1Եւ արասցես խորան տասնփեղկեան, ի բեհեզոյ մանելոյ եւ ի կապուտակէ եւ ի ծիրանւոյ եւ ի կարմրոյ կրկնելոյ. քերոբ՝ գործ անկուածոյ՝՝ գործեսցես զնոսա։ 2Երկայնութիւն միոյ փեղկին ի քսան եւ յութ կանգնոյ, եւ լայնութիւն ի չորից կանգնոց փեղկի միոյ լինիցի. չափ՝ նոյն եղիցի ամենայն փեղկիցն։ 3Հինգ փեղկ ընդ միմեանս կցեալ, եւ հինգ եւս այլ ընդ միմեանս խառնեալ։ 4Եւ արասցես ճարմանդս կապուտակեայս առ եզերբ միոյ փեղկին ի միոջէ կողմանէ ի խառնուածս. նոյնպէս արասցես եւ առ եզերբ արտաքնոյ փեղկին, երկրորդի խառնուածոյն։ 5Յիսուն ճարմանդ արասցես միում փեղկի, եւ յիսուն ճարմանդ արասցես ի կողմանէ փեղկին ըստ երկրորդի խառնուածոյն. դէմ ընդ դէմ միմեանց իւրաքանչիւր խառնիցին ճարմանդքն։ 6Եւ արասցես յիսուն օղս ոսկիս, եւ խառնեսցես զփեղկսն ընդ միմեանս աղխիւքն. եւ եղիցի խորան մի։

7Եւ արասցես վերնափեղկս մազեղէնս նուարտան խորանին, մետասան փեղկ գործեսցես զնոսա։ 8Երկայնութիւն միոյ փեղկի՝ լինիցի յերեսուն կանգնոյ. եւ լայնութիւն միոյ փեղկի ի չորից կանգնոց. չափ նոյն եղիցի մետասանեցունց փեղկիցն։ 9Եւ խառնեսցես ընդ միմեանս զհինգ փեղկսն ի միասին, եւ զվեց փեղկսն ի միասին. եւ կրկնեսցես զվեցերորդ փեղկն առաջոյ կողմանէ խորանին։ 10Եւ արասցես ճարմանդս յիսուն առ եզերբ միոյ փեղկին ի մէջ խառնուածոյն. եւ յիսուն ճարմանդ արասցես առ եզերբ փեղկին երկրորդի խառնուածոյն։ 11Եւ արասցես օղս պղնձիս յիսուն, եւ խառնեսցես զօղսն ընդ ճարմանդսն, եւ կցեսցես զփեղկսն, եւ եղիցին մի։ 12Եւ դիցես զաւելորդ փեղկիցն ի ներքոյ խորանին. կիսով փեղկիւն աւելորդաւ մնացելով ծածկեսցես զապարումս փեղկից խորանին յետոյ կողմանէ՝՝, 13կանգնաւ՝ յայսմ կողմանէ, եւ կանգնաւ՝ յայնմ կողմանէ, յաւելորդէ երկայնութեան փեղկից խորանին եղիցի ծածկել զապարումս խորանին աստի անտի։ 14Եւ արասցես զվիժակս խորանին ի շիկակարմիր մորթոյ խոյոց, եւ ծածկելիս՝ ի կապուտակ՝՝ մորթոյ ի վերուստ։

15Եւ արասցես զսիւնակս խորանին յանփուտ փայտից կանգնաւորս։ 16Ի տասն կանգնոյ զերկայնութիւն միոյ սիւնակին առնիցես, եւ ի միոջէ կանգնոյ եւ ի կիսոյ զթանձրութիւն եւ՝՝ զլայնութիւն միոյ սիւնակին։ 17Եւ երկուս սփռիչս միում սիւնակի՝ ագուցեալ ընդ միմեանս՝՝. այնպէս արասցես ամենայն սիւնակաց խորանին։ 18Եւ արասցես քսան սիւնակս խորանին ի հիւսիսոյ կողմանէ՝՝։ 19Եւ քառասուն խարիսխս արծաթիս արասցես քսանեցունց սեանցն՝՝. երկու խարիսխք առ մի սիւն յերկոցունց կողմանց՝՝, եւ երկու խարիսխք առ մի սիւն յերկոցունց կողմանց խորանին՝՝։ 20Եւ յերկրորդէ կողմանէ խորանին ընդ հարաւ քսան սիւն՝՝, 21եւ քառասուն խարիսխք նոցա արծաթիք. երկու խարիսխք առ մի սիւն յերկոցունց կողմանց՝՝։ 22Եւ յետուստ խորանին ի ծովակողմն կուսէ՝՝ արասցես վեց սիւն։ 23Եւ երկուս սիւնս արասցես յանկիւնս խորանին ի թիկանց կողմանէ։ 24Եւ եղիցին հասարակ ի ներքուստ, եւ ըստ նմին օրինակի լինիցին զոյգք խոյակաց նորա ի մի խառնուած. նոյնպէս արասցես երկոցունց անկեանցն կանգնաւորս։ 25Եւ եղիցին ութ սիւն. եւ խարիսխք նոցա արծաթիք՝ վեշտասան խարիսխք. երկու խարիսխք առ մի սիւն յերկոցունց կողմանց նորա, եւ երկու խարիսխք առ մեւս եւս սիւն՝՝։ 26Եւ արասցես նիգս յանփուտ փայտից. հինգ նիգ առ մի սիւն՝՝ ի միոջէ կողմանէ խորանին, 27եւ հինգ նիգ առ մեւս եւս սիւն՝՝ յերկրորդ կողմանէ խորանին. եւ հինգ նիգ առ մի սիւն՝՝ ի թիկանց խորանին ընդ ծովակողմն։ 28Եւ նիգ մի ի մէջ սեանցն՝ թափանցանց ի միոջէ ի մեւս կողմն։ 29Եւ զսիւնսն պատեսցես ոսկւով. եւ արասցես օղս ոսկիս՝ յորս ագուցանիցես զնիգսն. եւ պատեսցես զնիգսն ոսկւով։

30Եւ կանգնեսցես զխորանն ըստ օրինակին որ ցուցաւ քեզ ի լերին անդ։

31Եւ արասցես վարագոյր ի կապուտակէ եւ ի ծիրանւոյ եւ ի կարմրոյ մանելոյ եւ ի բեհեզոյ նիւթելոյ. գործ անկուածոյ գործեսցես զնա քերուբ՝՝։ 32Եւ դիցես զնա ի վերայ չորեցունց անփուտ եւ ոսկիապատ սեանցն. եւ խոյակք նոցա ոսկիք, եւ խարիսխք նոցա արծաթիք։ 33Եւ ձգեսցես զվարագոյրն սիւնէ ի սիւն՝՝, եւ տարցիս ի ներքս քան զվարագոյրն զտապանակ վկայութեանն. եւ անջրպետիցէ ձեզ վարագոյրն ի մէջ սրբութեանն, եւ ի մէջ սրբութեան սրբութեանցն։ 34Եւ ծածկեսցես վարագուրաւն զտապանակ՝՝ վկայութեանն ի սրբութիւն սրբութեանցն։ 35Եւ դիցես զսեղանն արտաքոյ վարագուրին, եւ զաշտանակն յանդիման սեղանոյն՝ ի կողմանէ խորանին ընդ հարաւ. եւ զսեղանն դիցես ի կողմանէ խորանին ընդ հիւսիսի։

36Եւ արասցես սրահակ դրան խորանին ի կապուտակէ եւ ի ծիրանւոյ եւ ի կարմրոյ մանելոյ եւ ի բեհեզոյ նիւթելոյ, գործ նկարակերպ։ 37Եւ արասցես վարագուրին հինգ սիւնակ յանփուտ փայտից, եւ օծցես զնոսա ոսկւով, եւ խոյակք նոցա ոսկիք. եւ ձուլեսցես նոցա հինգ խարիսխ պղնձի։