1Եւ եղեւ բան Տեառն առ իս եւ ասէ. 2Որդի մարդոյ, կանայք երկու էին, դստերք միոյ մօր. 3եւ պոռնկեցան յԵգիպտոս, ի մանկութեան իւրեանց. անդ անկան ստինք իւրեանց, անդ արկան ի կուսութենէ իւրեանց՝՝։ 4Անուն դստերն երիցու Ոողա, եւ քեռ նորա Ոողիբա. եւ եղեն ինձ եւ ծնան ուստերս եւ դստերս, եւ անուն նոցա՝ անուն Շամրնի Ոողա, եւ Երուսաղեմի՝ Ոողիբա։

5Եւ պոռնկեցաւ Ոողայն յինէն, եւ արձակեաց զաչս իւր զհետ հոմանեաց իւրոց, յԱսորեստանեայսն որ մերձ էին առ նա, 6զգեցեալ հիրս եւ կարմիրս, յիշխանս եւ ի զօրագլուխս, յերիտասարդս, յընտրեալս յամենեսին, ի սպառազէնս ի հեծեալս յերիվարս։ 7Եւ տարածեաց զպոռնկութիւն առ նոսա, առ ամենայն ընտրեալս որդիսն Ասորեստանեայց, եւ առ ամենեսին զորոց չոգաւ զկնի, ամենայն խորհրդովք իւրովք՝ եւ՝՝ պղծեցաւ։ 8Եւ զպոռնկութիւն իւր յերկրէն Եգիպտացւոց ոչ եթող. զի ընդ նոսա պղծէր ի մանկութենէ իւրմէ, եւ նոքա արկին զնա ի կուսութենէ՝՝, եւ հեղին ի վերայ նորա զպոռնկութիւնս իւրեանց։ 9Վասն այնորիկ մատնեցին զնա ի ձեռս հոմանեաց իւրոց, ի ձեռս որդւոցն Ասորեստանեայց զորոց զհետ երթայր։ 10Նոքա յայտնեցին զխայտառակութիւն նորա, զուստերս եւ զդստերս նորա առին, եւ զնա սրով սպանին. եւ եղեւ խօսք կանանց, եւ խնդրեցին վրէժ ի նմանէ ի դստերս իւր՝՝։

11Եւ ետես քոյր նորա Ոողիբա, եւ առաւել զանցոյց զաչարձակութիւն ապականութեան իւրոյ քան զնորայն, եւ զպոռնկութիւն իւր քան զպոռնկութիւն քեռ իւրոյ։ 12Զի չոգաւ զհետ որդւոցն Ասորեստանեայց, իշխանաց եւ զօրավարաց՝ որ մերձ էին առ նա, զգեցելոց հանդերձս ծիրանիս ազնուականս, սպառազինաց հեծելոց յերիվարս, երիտասարդաց ընտրելոց ամենեցուն։ 13Եւ տեսի զի պղծեցաւ, մի ճանապարհ էր երկոցունց։ 14Եւ յաւել ի պոռնկութիւնս իւր. եւ ետես արս նկարեալս յորմս պատկերս Քաղդէացւոց նկարեալս գրչաւ ի նկարու, 15ածեալ պէսպէս՝՝ կամարս ընդ մէջ իւրեանց, եւ խոյրս ներկեալս ի գլուխս իւրեանց. երփն երփն հարկանէր յամենեցունց՝՝, ի նմանութիւն որդւոցն Բաբելացւոց, յերկրին Քաղդէացւոց՝ յաշխարհին իւրեանց. 16եւ ակն եդ նոցա հայեցուածովք աչաց իւրոց, եւ առաքեաց հրեշտակս առ նոսա յերկիրն Քաղդէացւոց։ 17Եւ եկին առ նա որդիքն Բաբելացւոց յանկողինս օթի, եւ պղծեցին զնա ի պոռնկութեան իւրում. եւ պղծեցաւ ընդ նոսա, եւ յափրացաւ անձն նորա ի նոցանէ։ 18Եւ յայտնեաց զպոռնկութիւն իւր, եւ առակեաց զամօթ իւր։ Եւ մեկնեցաւ անձն իմ ի նմանէ, որպէս եւ մեկնեցաւ անձն իմ ի քեռէ նորա։ 19Եւ յաճախեցեր զպոռնկութիւն քո՝ յիշեցուցանել զաւուրս մանկութեան քո յորս պոռնկէիրն յԵգիպտոս. 20եւ արձակեցեր զաչս քո առ Քաղդէացիսն՝ յիշանդամս եւ ի ձիանդամս։ 21Եւ այց արարից անօրէնութեան՝՝ մանկութեան քո զոր գործէիրն յերկրին Եգիպտացւոց յօթեվանս քո, ուր անկան ստինք քո եւ լուծաւ կուսութիւն՝՝ քո։

22Վասն այդորիկ, Ոողիբա, այսպէս ասէ Տէր Տէր. Ահաւադիկ ես յարուցից ի վերայ քո զհոմանիսն յորոց յափրացաւ անձն քո, եւ ածից պատեցից զնոսա զքեւ, 23զորդիսն Բաբելացւոց եւ զամենայն Քաղդէացիսն, զՓակուդ եւ զՍուէ եւ զԿուէ, եւ զամենայն որդիսն Ասորեստանեայց ընդ նոսա, զերիտասարդս ընտիրս, զիշխանս, զզօրավարս, զսպառազէնս՝ զանուանիս զհեծեալս՝՝ յերիվարս։ 24Ամենեքին եկեսցեն ի վերայ քո ի հիւսիսոյ. կառք եւ անիւք ազգաց բազմութեան, սաղաւարտաւորք եւ վահանաւորք, եւ արկցեն շուրջ զքեւ պահ. եւ տաց առաջի երեսաց նոցա դատաստանս, եւ խնդրեսցեն ի քէն վրէժս՝՝ դատաստանօք իւրեանց։ 25Եւ տաց զնախանձ իմ ի քեզ, եւ արասցեն ընդ քեզ ըստ բարկութեան սրտմտութեան իմոյ՝՝. եւ զունչս եւ զականջս քո կտրեսցեն, եւ զմնացորդս քո սրով կոտորեսցեն, եւ զուստերս քո եւ զդստերս քո առցեն, եւ զմնացորդս քո հրով սատակեսցեն. 26եւ մերկասցեն ի քէն զհանդերձս քո, եւ առցեն զզարդ պարծանաց քոց։ 27Եւ դարձուցից զամպարշտութիւնս քո ի քէն, եւ զպոռնկութիւնս քո որ յերկրին Եգիպտացւոց, եւ ոչ ամբառնայցես զաչս քո ի նա, եւ ոչ եւս յիշեսցես զԵգիպտոս։

28Վասն այդորիկ այսպէս ասէ Տէր Տէր. Ահաւադիկ ես մատնեցից զքեզ ի ձեռս ատելեաց քոց՝ յորոց յափրացաւ անձն քո ի նոցանէ։ 29Եւ գնասցեն ընդ քեզ ատելութեամբ, եւ առցեն զամենայն վաստակս քո եւ զերկս քո. եւ եղիցես՝՝ մերկ եւ խայտառակեալ, եւ յայտնեսցի ամօթ պոռնկութեան քո, եւ ամպարշտութիւնն քո եւ պոռնկութիւն քո։ 30Արարին քեզ զայդ ի պոռնկելն քում զհետ ազգաց, ուր պղծէիր ի խորհուրդս նոցա։ 31Զճանապարհս քեռ քո գնացեր, եւ տաց զբաժակ նորա ի ձեռս քո։ 32Այսպէս ասէ Տէր Տէր. Զբաժակն քեռ քո արբցես, զխորն եւ զլայն, եւ եղիցես ի ծաղր եւ ի կատականս, յաճախել կատարել զարբեցութիւն, 33եւ լցցիս լքմամբ, զբաժակն ապականութեան, զբաժակն՝՝ քեռ քո Շամրնի։ 34Արբցես եւ քամեսցես. եւ զհերս քո խզեսցես՝՝, եւ զստինս քո կորզեսցես. եւ զտօնս քո եւ զամսագլուխս քո դարձուցից ի քէն.՝՝ զի ես խօսեցայ՝ ասէ Ադոնայի Տէր։ 35Վասն այդորիկ այսպէս ասէ Ադոնայի Տէր. Փոխանակ զի մոռացար զիս, եւ ընկեցեր զիս զկնի մարմնոյ քո, եւ դու ընկալ զամպարշտութիւնս քո եւ զպոռնկութիւնս քո։

36Եւ ասէ ցիս Տէր. Որդի մարդոյ, եթէ դատեսցի՞ս զՈողայն եւ զՈողիբայն. եւ պատմեսցես նոցա զանօրէնութիւնս իւրեանց։ 37Զի շնացան՝ եւ արիւն է ի ձեռս նոցա, եւ ի խորհուրդս նոցա՝՝ շնային, եւ զորդիս իւրեանց զոր ինձ ծնան՝ ածէին զբոցով։ 38Մինչ ցայնչափ եւս արարին ինձ, զի զսրբութիւնս իմ պղծէին ի նմին աւուր, եւ զշաբաթսն իմ ապականէին։ 39Ի զոհել նոցա զորդիս իւրեանց կռոցն իւրեանց, եւ մտանէին ի նմին աւուր ի սրբութիւնս իմ եւ պղծէին զնոսա, եւ այսպէս առնէին ի մէջ տան իմոյ։ 40Զի եւ արանց եկելոց ի հեռաստանէ, առ որս հրեշտակս արձակէին, իսկ եւ իսկ իբրեւ գային՝ ի բաղանիս մտանէիր, ի ծարիր եւ ի սնգոյր շպարէիր, եւ զարդարէիր զարդու. 41եւ նստէիր ի գահոյս զարդարեալս, եւ սեղան յօրինեալ դնէիր առաջի, եւ զխունկս իմ եւ զեւղսն առնուիր եւ ուրախ լինէիր ընդ նոսա։ 42Եւ ի ձայն արուեստականաց նուագէին՝՝. եւ առ այն արամբք՝ այլ եւս բազմութեան արանց գինեմոլաց եկելոց յանապատէ տայիր՝՝ ապարանջանս ի ձեռս նոցա եւ պսակ պարծանաց ի գլուխս նոցա։ 43Եւ ասացի թէ մի՛ շնասցի ընդ նոսա զգործ պոռնկութեան. եւ նա պոռնկէր՝՝։ 44Եւ մտանէին առ նա՝ որպէս մտանիցեն առ կին պոռնիկ, նոյնպէս մտանէին առ Ոողայն եւ առ Ոողիբայն՝ գործել զանօրէնութիւն։ 45Եւ արք արդարք էին նոքա, եւ՝՝ խնդրեսցեն վրէժս ի նոցանէ, զվրէժ շնացելոց եւ զվրէժ արեան. զի շնացօղք էին, եւ արիւն ի ձեռս նոցա։

46Զի այսպէս ասէ Տէր Տէր. Ած ի վերայ զօր, եւ արկ՝՝ զնոքօք խռովութիւն եւ յափշտակութիւն։ 47Եւ քարաձիգ լեր ի նոսա քարամբք զօրաց, եւ խոցոտեա զնոսա սրովք նոցա. ուստերք նոցա եւ դստերք կոտորեսցին՝՝, եւ զտունս նոցա հրձիգ արասցեն։ 48Եւ դարձուցից զամպարշտութիւնս յերկրէ, եւ խրատեսցին ամենայն կանայք, եւ մի՛ եւս արասցեն ըստ ամպարշտութեան նոցա։ 49Եւ տացի ամպարշտութիւն ձեր ի վերայ ձեր, եւ ըստ մեղաց խորհրդոց՝՝ ձերոց ընկալջիք, եւ ծանիջիք թէ ես եմ Տէր Տէր։