1Եւ եղեւ յետ այնորիկ եւ արար Աբիսողոմ կառս եւ երիվարս, եւ յիսուն այր սուրհանդակ առաջի իւր։ 2Եւ կանխէր Աբիսողոմ եւ կայր առ ճանապարհի դրանն. եւ լինէր ամենայն այր որոյ էր դատ գալ առ արքայ ի դատաստան, բարբառէր առ նա Աբիսողոմ եւ ասէր ցնա. Յորմէ՞ քաղաքէ ես դու։ Եւ ասէր այրն. Ի միոյ ի ցեղիցն Իսրայելի է ծառայ քո։ 3Եւ ասէ ցնա Աբիսողոմ. Ահա բանք քո բարի են եւ դիւրինք, եւ որ ունկնդիր լինիցի քեզ՝ չիք առ ի յարքայէ։ 4Եւ ասէր Աբիսողոմ. Ո՜ կացուցանէր զիս դատաւոր ի վերայ երկրիս, եւ առ իս գայր ամենայն այր որոյ էր հակառակութիւն եւ դատաստան, եւ առնէի նմա իրաւունս։ 5Եւ լինէր յորժամ մերձենայր առ նա այր երկիր պագանել նմա, ձգէր զձեռն իւր եւ առ ինքն մատուցանէր, եւ համբուրէր զնա։ 6Եւ առնէր Աբիսողոմ ըստ բանիս ըստ այսմիկ ամենայն Իսրայելի եկելոյ ի դատաստան առ արքայ, եւ յանկուցանէր յինքն Աբիսողոմ զսիրտս ամենայն արանց Իսրայելի։

7Եւ եղեւ ի կատարել չորից ամաց, ասէ Աբիսողոմ ցհայր իւր՝՝. Երթայց եւ հատուցից զուխտս իմ զոր ուխտեցի Տեառն ի Քեբրոն. 8զի ուխտիւք ուխտեաց ծառայ քո մինչ էի ի Գեսուր յԱսորիս. ասեմ. Եթէ դարձուցանելով դարձուսցէ զիս Տէր յԵրուսաղէմ, պաշտեցից զՏէր։ 9Եւ ասէ ցնա արքայ. Երթ խաղաղութեամբ։ Եւ յարեաւ գնաց ի Քեբրոն։ 10Եւ առաքեաց Աբիսողոմ պատուիրակս յամենայն ցեղս Իսրայելի, եւ ասէ. Ի լսել ձեր զձայն եղջեր փողոյ, ասասջիք եթէ՝ Թագաւորեաց թագաւոր Աբիսողոմ ի Քեբրոն։ 11Եւ ընդ Աբիսողոմայ գնացին արք երկերիւր հրաւիրեալք, եւ երթային միամտութեամբ, եւ ոչ գիտէին ամենեւին զզրոյցսն։ 12Եւ առաքեաց Աբիսողոմ եւ կոչեաց զԱքիտոփէլ Թեկուացի խորհրդակից Դաւթի ի քաղաք իւր ի Գովլա՝՝ ի զոհել իւրում զզոհսն. եւ եղեւ ժողով սաստիկ, եւ ժողովուրդ բազում երթայր ընդ Աբիսողոմայ։

13Եւ եհաս գուժկան առ Դաւիթ եւ ասէ. Եղեւ սիրտ արանց Իսրայելի զհետ Աբիսողոմայ։ 14Եւ ասէ Դաւիթ ցամենայն ծառայս իւր որ ընդ նմա յԵրուսաղէմ. Արիք եւ փախիցուք. զի ոչ գոյ մեզ փրկութիւն յերեսաց Աբիսողոմայ. փութացարուք գնալ, զի մի՛ արագիցէ եւ հասանիցէ մեզ, եւ արկանիցէ ի վերայ մեր չարիս, եւ հարկանիցէ զքաղաքս սրով սուսերի։ 15Եւ ասեն ծառայքն արքայի ցարքայ. Ըստ ամենայնի զոր եւ կամիցի տէր մեր արքայ՝ ահաւասիկ կամք ծառայք քո։

16Եւ ել արքայ եւ ամենայն տուն նորա ի հետիոտս. եւ եթող արքայ տասն կին ի հարճից անտի իւրոց պահել զտունն։ 17Եւ ել արքայ եւ ամենայն ծառայք նորա հետեւակք, եւ կացին առ ձիթենւոյն որ յանապատի անդ՝՝։ 18Եւ ամենայն ծառայք նորա մի ըստ միոջէ անցանէին առ նովաւ, եւ ամենայն Քերեթին եւ Ոփելեթին, եւ ամենայն Գեթացիք, վեց հարեւր այր եկեալ հետեւակք ի Գեթայ, անցանէին առաջի Դաւթի։ 19Եւ ասէ արքայ ցԵթթի Գեթացի. Ընդէ՞ր գայցես եւ դու ընդ մեզ. դարձիր անդրէն եւ բնակեա ընդ արքայի, զի այր օտար ես դու, եւ խախտեցար ի տեղւոջէ քումմէ ի Գեթայ եւ եկիր՝՝, 20եւ այսօր խախտիցե՞մ զքեզ գնալ ընդ մեզ. եւ ես երթայց յո եւ երթալոց իցեմ, բայց դու դարձիր եւ դարձո զեղբարս քո ընդ քեզ. եւ արասցէ ընդ քեզ Տէր՝՝ ողորմութիւն եւ ճշմարտութիւն։ 21Պատասխանի ետ Եթթի արքայի եւ ասէ. Կենդանի է Տէր, եւ կենդանի է տէր իմ արքայ, զի ի տեղւոջ ուր տէր իմ արքայ իցէ, ե՛ւ ի մահու ե՛ւ ի կեանս՝ անդ եղիցի եւ ծառայ քո։ 22Եւ ասէ արքայ ցԵթթի. Եկ անց ընդ իս՝՝։ Եւ անց Եթթի Գեթացի, եւ ամենայն ծառայք նորա եւ ամենայն ամբոխ նորա ընդ նմա։ 23Եւ ամենայն երկիրն լայր մեծաձայն, եւ ամենայն զօրն անցանէր ընդ հեղեղատն Կեդրոնի՝՝. անց եւ արքայ ընդ հեղեղատն Կեդրոնի. եւ ամենայն զօրն եւ արքայ երթային՝՝ ընդ երեսս ճանապարհին անապատի։

24Եւ ահա Սադովկ եւ ամենայն Ղեւտացիք ընդ նմա, բարձին զտապանակ ուխտին Տեառն ի Բեթարայ՝՝, եւ կացուցին զտապանակն Աստուծոյ. եւ ել ի Բեթարայ մինչեւ կատարեաց ամենայն ժողովուրդն անցանել ի քաղաքէ անտի։ 25Եւ ասէ արքայ ցՍադովկ. Դարձո զտապանակդ Աստուծոյ ի քաղաք, եւ նստցի ի տեղւոջ իւրում. եթէ գտից շնորհս առաջի Տեառն՝ դարձուսցէ զիս, եւ ցուցցէ ինձ զդա եւ զվայելչութիւն դորա. 26ապա թէ այսպէս ասասցէ ցիս թէ՝ Չեմ հաճեալ ընդ քեզ, ահաւասիկ կամ, արասցէ ինձ որպէս հաճոյ իցէ առաջի աչաց նորա։ 27Եւ ասէ արքայ ցՍադովկ քահանայ. Տեսէք, զի դու դառնաս՝՝ խաղաղութեամբ ի քաղաք, եւ Աքիմաաս որդի քո եւ Յովնաթան որդի Աբիաթարայ՝ երկոքին որդիք ձեր ընդ ձեզ։ 28Եւ ահա ես բանակիցիմ յՌաբովթ անապատին, մինչեւ եկեսցէ զրոյց ի ձէնջ պատմել ինձ։ 29Եւ դարձուցին Սադովկ եւ Աբիաթար զտապանակն յԵրուսաղէմ, եւ նստաւ՝՝ անդ։

30Եւ Դաւիթ ելանէր ընդ զառ ի վերն Ձիթենեաց, ելանէր եւ լայր, եւ զգլուխ իւր ծածկեալ. եւ ինքն երթայր բոկ. եւ ամենայն ժողովուրդն ընդ նմա ձորձ զգլխով, այր իւրաքանչիւր ելանէին եւ լային։ 31Ազդ եղեւ Դաւթի եւ ասեն. Եւ Աքիտոփէլ ընդ ժողովեալսն առ Աբիսողոմայ է։ Եւ ասէ Դաւիթ. Ցրեա զխորհուրդն Աքիտոփելայ, Տէր Աստուած իմ։ 32Եւ եհաս Դաւիթ ի Հռովս ուր եպագն երկիր Աստուծոյ. եւ ահա ընդ առաջ նորա Քուսի Արաքացի բարեկամ Դաւթի՝՝ պատառեալ զպատմուճան իւր եւ հող ի գլուխ նորա։ 33Եւ ասէ ցնա Դաւիթ. Եթէ անցանիցես ընդ իս՝ բեռն լինիս ինձ. 34ապա թէ դարձցիս ի քաղաք, եւ ասասցես ցԱբիսողոմ, եթէ՝ Անցին եղբարք քո, եւ արքայ կաթոգին էր զկնի իմ, եւ անց հայր քո. եւ արդ՝՝ ծառայ քո եմ, արքայ, եւ թող կացից առաջի քո.՝՝ ծառայ հօր քո էի յայնժամ, եւ արդ քո ծառայ եմ ես, արքայ. եւ ցրեսցես յինէն զխորհուրդն Աքիտոփելայ։ 35Եւ ահա ընդ քեզ Սադովկ եւ Աբիաթար քահանայք. եւ եղիցի բան զոր լսիցես ի տանէ արքայի՝ պատմեսջիր Սադովկայ եւ Աբիաթարու քահանայից։ 36Եւ ահա են ընդ նոսա երկոքեան որդիք իւրեանց, Աքիմաաս որդի Սադովկայ եւ Յովնաթան որդի Աբիաթարայ. եւ առաքեսջիք ի ձեռն նոցա առ իս զամենայն բան զոր եւ լսիցէք։ 37Եւ եմուտ Քուսի բարեկամ Դաւթի ի քաղաքն. եւ Աբիսողոմ մտանէր ի քաղաքն։