1Եւ արար զսեղանն պղնձապատ ի բուրուառացն պղնձեաց՝ որ էին ի ձեռս արանցն ապստամբաց հանդերձ ժողովրդեամբն Կորխայ,՝՝ յանփուտ փայտից. ի հինգ կանգնոյ զերկայնութիւն նորա, եւ ի հինգ կանգնոյ զլայնութիւն նորա, չորեքկուսի, եւ յերից կանգնոց բարձրութիւն նորա։ 2Արար եւ զեղջեւրս նորա ի վերայ չորեցունց անկեանց իւրոց. անդստին ի նմանէ էին եղջեւրք նորա, եւ պատեաց զնոսա պղնձով։ 3Եւ արար զամենայն կահ սեղանոյն, զխարիսխսն եւ զբլշակն եւ զտաշտսն եւ զմսահանսն եւ զբուրուառսն. եւ զամենայն կահ նորա արար պղնձի։ 4Եւ արար զգահաւորակս սեղանոյն, գործ վանդակագործ պղնձի ի բուրուառացն, ի ներքուստ մինչեւ ցմէջս։ 5Եւ եդ նմա չորս օղամանեակս պղնձիս ի չորեցունց կողմանց գահաւորակի սեղանոյն՝ ագոյցս նգացն։ 6Եւ արար զլծակսն յանփուտ փայտից, եւ պատեաց զնոսա պղնձով։ 7Եւ ագուցին զլծակսն յօղամանեակսն ի կողմանս սեղանոյն, բառնալ զսեղանն նոքօք. բովանդակ տախտակամած գործեաց զնա։

8Եւ արար զաւազանն պղնձի եւ զխարիսխն նորա պղնձի՝ ի հայելեաց կանանց ուխտաւորաց, որք պահեցին պահս՝՝ առ դրան խորանին վկայութեան՝ յաւուր յորում եհար զխորանն՝՝։

9Եւ արար զսրահն որ հայէր ընդ հարաւ. եւ՝՝ զառագաստ սրահին ի բեհեզոյ մանելոյ հարեւր առ հարեւր՝՝։ 10Եւ սիւնք նոցա քսան, եւ խարիսխք նոցա պղնձիք քսան. եւ զարդք սեանցն եւ խոյակք նոցա արծաթիք։ 11Եւ ընդ կողմն հիւսիսոյ հարեւր առ հարեւր՝՝, եւ սիւնք նոցա քսան, եւ խարիսխք նոցա պղնձիք քսան. եւ զարդք սեանցն եւ դրուագք նոցա արծաթիք։ 12Եւ ընդ ծովակողմն սրահք՝՝ ի յիսուն կանգնոյ. եւ սիւնք նոցա տասն, եւ խարիսխք նոցա տասն. եւ զարդք սեանցն եւ դրուագք նոցա արծաթիք։ 13Եւ ընդ կողմն արեւելից ի յիսուն կանգնոյ։ 14Եւ առագաստքն ի հնգետասան կանգնոյ ի թիկանց, եւ սիւնք նոցա երեք, եւ խարիսխք նոցա երեք։ 15Եւ յերկրորդ թիկունսն առ դրամբ սրահին, սրահք՝՝ ի հնգետասան կանգնոյ, եւ սիւնք նոցա երեք, եւ խարիսխք նոցա երեք։ 16Ամենայն սրահք խորանին՝՝ շուրջանակի ի բեհեզոյ մանելոյ։ 17Եւ խարիսխք նոցա պղնձիք, եւ դրուագք սեանցն եւ խոյօղք՝՝ նոցա արծաթիք, եւ խոյակք նոցա արծաթապատք, եւ սիւնքն արծաթապատք, ամենայն սիւնք սրահին՝՝։ 18Եւ սրահակք դրան սրահին՝ գործ նկարակերպ ի կապուտակէ եւ ի ծիրանւոյ եւ ի կարմրոյ մանելոյ եւ ի բեհեզոյ նիւթելոյ. ի քսան կանգնոյ երկայնութիւն, եւ ի հնգետասան կանգնոյ բարձրութիւն եւ լայնութիւն՝ հասարակ ըստ առագաստից սրահին։ 19Եւ սիւնք նոցա չորք, եւ խարիսխք նոցա պղնձիք չորք, եւ խոյօղք նոցա արծաթիք, եւ խոյակք նոցա արծաթապատք։ 20Եւ ամենայն ցիցք սրահին եւ խորանին շուրջանակի պղնձիք։

21Եւ այս էր պայման խորանին վկայութեան, որպէս հրաման ետ Մովսիսի կազմել զպաշտօն՝՝ Ղեւտացւոցն ի ձեռն Իթամարայ որդւոյ Ահարոնի քահանայի։ 22Եւ Բեսելիէլ Ուրիեան որդի Ովրայ յազգէ Յուդայ արար որպէս հրաման ետ Տէր Մովսիսի։ 23Եւ ապա Եղիաբ Աքիսամայ յազգէ Դանայ, որ ճարտարապետէր զոստայնանկութիւն եւ զասղնագործութիւն եւ զնկարակերտութիւն, ի կապուտակէ եւ ի ծիրանւոյ եւ ի կարմրոյ մանելոյ եւ ի բեհեզոյ նիւթելոյ։

24Ամենայն ոսկւոյն որ գործեցաւ ի գործն, ըստ ամենայն գործոյ սրբութեանցն, եղեւ կշիռ ոսկւոյ նուիրացն քսան եւ ինն տաղանդ, եւ եւթն հարեւր եւ երեսուն սկիղ՝ ըստ սրբութեան սկեղն։ 25Եւ արծաթոյ նուէրք, յանցելոց արանց ժողովրդեանն ի հանդիսի, հարեւր տաղանդ, եւ հազար եւ եւթն հարեւր եւ եւթանասուն եւ հինգ սիկղ՝ ըստ սրբութեան սկեղն։ 26Դրամ մի առ գլուխ, կէս սկեղ ըստ սրբութեան սկեղն, ամենայն որ անցանէր ի հանդիսի անդ ի քսանամենից եւ ի վեր, վեց հարեւր հազար եւ երեք հազարք եւ հինգ հարեւր եւ յիսուն։ 27Եւ եղեւ հարեւր տաղանդ արծաթոյ ի ձոյլ հարեւր խոյակաց խորանին, եւ ի խոյակս վարագուրին. հարեւր տաղանդ ի հարեւր խոյակ, տաղանդ մի առ խոյակ՝՝։ 28Եւ զհազար եւ զեւթն հարեւր եւ զեւթանասուն եւ հինգ սիկղն գործեաց ի խոյօղս սեանցն, եւ պատեաց ոսկւով զխոյակս նոցա, եւ զարդարեաց զնոսա։ 29Եւ պղինձ նուիրացն եւթանասուն տաղանդ, եւ երկու հազար եւ չորեք հարեւր սիկղ։ 30Եւ արար անտի զխարիսխս դրան խորանին վկայութեան, եւ զսեղանն պղնձի, եւ զգահաւորակ սեղանոյն պղնձի, եւ զամենայն զսպաս սեղանոյն, 31եւ զխարիսխս սրահին շուրջանակի, եւ զխարիսխս դրան սրահին, եւ զամենայն զցիցս խորանին, եւ զամենայն զցիցս սրահին շուրջանակի. եւ զապարումսն ի կապուտակէ եւ ի ծիրանւոյ եւ ի կարմրոյ մանելոյ։՝՝