ԷԳ.

1Յերիցուէ առ Գայիոս սիրելի, զոր եսդ սիրեմ ճշմարտութեամբ։ 2Սիրելի, վասն ամենայն իրաց քոց յաջողութեան եւ առողջութեան աղօթս առնեմ. որպէս է իսկ յաջողութիւն անձինդ քո։ 3Յոյժ ուրախ եղէ ի գալ եղբարց եւ լինել վկայ քոյոյ ճշմարտութեանդ, որպէս գնասդ դու ճշմարտութեամբ։ 4Մեծ եւս ինչ ուրախութիւն քան զայս ոչ ունիմ, զի լսեմ եթէ իմ որդեակքն ճշմարտութեամբ գնան։ 5Սիրելի, հաւատարիմ գործես զայդ, զոր եթէ առնիցես առ եղբարս՝ զդոյն եւ առ օտարս. 6որք վկայեցին քոյոյ սիրոյդ առաջի եկեղեցւոյ. որոց բարիս արարեալ յուղարկես արժանիս Աստուծոյ։ 7Զի վասն անուանն ելին, եւ ոչինչ յումեքէ առնուն զհեթանոսականացն՝՝։ 8Մեք այսուհետեւ պարտիմք ընդունել զայնպիսիսն, զի գործակիցք լիցուք ճշմարտութեանն։

ԷԴ.

9Գրեցի ինչ եկեղեցւոյն. այլ որ յառաջադէմն ի նոցանէ է Դիոտրեփէս, ոչ ընդունի զմեզ։ 10Վասն այսորիկ եթէ եկից, յիշեցուցից զգործս նորա զոր առնէ, բանիւք չարօք շատխօսութեան առնէ զմեզ աշխատ. եւ ոչ այսոքիւք շատացեալ, ոչ ինքն ընդունի զեղբարս, եւ զայնոսիկ որ ընդունինն՝ արգելու, նա՝ եւ յեկեղեցւոյ եւս հանէ։ 11Սիրելի, մի՛ լիցիս նմանող չարի, այլ բարւոյ. զի որ զբարին առնէ՝ յԱստուծոյ է. եւ որ զչարիս գործէ՝ նա ոչ ետես երբեք զԱստուած։ 12ԶԴեմետրեայ վկայեալ է յամենեցունց եւ յեկեղեցւոյն՝՝ եւ ի ճշմարտութենէն, եւ մեք վկայեմք. եւ դու գիտես զի ճշմարիտ է մեր վկայութիւնն։

13Բազում ինչ ունէի գրել քեզ, այլ ոչ կամիմ քարտիսիւ եւ դեղով գրել՝՝. 14զի ակն ունիմ ի մօտոյ իսկ տեսանել զքեզ, եւ բերան ի բերան խօսել։ 15Խաղաղութիւն ընդ քեզ. ողջոյն տան քեզ սիրելիք. ողջոյն տաջիր սիրելեաց մերոց իւրաքանչիւր յանուանէ։