Տեսիլ Եզեկիելի մարգարէի։՝՝

1Եւ եղեւ յամին երեսներորդի, յամսեանն չորրորդի, որ օր հինգ էր ամսոյն, եւ էի ես ի մէջ գերութեանն առ ափն Քոբար գետոյ, եւ բացան երկինք, եւ տեսի տեսիլ Աստուծոյ։ 2Որ օր հինգ էր ամսոյն, այն ամ հինգերորդ էր գերութեանն Յովաքինայ արքայի, 3եւ եղեւ բան Տեառն առ Եզեկիէլ քահանայ՝ որդի Բուզեայ, յերկրին Քաղդէացւոց ի վերայ Քոբար գետոյ. եւ անդ եղեւ ի վերայ իմ ձեռն Տեառն։

4Եւ տեսի եւ ահա հողմ վերացեալ՝՝ գայր ի հիւսիսոյ, ամպ մեծ ի կողման նորա՝՝, եւ հուր փայլատակէր ի նմանէ. եւ լոյս շուրջ զնովաւ, եւ ի մէջ նորա իբրեւ զտեսիլ բազմագունի ականց՝ եւ ճառագայթք ի նմա՝՝։ 5Եւ ի մէջ նորա կերպարանք չորից կենդանեաց, եւ այս տեսիլ նոցա. կերպարանք մարդոյ ի վերայ նոցա։ 6Եւ չորք դէմք միոյ, եւ չորք թեւք միոյ միոյ ի նոցանէ։ 7Եւ բարձք նոցա բարձք ուղղորդք, եւ ոտք նոցա թեւաւորք էին,՝՝ եւ կճղակք նոցա իբրեւ զկճղակս որթուց. եւ կայծակունք թօթափէին ի նոցանէ իբրեւ ի փայլատականց պղնձոյ. եւ թեւք իւրեանց երագունք էին։՝՝ 8Եւ ձեռն մարդոյ ի ներքոյ թեւոց նոցա ի չորեսին կողմանս նոցա. եւ երեսք նոցա եւ թեւք՝ չորեցունց։ 9Ընդ միմեանս թեւակցէին խառնեալ. եւ զերեսս իւրեանց ի գնալն յետս ընդդէմ ոչ դարձուցանէին, իւրաքանչիւր հանդէպ երեսաց իւրեանց գնային։ 10Եւ կերպարանք երեսաց նոցա՝ կերպարանք մարդոյ եւ կերպարանք առիւծու յաջմէ չորեցունց, եւ կերպարանք եզին եւ կերպարանք արծուոյ ի ձախմէ՝՝ չորեցունց։ 11Եւ այս կերպարանք նոցա. եւ թեւք նոցա տարածեալ ի վերուստ չորեցունց. իւրաքանչիւր երկու երկու խառնեալ ընդ միմեանս, եւ երկու երկու ծածկէին ի վերուստ զմարմինս իւրեանց։ 12Եւ իւրաքանչիւր հանդէպ երեսաց իւրեանց գնային. յոր կողմն դիմէր հողմն՝ գնային, եւ յետս ընդդէմ ոչ դառնային ի գնացս իւրեանց։ 13Եւ ի մէջ գազանացն՝ տեսիլ՝՝ իբրեւ զկայծականց հրոյ բորբոքելոյ, եւ իբրեւ զտեսիլ ղամբարաց խառնելոց ի մէջ գազանացն, եւ լոյս հրոյ. եւ ի հրոյ անտի փայլատակունք հատանէին։ 14Եւ գազանքն երագս ընթանային, եւ թեթեւս՝՝ դառնային ի նմանութիւն արեգական։

15Եւ տեսանէի եւ ահաւասիկ անիւ մի յերկրի զհետ գազանացն չորեցունց՝՝։ 16Եւ կերպարանք անուոցն եւ արար նոցա՝ իբրեւ զտեսիլ ականց Թարսսի. եւ կերպարանք չորեցունց՝՝ եւ տեսիլ նոցա եւ գործուած իւրեանց՝ որպէս թէ շրջիցի անիւ ի մէջ անուոյ։ 17Ի չորեսին կողմանս իւրեանց գնային, եւ յետս ընդդէմ ոչ դառնային ի թիկունս իւրեանց. 18եւ բարձունք էին. Հայէի ընդ նոսա եւ տեսանէի զի՝՝ լի էին աչօք թիկունք նոցա շուրջ զչորեքումբք։ 19Եւ ի գնալ գազանացն՝ գնային եւ անիւքն ընդ նոսա, եւ ի վերանալ գազանացն յերկրէ՝ վերանային եւ անիւքն։ 20Ընդ ո՛ր կողմ դիմէր ամպն եւ հողմն՝ երթային գազանքն՝՝ եւ անիւքն ընդ նոսին վերանային. զի ոգի կենդանի գոյր յանիւսն։ 21Ի գնալն նոցա գնային, եւ ի կալն նոցա զտեղի առնուին, եւ ի վերանալ նոցա յերկրէ՝ եւ անիւքն ընդ նոսին վերանային. զի ոգի կենդանի գոյր յանիւսն։ 22Եւ նմանութիւն հաստատութեան ի վերայ գլխոյ գազանացն իբրեւ զտեսիլ ական վանի՝ տարածեալ ի վերայ թեւոց նոցա ի վերուստ։ 23Եւ ի ներքոյ հաստատութեանն թեւք իւրեանց տարածեալ սաւառնէին ընդ միմեանս. եւ իւրաքանչիւր երկու երկու ծածկէին զմարմինս իւրեանց՝՝։ 24Եւ լսէի զձայն թեւոց նոցա ի սաւառնելն իբրեւ զձայն ջուրց բազմաց, եւ իբրեւ զձայն Աստուծոյ Սադայի. եւ՝՝ ի գնալն իւրեանց՝ ձայն պատգամաց իբրեւ զձայն բանակի. եւ ի կալն իւրեանց՝ յանգչէին թեւք՝՝ իւրեանց։ 25Եւ ահա բարբառ ի վերուստ քան զհաստատութիւնն որ էր ի վերայ գլխոց նոցա՝ ի կալն իւրեանց, եւ յամբառնալն՝՝ զթեւս իւրեանց։ 26Եւ ի վերոյ քան զհաստատութիւնն որ ի վերայ գլխոց նոցա, իբրեւ զտեսիլ ական շափիղայ, նմանութիւն աթոռոյ ի վերայ նորա, եւ ի վերայ աթոռոյն՝՝ նմանութիւն կերպարանաց մարդոյ։ 27Եւ տեսանէի իբրեւ զտեսիլ ական բազմագունի, իբրեւ զտեսիլ հրոյ ի ներքոյ քան զնա շուրջանակի. միջովք չափ ի վեր՝ նմանութիւն արեգական, եւ միջովք չափ ի խոնարհ՝ նմանութիւն հրոյ. եւ լոյսն՝՝ որ շուրջ զնովաւ բակ ունէր. 28իբրեւ տեսիլ աղեղանդ որ ձգի յամպս յաւուրս անձրեւաց, եւ այսպէս ահագին տեսիլ լուսոյ՝՝ շուրջ զնովաւ։ Այս տեսիլ՝ նմանութիւն փառացն Տեառն. իբրեւ տեսի՝ անկայ ի վերայ երեսաց իմոց, եւ լուայ բարբառ որ խօսէր ընդ իս՝