1Եւ պատուիրեաց Մովսէս եւ ծերակոյտն Իսրայելի եւ ասեն. Պահեցէք զամենայն պատուիրանս զոր ես պատուիրեմ ձեզ այսօր։ 2Եւ եղիցի յաւուր յորում անցանիցես ընդ Յորդանան, յերկիրն զոր Տէր Աստուած քո տացէ քեզ՝ կանգնեսցես անդ քարինս մեծամեծս, եւ բռեսցես զնոսա բռով. 3եւ գրեսցես ի վերայ քարանցն զամենայն պատգամս օրինացս այսոցիկ, յորժամ անցանիցէք ընդ Յորդանան, ի ժամանակի իբրեւ մտանիցէք՝՝ յերկիրն զոր Տէր Աստուած հարցն ձերոց՝՝ տացէ քեզ, երկիր՝ որ բղխէ զկաթն եւ զմեղր. որպէս խոստացաւ Տէր Աստուած հարցն քոց տալ քեզ։ 4Եւ եղիցի յորժամ անցանիցէք ընդ Յորդանան, կանգնեսջիք զքարինսն զայնոսիկ զոր ես պատուիրեմ ձեզ այսօր՝ ի լերինն Գեբաղ, եւ բռեսջիք զնոսա բռով։ 5Եւ շինեսցես անդ սեղան Տեառն Աստուծոյ քո, սեղան ի քարանց. եւ մի՛ հպեսցի ի նոսա երկաթ. 6բոլորակ վիմօք շինեսցես զսեղանն Տեառն Աստուծոյ քո. եւ հանցես ի վերայ նորա ողջակէզս Տեառն Աստուծոյ քում. 7եւ զենցես անդ զենումն փրկութեան Տեառն Աստուծոյ քում, եւ կերիցես եւ յագեսցիս՝՝ անդ, եւ ուրախ լիցիս առաջի Տեառն Աստուծոյ քո. 8եւ գրեսցես ի վերայ քարանցն զամենայն զօրէնս զայսոսիկ յայտնապէս յոյժ։

9Եւ խօսեցաւ Մովսէս եւ քահանայքն եւ Ղեւտացիք ընդ ամենայն Իսրայելի եւ ասեն. Լուռ լեր եւ լուր, Իսրայէլ. յաւուր յայսմիկ եղեր ժողովուրդ Տեառն Աստուծոյ քո. 10եւ լուիցես ձայնի Տեառն Աստուծոյ քո, եւ արասցես զամենայն պատուիրանս նորա եւ զիրաւունս նորա զոր ես պատուիրեմ քեզ այսօր։

11Եւ պատուիրեաց Մովսէս ժողովրդեանն յաւուր յայնմիկ եւ ասէ. 12Սոքա կացցեն օրհնել զժողովուրդն ի լերինն Գարիզին, յորժամ անցանիցէք ընդ Յորդանան. Շմաւոն, Ղեւի, Յուդա, Իսաքար, Յովսէփ եւ Բենիամին. 13եւ սոքա կացցեն ի վերայ անիծիցն ի լերինն Գեբաղ. Ռուբէն, Գադ, Ասեր, Զաբուղոն, Դան եւ Նեփթաղին։

14Եւ պատասխանի տուեալ Ղեւտացւոցն ասիցեն մեծաձայն ամենայն Իսրայելի, 15անիծեալ լիցի մարդն որ արասցէ դրօշեալ եւ ձուլածոյ, զի պիղծ է Տեառն ձեռագործ ճարտարի, եւ դնիցէ զնա ի թաքստեան. եւ պատասխանի տուեալ ժողովրդեանն՝ ասասցեն. Եղիցի։ 16Անիծեալ՝ որ անարգեսցէ զհայր իւր կամ զմայր իւր. եւ ասասցէ ամենայն ժողովուրդն. Եղիցի։ 17Անիծեալ՝ որ փոխեսցէ զսահմանս ընկերի իւրոյ. եւ ասասցէ ամենայն ժողովուրդն. Եղիցի։ 18Անիծեալ՝ որ խոտորիցէ զիրաւունս եկին եւ որբոյ եւ այրւոյ. եւ ասասցէ ամենայն ժողովուրդն. Եղիցի։ 19Անիծեալ՝ որ մոլորեցուսցէ զկոյրն ի ճանապարհէ. եւ ասասցէ ամենայն ժողովուրդն. Եղիցի։ 20Անիծեալ՝ որ ննջեսցէ ընդ կնոջ հօր իւրոյ, զի յայտնեաց զաներեւոյթս հօր իւրոյ. եւ ասասցէ ամենայն ժողովուրդն. Եղիցի։ 21Անիծեալ՝ որ ննջեսցէ ընդ ամենայն անասնոյ. եւ ասասցէ ամենայն ժողովուրդն. Եղիցի։ 22Անիծեալ՝ որ ննջեսցէ ընդ քեռ իւրում, որ առ ի հօրէ իցէ կամ առ ի մօրէ. եւ ասասցէ ամենայն ժողովուրդն. Եղիցի։ 24Անիծեալ՝ որ հարկանիցէ զընկեր իւր նենգութեամբ. եւ ասասցէ ամենայն ժողովուրդն. Եղիցի։ 25Անիծեալ՝ որ առնուցու կաշառ հարկանել զանձն արեան արդարոյ՝՝. եւ ասասցէ ամենայն ժողովուրդն. Եղիցի։ 26Անիծեալ ամենայն մարդ՝ որ ոչ կացցէ յամենայն բանս օրինացս այսոցիկ առնել զսոսա. եւ ասասցէ ամենայն ժողովուրդն. Եղիցի։