1Եւ եղեւ բան Տեառն առ իս եւ ասէ. 2Որդի մարդոյ, դիր վկայութիւն Երուսաղեմի զանօրէնութեանց նորա. 3եւ ասասցես. Այսպէս ասէ Ադոնայի Տէր ցԵրուսաղէմ. Արմատ քո եւ ծնունդ քո յերկրէն Քանանացւոց, եւ հայր քո Ամովրհացի եւ մայր քո Քետացի։ 4Եւ ծնունդն քո՝ յորում աւուր ծնար, ոչ ոք եհար զպորտ քո, եւ ոչ պնդեցին զստինս քո.՝՝ եւ ջրով ոչ լուացար ի փրկութիւն, եւ աղիւ ոչ յաղեցար, եւ ի խանձարուրս ոչ պատեցար։ 5Եւ ոչ խնայեաց ի քեզ ակն իմ, եւ ոչ արարի քեզ ինչ մի յայսմ ամենայնէ զգուշանալ, թէ գուցէ անցանիցէ ինչ ընդ քեզ. եւ՝՝ ընկեցեալ դնէիր ընդ երեսս դաշտին վասն խոտորնակ մտաց քոց՝՝ յաւուրն յորում ծնար։ 6Անցի առ քեւ, եւ տեսի արեամբ թաթաւեալ, եւ ասացի ցքեզ. Կենդանասջիր յարենէ քումմէ, եւ կեանք քո յարենէ. 7բազմասջիր. քանզի իբրեւ զբոյս ագարակի ետու՝՝ զքեզ. եւ բազմացար եւ մեծացար, եւ եկիր մտեր դու ի քաղաքս քաղաքաց՝՝. ստինք անկան քո, եւ մազք արձակեցան, եւ դու էիր մերկ, խայտառակ։

8Եւ եկի հասի ի վերայ քո, եւ տեսի զքեզ, զի հասեալ էր ժամանակ քո, եւ ժամանակ խախտողաց քոց՝՝. տարածեցի զթեւս իմ ի վերայ քո, եւ ծածկեցի զխայտառակութիւն քո. եւ երդուայ քեզ երդումն, եւ յուխտ մտի ընդ քեզ, ասէ Ադոնայի Տէր, եւ եղեր ինձ։ 9Եւ լուացի զքեզ ջուրբ, եւ սրբեցի զքեզ յարենէ քումմէ, եւ օծի զքեզ իւղով. 10եւ զգեցուցի զքեզ պէսպէսս, եւ ագուցի քեզ զերկնագոյնն, եւ ածի ընդ մէջ քո բեհեզ, եւ արկի զքեւ սնդուս. 11եւ զարդարեցի զքեզ զարդու, եւ եդի ապարանջանս ի ձեռս քո, եւ քառամանեակ ի պարանոց քո. 12եդի քեզ գինդս՝՝, եւ գորշապահանգս յականջս քո, եւ պսակ պարծանաց ի գլուխ քո։ 13Եւ զարդարեցար ի զարդ ոսկւոյ եւ արծաթոյ, եւ հանդերձ քո բեհեզ եւ զառնաւուխտ եւ ճաճանչանաւուխտ. եւ կերար նաշիհ եւ եւղ եւ մեղր, եւ եղեր գեղեցիկ յոյժ յոյժ, եւ գրգեցար ի գրգանս թագաւորութեան՝՝։ 14Եւ ել անուն գեղեցկութեան քո ընդ ամենայն ազգս, զի էր կատարեալ վայելչութիւն գեղոյ քո զոր յօրինեցի ի վերայ քո, ասէ Ադոնայի Տէր։

15Եւ դու գեղապանծ եղեր ի գեղ քո, եւ պոռնկեցար ի հոմանիսն քո. եւ տարածեցեր զպոռնկութիւն քո առ ամենայն անցաւորս, որոց ոչ լինէր այնպիսի ինչ՝՝։ 16Եւ առեր ի հանդերձիցն քոց եւ արարեր քեզ կուռս կարկատունս՝՝, եւ պոռնկեցար ընդ նոսա. եւ մի՛ մտցես անդր, զի ոչ էին եւ ոչ լիցին՝՝։ 17Եւ առեր զսպաս պարծանացն քոց յոսկւոյն իմոյ եւ յարծաթոյն զոր ետու քեզ, եւ արարեր քեզ պատկերս արուականս. եւ պոռնկեցար ընդ նոսա։ 18Եւ առեր զհանդերձն գեղեցիկ քո՝՝ եւ արկեր զնոքօք, եւ զեւղսն իմ եւ զխունկսն եդիր առաջի երեսաց նոցա. 19եւ զհացն իմ զոր ետու քեզ՝ եւ զնաշիհն եւ զեւղ եւ զմեղր զոր ջամբեցի քեզ՝ եդիր առաջի երեսաց նոցա ի հոտ անուշից. եւ եղեւ յետ այնորիկ՝՝, ասէ Ադոնայի Տէր, 20եւ առեր զուստերսն քո եւ զդստերս զոր ինձ ծնար՝ եւ զոհեցեր նոցա ի սատակումն։ Իբրեւ զփո՞քր ինչ համարեցար զպոռնկութիւնն, 21եւ զեներ զորդիսն իմ, եւ արարեր զնոսա նոցա ջնջոցս։ 22Եւ այն անհնարին եղեւ քան զամենայն պոռնկութիւնս եւ պղծութիւնս քո. եւ՝՝ ոչ յիշեցեր զաւուրս տղայութեան քո, ի ժամանակի յորում էիր մերկ եւ խայտառակեալ եւ թաւալեալ յարեան քում, ուստի կենդանացարն։՝՝ 23Եւ եղեւ յետ ամենայն չարեացն քոց՝ (վա՜յ, վա՜յ քեզ, ասէ Ադոնայի Տէր), 24շինեցեր դու քեզ տուն պոռնկութեան, եւ արարեր քեզ բագինս յամենայն հրապարակս քո։ 25Եւ ի գլուխս ամենայն ճանապարհաց քոց շինեցեր զպոռնկոցս քո, եւ ապականեցեր զգեղ երեսաց քոց, եւ լայնեցար ամենայն անցաւորաց ճանապարհի եւ յաճախեցեր զպոռնկութիւնս քո։ 26Եւ պոռնկեցար ընդ որդիսն Եգիպտացւոց՝ սահմանակիցս քո ընդ մեծանդամս, եւ բազմապատիկ պոռնկեցար, զի զիս բարկացուսցես։ 27Արդ ես ձգեցից զձեռն իմ ի վերայ քո եւ բարձից զիրաւունս քո, եւ մատնեցից զքեզ ի ձեռս ատելեաց քոց՝ դստերաց այլազգեացն, որք թիւրէին զքեզ ի ճանապարհէ քումմէ՝՝։

28Ամպարշտեցար եւ՝՝ պոռնկեցար ընդ որդիսն Ասորեստանեայց, սակայն եւ այնպէս ոչ յագեցար. յաճախեցեր ի պոռնկութիւնս քո՝՝, սակայն եւ այնպէս ոչ յագեցար։ 29Յաճախեցեր դաշինս ընդ երկիրն Քանանու եւ Քաղդէացւոց՝՝, համայն եւ այնպէս ոչ յագեցար։ 30Զի՞նչ արարից ընդ դստերս քո՝՝, ասէ Ադոնայի Տէր, յետ գործելոյ քո զայդ ամենայն գործս կնոջ պոռնկի. զի պոռնկեցար բազմապատիկ ընդ դստերսն քո՝՝։ 31Եւ շինեցեր զպոռնկոցս ի գլուխս ամենայն ճանապարհաց, եւ կոթողս կոթողէիր յամենայն հրապարակս. եւ ոչ եղեր իբրեւ զկին մի պոռնիկ որ ժողովէ զկապէնս. 32զի ամենայն կին պոռնիկ նմանող քո, որ շնայցէ ընդ արամբ իւրով, ոչ առնու գանձս յառնէ իւրմէ՝ եւ տայ վարձս հոմանեաց իւրոց։ 33Ամենայն պոռնիկք կապէնս առնուն անձանց իւրեանց՝՝, եւ դու տայիր վարձս սեղեխաց քոց, եւ ուղերձէիր զնոսա գալ առ քեզ յամենայն կողմանց ի պոռնկութիւնս քո։ 34Եւ եղեւ քեզ ի խոտորնակի քան զամենայն կանանց ի պոռնկութեան քում, եւ յետ քո ոչ պոռնկեցան. զի նոքա կապէնս առնուն յարանց, եւ դու տայիր վարձս սեղեխաց, եւ՝՝ եղեւ քեզ այն ի խոտորնակի։

35Վասն այդորիկ, պոռնիկ, լուր զպատգամս Տեառն. 36Այսպէս ասէ Ադոնայի Տէր. Փոխանակ զի հեղեր արկեր զպղինձ քո, եւ յայտնեսցի ամօթ պոռնկութեան քո առաջի հոմանեաց քոց, եւ յամենայն խորհուրդս անօրէնութեանց՝՝ քոց, եւ յարիւնս որդւոց քոց զորս տայիր նոցա։ 37Վասն այնորիկ ահաւասիկ ես ժողովեցից ի վերայ քո՝՝ զամենայն հոմանիս քո, ընդ որս դու խառնակէիր, եւ յարուցից ի վերայ քո՝՝ զամենայն սիրելիս եւ զատելիս քո, եւ ժողովեցից պատեցից զնոսա շուրջ զքեւ, եւ յայտնեցից զչարիս քո առաջի նոցա, եւ տեսցեն զամենայն խայտառակութիւնս քո։ 38Եւ խնդրեցից ի քէն զվրէժ շնացելոյ եւ արիւնահեղի, եւ եդից զքեզ յարիւն քո,՝՝ եւ եդից զքեզ յարիւն սրտմտութեան եւ նախանձու։ 39Եւ մատնեցից զքեզ ի ձեռս նոցա, եւ կործանեսցեն զպոռնկոցս քո, եւ քակեսցեն զկոթողս քո, եւ մերկասցեն ի քէն զհանդերձս քո, եւ առցեն զպսակս պարծանաց քոց, եւ թողցեն զքեզ մերկ խայտառակեալ. 40եւ ածցեն ի վերայ քո ամբոխ, եւ քարկոծեսցեն զքեզ վիմօք, եւ կոտորեսցեն զքեզ սրով իւրեանց. 41եւ այրեսցեն զտունս քո հրով, եւ արասցեն ի քեզ վրէժխնդրութիւն առաջի կանանց բազմաց. եւ դարձուցից զքեզ ի պոռնկութենէ քումմէ, եւ վարձս ոչ եւս տացես նոցա։ 42Եւ արձակեցից զսրտմտութիւն իմ ի վերայ քո, եւ բարձցի նախանձն իմ ի քէն. եւ հանգեայց, եւ ոչ եւս հոգացայց։ 43Փոխանակ զի ոչ յիշեցեր զօր տղայութեան քո, եւ տրտմեցուցանէիր զիս ի վերայ ամենայնի այդորիկ, եւ ես ահաւասիկ ըստ ճանապարհացն քոց ետու ի գլուխ քո, ասէ Ադոնայի Տէր. եւ այնպէս արարեր՝՝ ամպարշտութիւնս ի վերայ ամենայն անօրէնութեանց քոց։

44Այս ամենայն է զոր մրմնջէին զքէն առակօք եւ ասէին, եթէ՝ Որպէս մայրն՝ նոյնպէս եւ դուստրն։ 45Արդ դուստր մօրն դու ես, որ մերժեաց զայր իւր եւ զորդիս իւր, եւ քոյր քերցն քոց որք մերժեցին զարս իւրեանց եւ զորդիս իւրեանց. մայր ձեր Քետացի, եւ հայր ձեր Ամովրհացի. 46եւ քոյր ձեր երէց՝ Շամրին, ինքն եւ դստերք իւր որ բնակեալ է ի ձախմէ քումմէ. եւ քոյր քո կրտսեր՝ որ բնակեալ է ընդ աջմէ քումմէ՝ Սոդոմ եւ դստերք իւր։ 47Սակայն եւ ոչ ըստ ճանապարհաց նոցա գնացեր, եւ ոչ ըստ անօրէնութեանց նոցա արարեր. զի փոքր մի՝՝ առաւել գտար քան զնոսա յամենայն ճանապարհս քո։ 48Կենդանի եմ ես, ասէ Ադոնայի Տէր, եթէ արար ինչ աւելի՝՝ Սոդոմ քոյրն քո՝ ինքն եւ դստերք իւր, քան զոր՝՝ արարեր դու եւ դստերք քո։ 49Բայց այս էր անօրէնութիւն Սոդոմայ քեռ քո. ամբարտաւանութիւն, ի լիութեան հացի եւ յղփութեան գինւոյ՝ փափկանայր ինքն եւ դստերք իւր. այնու առաւել էր ինքն եւ դստերք իւր՝՝, եւ ձեռն յաղքատն եւ ի տնանկն ոչ կարկառէին։ 50Մեծամտէին եւ գործէին զանօրէնութիւն առաջի իմ. իբրեւ զայն տեսի՝ բարձի զնոսա։ 51Նա եւ Շամրին զկէս յանցանաց քոց ոչ յանցեաւ. եւ յաճախեցեր զանօրէնութիւնս քո առաւել քան զնոսա, եւ արդարացուցեր զքորս քո յամենայն անօրէնութիւնս քո զոր արարեր։ 52Եւ արդ ընկալ զտանջանս քո որ ապականեցեր զքորսն քո՝ անօրէնութեամբքն զոր անօրինեցար առաւել քան զնոսա, եւ արդարացուցեր զնոսա յոյժ՝՝ քան զքեզ. եւ արդ յամօթ լեր եւ կրեա զանարգանս ի յարդարացուցանել զքորսն քո քան զքեզ։ 53Եւ դարձուցից զդարձուածս նոցա, զդարձուածս՝՝ Սոդոմայ եւ զդստերաց իւրոց, եւ դարձուցից զդարձուածս՝՝ Շամրնի եւ զդստերաց նորա, եւ դարձուցից զդարձուածս քո՝՝ ի միջի նոցա. 54զի ընկալցիս զտանջանս քո, եւ անարգեսցիս՝՝ յամենայնէ զոր արարեր ի բարկացուցանել զիս։ 55Եւ քոյր՝՝ քո Սոդոմ եւ դստերք իւր անդրէն հաստատեսցին որպէս եւ էինն ի սկզբանէ, եւ Շամրին եւ դստերք իւր հաստատեսցին անդրէն որպէս եւ էինն ի սկզբանէ, եւ դու եւ դստերք քո հաստատեսջիք ի նոյն՝ որպէս եւ էիք ի սկզբանէ։ 56Եւ եթէ ոչ էր Սոդոմ քոյր քո համբաւ ի բերան քո յաւուրս հպարտութեան քո, 57մինչչեւ յայտնեալ էին չարիքն քո որպէս այժմդ, նախատ եղեր դստերացն Ասորւոց, եւ ամենեցուն որ շուրջ զնովաւ էին, դստերք այլազգեաց, եւ պատեալ շուրջ զքեւ՝՝։ 58Արդ կրեա զամպարշտութիւնս քո եւ զանօրէնութիւնս քո, ասէ Տէր։

59Զի այսպէս ասէ Ադոնայի Տէր. Եւ արարից ընդ քեզ՝ որպէս արարերն, որպէս անարգեցեր զայն ամենայն՝՝ անցանել զուխտիւ իմով։ 60Եւ յիշեցից զուխտն իմ որ ընդ քեզն էր յաւուրս տղայութեան քո, եւ կանգնեցից ինձ ուխտ յաւիտենական. 61եւ յիշեսցես զճանապարհսն քո եւ անարգեսցիս, յորժամ զմտաւ ածիցես՝՝ զքորսն քո զերիցունսն հանդերձ կրտսերօքն, եւ տաց զնոսա քեզ ի փորձ, եւ ոչ ի դաշնաւորս. 62եւ կանգնեցից ես զուխտ իմ որ ընդ քեզ. եւ ծանիցես թէ ես եմ Տէր. 63զի յիշեսցես եւ ամաչեսցես, եւ մի՛ եւս լիցի քեզ բանալ զբերան քո առաջի անարգանաց քոց, ի քաւել ինձ զամենայն գործս քո զոր գործեցեր, ասէ Ադոնայի Տէր։