուսաղէմ, եւ թաղեցին զնա ի գերեզմանի իւրում ընդ հարս իւր ի քաղաքի Դաւթի։

29Եւ յամին մետասաներորդի Յովրամայ արքային Իսրայելի, թագաւորեաց՝՝ Ոքոզիա ի վերայ Յուդայ։

30Եւ եկն Յէու Յեզրայէլ. եւ Յեզաբէլ լուաւ, եւ ծարրեաց զաչս իւր եւ զարդարեաց զգլուխ իւր, եւ հայէր ընդ պատուհանն։ 31Եւ Յէու մտանէր ի քաղաքն. եւ ասէ. Ողջո՞յն իցէ Զամբրի տիրասպան։ 32Եւ՝՝ ամբարձ զերեսս իւր ի պատուհանն եւ ասէ. Ո՞վ ես դու. էջ առ իս՝՝։ Եւ հայեցան ի խոնարհ առ նա երկու ներքինիք։ 33Եւ ասէ. Ընկեցէք զդա ի խոնարհ։ Եւ ընկեցին զնա, եւ ցայտեցաւ յարենէ նորա զորմովքն եւ զձիովքն, եւ կոխեցին զնա առաթուր։ 34Եւ ինքն եմուտ եկեր եւ արբ, եւ ասէ. Տեսէք զանիծեալն զայն եւ թաղեցէք զնա, զի դուստր թագաւորի է։ 35Եւ չոգան թաղել զնա, եւ ոչ ինչ գտին ի նմանէ, բայց զգագաթն եւ զոտսն եւ զթաթս ձեռացն։ 36Եւ դարձան պատմեցին նմա. եւ ասէ. Բան Տեառն է զոր խօսեցաւ ի ձեռն Եղիայի Թեզբացւոյ եւ ասէ. Ի վիճակին Յեզրայելի կերիցեն շունք զմարմինս Յեզաբելայ. 37եւ եղիցի դին Յեզաբելայ իբրեւ զաղբ ի վերայ երեսաց անդոյ ի վիճակին. զի մի՛ լինիցի ասել նոցա թէ՝ Այս է Յեզաբէլ։