Ողբք ի վերայ Ծուրայ։՝՝

1Եւ եղեւ բան Տեառն առ իս եւ ասէ. 2Որդի մարդոյ, ողբս առ ի վերայ Ծուրայ. 3եւ ասասցես ցԾուր. Որ բնակեալդ ես ի մուտս ծովուդ՝ վաճառաշահ ազգաց ի կղզեաց բազմաց, այսպէս ասէ Տէր Տէր ցԾուր. 4Դու ասէիր. Ես զարդարեցի զիս ի զարդ գեղոյ իմոյ՝ ի սիրտ ծովու Բէէղիմայ. որդիքն քո զարդարեցին զքեզ։ 5Մայրք ի Սանիր լեռնէ շինեցան քեզ պահանգք, եւ տախտակք նոճիք ի Լիբանանէ առան՝ առնել քեզ կայմս եղեւնափայտեայս։ 6Ի Բասանէ արարին զղեկս նաւաց քոց, եւ զմեհեանս քո շինեցին ի փղոսկրէից, ապարանս անտառախիտս ի կղզեաց Քետիմացւոց։ 7Բեհեզ ընդ դիպակի գործեցաւ քեզ ի պաստառս յԵգիպտոսէ՝ արկանելիք քեզ ի փառս, եւ հանդերձ ծիրանի եւ կապուտակ ի կղզեացն յԵղիմացւոց եղեն ի զարդ պաճուճանաց քոց։ 8Եւ իշխանք քո բնակիչք Սիդոնացւոց. եւ եղեն Արադացիք՝՝ նաւավարք քո. եւ իմաստունք քո, Ծուր, որ եղեն ի քեզ, նոքա եղեն քեզ նաւապետք։ 9Եւ ծերքն մատենագէտք եւ իմաստունք նորա՝ որ էին ի քեզ, նոքա զօրացուցանէին զխորհուրդս՝՝ քո. եւ ամենայն նաւք ծովուն եւ նաւավարք նոցա եղեն քեզ երթալ յարեւմուտս արեւմտից։ 10Լիդացիք եւ Լիբէացիք՝՝ թիկունք զօրութեան քո՝ արք ընտիրք պատերազմօղք, որ կախեցին զվահանս եւ զսաղաւարտս իւրեանց ի քեզ, եւ նոքա փառաւորեցին զքեզ։ 11Որդիքն Արուադացւոց զօրութեամբք իւրեանց՝՝ զպարսպօք քովք պատեալ կային, եւ պահէին զաշտարակս քո. զկապարճս՝՝ իւրեանց կախեցին շուրջանակի ի պարիսպս քո, եւ նոքա իսկ բովանդակեցին զգեղեցկութիւն քո։

12Կարքեդոնացիք վաճառականք քո ի բազմութենէ ամենայն զօրութեան քո, զարծաթ եւ զոսկի եւ զպղինձ եւ՝՝ զերկաթ եւ զանագ եւ զկապար ետուն ի վաճառս քո. 13Յոյնք եւ ամենայն որ շուրջ զնովաւ՝՝ էին մարդավաճառք քո, եւ անօթս պղնձիս ետուն ի վաճառս քո։ 14Եւ ի տանէ Թորգոմայ ձիովք եւ հեծելովք եւ ջորւովք լցին զվաճառս քո։ 15Որդիք Հռոդացւոց վաճառականք քո. յաճախեցին ի կղզեաց զվաճառս քո ժանեօք փղոսկրէիւք, եւ երթեւեկացն մարդիկ տայիր ի գինս։ 16Եւ վաճառք քո բազմացեալք յաղխամաղխէ քումմէ, յԱփեկայ ստաշխն, եւ երփն երփն նարօտուց ի Թարշշայ. եւ Հռամովթ եւ Կարքովդ լցին զվաճառս քո։ 17Հրէաստան եւ որդիքն՝՝ Իսրայելի վաճառականք քո ցորենով եւ խնկովք եւ կասեաւ եւ ընտիր ընտիր՝՝ մեղու եւ իւղով եւ ռետամբ լցին զաղխամաղխեայ վաճառաց քոց։ 18Դամասկոս վաճառականք քո, եւ բազմաղխի եւ ի բազում զօրութենէ քումմէ, գինի ի Քեղբովնայ եւ ասր ի Միլիտեայ։ 19Դան եւ Յաւան ի Մէովզենայ բերէին քեզ գինի ի վաճառս քո. յԱսեղայ երկաթ գործեալ անիւս պատեալս ի վաճառս քո։ 20Դեդանացիք վաճառականք քո ածէին կառս ընտիրս ջորւովք հանդերձ։՝՝ 21Արաբացիք եւ ամենայն իշխանք Կեդարու, նոքա վաճառականք ընդ ձեռամբ քով՝ ուղտս եւ խոյս եւ որոջս վաճառէին ի քեզ։ 22Սաբա եւ Հռեգմա, եւ նոքա վաճառականք քո, եւղս անուշունս եւ՝՝ ականս պատուականս եւ ոսկի ետուն ի վաճառս քո։ 23Խառան եւ Քանան եւ Դադան, եւ նոքա վաճառականք քո, Սաբա եւ Ասուր եւ Քաղման վաճառականք քո, 24որք բերեն քեզ վաճառս ընդ Մաքղիմ եւ ընդ Գաղիմ, հիր եւ կարմիր եւ կապուտակ եւ երփն երփն նարօտուց եւ գանձս ընտիրս վանդակեալս չուանօք. 25ի նաւս նոճիս՝ որովք էր վաճառն քո, նաւք ի բազմութեան վաճառաց քոց, եւ ի յաճախութենէ աղխամաղխի քո, լցար ծանրացար յոյժ։ 26Ի սիրտ ծովու ի ջուրս բազումս վարեցին զքեզ նաւավարք քո. հողմ հարաւոյ խորտակեաց զքեզ ի սիրտ ծովու։ 27Եւ զօրութիւն քո, եւ վարձք քո եւ խառնաղանջիցն քոց, եւ նաւավարք քո եւ նաւապետք քո, եւ խորհրդականք քո եւ խառնաղանջք խառնաղանջից քոց՝՝, եւ ամենայն արք պատերազմողք քո որ ի քեզ, եւ ամենայն ժողովք որ ի միջի քում՝ անկցին ի սիրտ ծովու յաւուր կործանման քո։ 28Ի ձայնէ բարբառոյ քո նաւավարք քո երկիւղիւ զարհուրեսցին՝՝. 29եւ իջցեն ի նաւաց իւրեանց ամենայն նաւավարք քո եւ նաւամուտք քո առաջապահք նաւաց յափն ծովուն կացցեն. 30եւ աղաղակեսցեն ի վերայ քո, եւ փոխեսցեն զձայնս իւրեանց.՝՝ գուժեսցեն դառնապէս, հող ի գլուխ լիցին, ընդ մոխիր թաւալեսցին. 31գերծցեն զգլուխս ի կնդութիւն, եւ քրձազգածք լիցին, եւ լացցեն ի վերայ քո դառնացեալ սրտիւք, կոծ դառնութեան։ 32Առցեն որդիք նոցա ի վերայ քո, ողբս առցեն եւ ողբասցեն՝՝. Ո՞վ էր իբրեւ զԾուր որ լռեաց դադարեաց ի մէջ ծովուն։ 33Որչափ ինչ գտեր քեզ վարձս ի ծովէ այտի, լցուցեր զազգս ի բազմութենէ քումմէ,՝՝ եւ յաղխամաղխէ վաճառաց քոց մեծացուցեր զամենայն թագաւորս երկրի։ 34Արդ բեկար ի ծովուդ՝՝ ի խորս ջուրց, վաճառք քո եւ ամենայն ժողովք քո ի միջի քում անկան ամենայն նաւավարք քո՝՝։ 35Ամենայն բնակիչք կղզեաց տրտմեցան ի վերայ քո, եւ թագաւորք նոցա զարհուրելով զարհուրեցան, եւ հեղին արտասուս զերեսօք իւրեանց ի վերայ քո՝՝։ 36Վաճառականք ազգաց շչեցին ի վերայ քո. ի կորուստ մատնեցար՝՝, եւ այլ ոչ եւս իցես յաւիտեան ասէ Տէր Աստուած՝՝։