1Եւ եթէ լինիցի հակառակութիւն ի մէջ մարդկան, մատիցեն յատեան եւ դատեսցին. եւ արդարացուսցեն զարդարն եւ պարտաւորեսցեն զամպարիշտն։ 2Եւ եղիցի եթէ արժանի իցէ գանի ամպարիշտն, նստուսցեն զնա առաջի դատաւորացն՝՝, եւ հարցեն զնա առաջի նոցա ըստ ամպարշտութեան նորա 3թուով քառասուն՝՝, եւ այլ մի՛ յաւելուցուն. ապա թէ յաւելուցուն հարկանել զնա աւելի քան զայն, անարգութիւն լիցի եղբօրն քում առաջի քո։

4Մի՛ կապեսցես զցռուկ եզին կալոտւոյ։

5Եւ եթէ բնակեսցեն եղբարք ի միասին, եւ մեռանիցի մի ոք ի նոցանէ, եւ զաւակ ոչ իցէ նորա, մի՛ լինիցի կին մեռելոյն արտաքոյ առն ումեք որ մերձաւոր չիցէ նորա՝՝. այլ եղբայր առն իւրոյ մտցէ առ նա, եւ առցէ զնա իւր կնութեան, եւ բնակեսցէ ընդ նմա՝՝. 6եւ եղիցի մանուկն որ ծնանիցի՝ հաստատեալ յանուն վախճանելոյն. եւ մի՛ ջնջեսցի անուն նորա յԻսրայելէ։ 7Ապա թէ ոչ կամիցի այրն առնուլ զկին եղբօր իւրոյ, ելցէ կինն ի դուռն անդր առ ծերակոյտն եւ ասասցէ. Ոչ կամի եղբայր առն իմոյ կանգնել զանուն եղբօր իւրոյ ի մէջ Իսրայելի։ 8Եւ կոչեսցեն զնա ծերակոյտ քաղաքին իւրոյ, եւ խօսեսցին ընդ նմա. եւ նա կացցէ եւ ասիցէ. Ոչ կամիմ առնուլ զդա։ 9Եւ մատուցեալ կին եղբօր նորա առաջի ծերոցն, հանցէ զկօշիկ մի յոտանէ նորա, եւ թքցէ ընդ երեսս նորա, եւ պատասխանի տուեալ ասասցէ. Այսպէս արասցեն առն որ ոչ շինիցէ զտուն եղբօր իւրոյ։ 10Եւ կոչեսցի անուն նորա ի մէջ Իսրայելի Տուն բոկացելոյ։

11Եւ եթէ կռուեսցին արք ընդ միմեանս, այր ընդ եղբօր իւրում, եւ մատուցեալ կին միոյ ի նոցանէ թափել զայր իւր ի ձեռաց այնորիկ որ հարկանիցէն զնա, եւ ձգեալ զձեռն բուռն հարկանիցէ զերկուորեաց նորա, 12հատանիցես զձեռն, եւ մի՛ խնայեսցէ ի նա ակն քո։

13Մի՛ լինիցի յամանի քում կշիռ եւ կշիռ, մեծ կամ փոքր։ 14Եւ մի՛ լինիցի ի տան քում չափ եւ չափ, մեծ կամ փոքր։ 15Կշիռ ստոյգ եւ արդար եղիցի քեզ, եւ չափ ստոյգ եւ արդար եղիցի քեզ, զի բազմօրեայ եղիցիս ի վերայ երկրին զոր Տէր Աստուած քո տացէ քեզ ի ժառանգութիւն։ 16Զի պիղծ է Տեառն Աստուծոյ քում ամենայն որ առնէ զայն, եւ ամենայն որ առնէ զանիրաւութիւն։

17Յուշ լիցի քեզ զոր արարն քեզ Ամաղէկ ի ճանապարհի ելանելոյն քո յԵգիպտոսէ. 18զիարդ ընդդէմ եկաց քեզ ի ճանապարհին, եւ կրճատեաց զվերջն քո եւ զաշխատեալսն զկնի քո, եւ դու քաղցեալ եւ աշխատեալ էիր, եւ ոչ երկեաւ յԱստուծոյ։ 19Եւ եղիցի յորժամ հանգուցանիցէ զքեզ Տէր Աստուած քո յամենայն թշնամեաց քոց որ շուրջ զքեւ իցեն յերկրին զոր Տէր Աստուած քո տացէ քեզ վիճակաւ ի ժառանգութիւն, ջնջեսցես զանուն Ամաղեկայ ի ներքոյ երկնից, եւ մի՛ մոռասցիս։