1Եւ եղեւ բան Տեառն առ իս եւ ասէ. 2Որդի մարդոյ, պատմեա պատմութիւն, եւ խօսեաց առակ առ տունդ Իսրայելի, 3եւ ասասցես. Այսպէս ասէ Ադոնայի Տէր. Արծուի մեծ՝ մեծաթեւ երկայնատարած լիամագիլ որ խորհեցաւ մտանել ի Լիբանան, եւ առ զընտիր ընտիր մայրիցն. 4եւ եհան զմատաղատունկն՝՝ եւ տարաւ յերկիրն Քանանացւոց, եւ տնկեաց զնա ի պարսպաւոր քաղաքին՝՝։ 5Եւ ա՛ռ ի սերմանէ երկրին, եւ ցանեաց ընդ երեսս դաշտին տունկ մանրատունկ, ընդ առատութեամբ ջրոյ՝ երեւելի առնել կարգեաց՝՝ զնա. 6(եւ բուսաւ եւ եղեւ յորթ տկար եւ փոքր տեսութեամբ՝՝,) յերեւել ուռոց իւրոց ի նմա, եւ արմատք նորա ի ներքոյ նորա էին եւ եղեւ յորթ մեծ, եւ եհան անդ ողկոյզս, եւ արձակեաց զբարունակս իւր։

7Եւ երեւեցաւ այլ արծուի մեծ, մեծաթեւ բազմամագիլ, եւ ահա որթս այս պատեալ է զնովաւ, եւ արմատք սորա ի նմա, եւ ուռք նորա ի ներքոյ նորա. եւ առաքեաց արբուցանել զնա հանդերձ բուսով տնկոյ նորա. 8ի գեղեցիկ դաշտին ընդ բազում ջրով պարարեսցի,՝՝ արձակել շառաւիղս եւ բերել պտուղս եւ լինել յորթ մեծ։ 9Վասն այսորիկ ասա. Այսպէս ասէ Ադոնայի Տէր. Եթէ իցէ աջողեսցի՞. ո՞չ ապաքէն արմատք փափկութեան նորա եւ պտուղ նորա նեխեսցին, եւ՝՝ չորասցին ամենայն շառաւիղք նորա, եւ ոչ բազկաւ մեծաւ՝ եւ ոչ ազգաւ բազմաւ բուռն հարկանել եւ խլել զնա յարմատոց իւրոց։ 10Եւ արդ պարարեսցի՞, մի՛ յաջողեսցի՝՝. ո՞չ ապաքէն ընդ մերձենալ հողմոյ խորշակի ցամաքեսցի հանդերձ բուսովն եւ շառաւիղօք իւրովք՝՝։

11Եւ եղեւ բան Տեառն առ իս եւ ասէ. 12Որդի մարդոյ, ասա ցտունդ Իսրայելի՝ տուն՝՝ դառնացողաց. Ո՞չ գիտէք զինչ է այդ զոր ասացիդ. յորժամ եկեսցէ՝՝ թագաւորն Բաբելացւոց յԵրուսաղէմ, առցէ զթագաւոր նորա եւ զիշխանս, տարցի՝՝ զնոսա առ ինքն ի Բաբելոն։ 13Եւ առցէ ի զաւակէ թագաւորութեանն, եւ դիցէ ընդ նմա ուխտ, եւ անցուսցէ ընդ նզովս՝՝, եւ զիշխանս երկրին առցէ, 14լինել ի թագաւորութիւն տկար, ամենեւին ոչ բարձրանալ. պահել զուխտ նորա եւ կալ ի նմին։ 15Եւ ապստամբեսցի՝՝ ի նմանէ առաքել հրեշտակս յԵգիպտոս, տալ նմա երիվարս եւ զօրս բազումս. եթէ իցէ աջողեսցի՞, եթէ իցէ ապրեսցի՞ որ առնէն իրս հակառակս՝՝, եւ անցանէ ըստ ուխտ. եթէ իցէ ապրեսցի՞։ 16Կենդանի եմ ես, ասէ Ադոնայի Տէր, եթէ ոչ ի տեղւոջ յորում թագաւորն՝՝ թագաւորեցոյց զնա, որ անարգեաց զնզովսն իմ եւ անց ըստ ուխտն իմ որ՝՝ ընդ նմա ի մէջ Բաբելոնի վախճանեսցի։ 17Եւ ոչ զօրութեամբ մեծաւ, եւ ոչ գնդաւ բազմաւ տացէ ընդ նմա պատերազմ փարաւոն, պատնէշս եւ նետակալս շինեսցէ՝՝ սատակել զանձինս բազմաց. 18զի անարգեաց զերդումն, եւ անց զուխտիւն. եւ ահա ետու ի ձեռս նորա, եւ արարի՝՝ զայս ամենայն ընդ նմա, միթէ ապրեսցի՞։

19Վասն այսորիկ ասա. Այսպէս ասէ Ադոնայի Տէր. Կենդանի եմ ես, ասէ Ադոնայի Տէր,՝՝ եթէ ոչ ըստ ուխտին իմում զորով անց եւ ըստ երդմանն իմոյ զոր անարգեաց՝ հատուցից ի գլուխ նորա։ 20Եւ սփռեցից ի վերայ նորա զվարմ իմ, եւ ըմբռնեսցի ընդ պաշարմամբ իմով՝՝. եւ ածից զնա ի Բաբելոն, եւ անդ դատեցայց ընդ նմա ըստ անիրաւութեան նորա զոր անիրաւեցաւ առ իս։ 21Եւ ըստ ամենայն խուսափանաց նորա, յամենայն պատերազմունս՝՝ նորա սրով անկցին, եւ զմնացորդս նորա ընդ ամենայն հողմս ցրուեցից՝՝. եւ ծանիջիք զի ես Տէր խօսեցայ։

22Վասն այնորիկ՝՝ այսպէս ասէ Ադոնայի Տէր. Եւ առից ես յընտիր ընտիր մայրից բարձուանդակին, եւ տաց ես ի գլխոյ շառաւիղացն նորա ի սիրտս նոցա. քշտեցից՝՝ եւ տնկեցից ի լերինն բարձու, 23եւ կախեցից զնա զբարձրացեալ լեռնէն Իսրայելի. տնկեցից՝՝ եւ ոստս արձակեսցէ եւ պտուղ բերցէ, եւ եղիցի ի մայր մեծ. եւ հանգիցեն ընդ նովաւ ամենայն գազանք եւ ամենայն հաւք, թռչունք՝՝ ընդ հովանեաւ նորա դադարեսցին. եւ բարունակք նորա ի նմին հաստատեսցին։՝՝ 24Եւ ծանիցեն ամենայն փայտք դաշտի թէ ես եմ Տէր, որ խոնարհեցուցանեմ զփայտ բարձրացեալ, եւ բարձրացուցանեմ զփայտ խոնարհեալ, ցամաքեցուցանեմ զփայտ դալար, եւ դալարեցուցանեմ զփայտ գօսացեալ. ես Տէր խօսեցայ՝ եւ արարից։