8Եւ աղաչեաց խնդրուածովք զՏէր, ի միտ առեալ եւ յիշեալ զգործս մեծամեծս Տեառն, եւ ասէ. 9Տէր Աստուած, թագաւոր ամենակալ, զի քում հրամանիդ սպասէ ամենայն ոք. ոչ ոք է որ ընդդէմ կայ քեզ՝ յորժամ կամիս դու կեցուցանել զժողովուրդ քո զԻսրայէլ։ 10Զի դու Տէր արարեր զերկինս եւ զերկիր եւ զամենայն սքանչելիս. 11եւ դու տիրես ի վերայ ամենայնի, եւ ոչ ոք է որ հակառակ կայ քում տէրութեանդ, որ զամենայն գիտես. 12զի ոչ հպարտութեամբ ինչ եւ ոչ ամբարտաւանութեամբ եւ ոչ թշնամանօք արարի զայս չպագանելս իմ երկիր ամբարտաւանին Համանայ. 13այլ հաճէի եւ կամէի պագանել զգարշապարս ոտից նորա առ ի փրկութիւն տանս Իսրայելի։ 14Այլ արարից զայս, զի մի՛ տաց զփառս մարդոյ, այլ քեզ միայն ճշմարտիդ Աստուծոյ. եւ ոչ երկիր պագից ումեք՝ բայց քեզ Տեառն իմում. եւ ոչ արարի զայս ամբարտաւանութեամբ։ 15Արդ, Տէր Աստուած Աբրահամու, խնայեա դու ի ժողովուրդ քո, զի յարուցեալ են ի վերայ մեր ապականիչք, զի ցանկացեալ են կորուսանել զժառանգութիւն քո որ էր ի սկզբանէ. 16մի՛ անտես առներ զբաժին քո զոր դու քեզէն փրկեցեր յերկրէն Եգիպտացւոց։ 17Լուր, Տէր, ձայնի աղօթից իմոց, եւ քաւիչ լեր ժառանգութեան քում, եւ դարձո զսուգս մեր յուրախութիւն. զի կենդանիքս օրհնեսցուք զանունդ քո մեծ, Տէր. եւ մի՛ ապականեր զբերան զայն որ օրհնէն զքեզ։ 18Եւ ամենայն Իսրայէլ կարդացին առ Տէր յամենայն զօրութենէ իւրեանց. զի մահն առաջի նոցա էր։