Ի վերայ իշխանին Ծուրայ։՝՝

1Եւ եղեւ բան Տեառն առ իս եւ ասէ. 2Եւ դու որդի մարդոյ, ասա ցիշխանդ Ծուրա. Այսպէս ասէ Տէր Տէր. Փոխանակ զի հպարտացաւ սիրտ քո, եւ ասացեր թէ՝ Աստուած եմ ես, եւ զբնակութիւն Աստուծոյ բնակեցի ի սիրտ ծովու. մարդ ես դու՝ եւ ոչ Աստուած, եւ ետուր զսիրտ քո իբրեւ զսիրտն Աստուծոյ։ 3Միթէ իմաստնագո՞յն իցես քան զԴանիէլ, կամ իմաստո՞ւնք խրատեցին զքեզ հանճարովն իւրեանց. 4միթէ իմաստութեա՞մբ քով կամ խորհրդով՝՝ արարեր դու քեզ զօրութիւն, եւ ստացար ոսկի եւ արծաթ ի գանձս քո. 5կամ բազմութեամբ իմաստութեան քո եւ վաճառաց՝ յաճախեցեր զզօրութիւն քո, եւ բարձրացաւ սիրտ քո զօրութեամբն քով։ 6Վասն այսորիկ այսպէս ասէ Տէր Տէր. Վասն զի ետուր զսիրտ քո իբրեւ զսիրտն Աստուծոյ, 7փոխանակ այնորիկ ահաւադիկ ես ածից ի վերայ քո օտարս ժանտագործս յազգաց, եւ թափեսցեն զսուր իւրեանց ի քեզ, եւ՝՝ ի վերայ գեղոյ իմաստութեան քո, եւ տարածեսցեն զգեղ քո ի կորուստ. 8եւ կործանեսցեն՝՝ զքեզ, եւ մեռանիցիս մահու վիրաւորաց ի սիրտ ծովու։ 9Միթէ ասելով ասիցե՞ս. Աստուած եմ ես, առաջի վիրագացն քոց. բայց դու մարդ ես, եւ ոչ Աստուած. 10եւ ի բազմութեան վիրաւորաց քոց մեռելոց՝՝ անթլփատից մեռանիցիս ի ձեռաց օտարաց, զի ես խօսեցայ. ասէ Ադոնայի Տէր։

11Եւ եղեւ բան Տեառն առ իս եւ ասէ. 12Որդի մարդոյ, ողբս առ ի վերայ իշխանին Ծուրայ, եւ ասասցես ցնա. Այսպէս ասէ Տէր Տէր. Դու ես կնիք նմանութեան լի իմաստութեամբ, եւ պսակ գեղեցկութեան. 13ի գրգանս դրախտին Աստուծոյ եղեր, եւ զամենայն ականս պատուականս ի քեզ կապեցեր. զսարդիոնն եւ զտպազիոն եւ զզմրուխտ եւ զկարկեհան եւ զշափիղայ եւ զյասպիսն, զարծաթ եւ զոսկի,՝՝ եւ զգոճազմն, զակատն, զմեղեսիկն, զոսկեքարն, զբիւրեղն, զեղնգնաքարն. եւ ոսկւով լցուցեր զգանձս քո, եւ զշտեմարանս քո ի քեզ,՝՝ յօրէ յորմէ հաստատեցար եւ հանդերձեցար 14ընդ օծելոյ քրովբէին,՝՝ ետու զքեզ. ի լեառն սուրբ Աստուծոյ եղեր. ի մէջ հրեղէն վիմացն։ 15Եղեր անարատ յաւուրսն՝՝ քո, յօրէ յորմէ հաստատեցար դու, մինչեւ գտան անիրաւութիւնք ի քեզ։ 16Ի բազմութենէ վաճառաց քոց լցեր զշտեմարանս քո անիրաւութեամբք, մեղար եւ վիրաւորեցար. ի լեռնէն Աստուծոյ իջոյց զքեզ քերովբն՝՝ վարսաւոր, ի միջոյ հրեղէն վիմացն։ 17Բարձրացաւ սիրտ քո ի գեղեցկութեան քում, եւ ապականեցաւ հանճար քո հանդերձ գեղովն քո. վասն բազմութեան մեղաց քոց ընկեցի՝՝ զքեզ յերկիր. յանդիման թագաւորաց ետու զքեզ ի խայտառակութիւն։ 18Վասն բազմութեան մեղաց քոց ի խարդախութեան վաճառաց քոց՝ պղծեցեր զսրբութիւնս քո. եւ հանից հուր ի միջոյ քումմէ, եւ նոյն կերիցէ զքեզ, եւ տաց զքեզ ի մոխիր յերկրին քում՝՝ առաջի ամենայն տեսողացն քոց։ 19Եւ ամենեքին որ ճանաչիցեն զքեզ ի մէջ ազգաց՝ տրտմեսցին վասն քո, զի եղեր ի կորուստ՝՝, եւ ոչ եւս իցես յաւիտեան։

20Ի վերայ Ծայդանու։՝՝ Եւ եղեւ բան Տեառն առ իս եւ ասէ. 21Որդի մարդոյ, հաստատեա զերեսս քո ի վերայ Ծայդանու, մարգարեաց ի վերայ նորա. 22եւ ասասցես. Այսպէս ասէ Ադոնայի Տէր. Ահաւասիկ ես ի վերայ քո, Ծայդան, եւ փառաւորեցայց ես ի քեզ. եւ ծանիցես թէ ես եմ Տէր՝ յառնել ինձ ի քեզ դատաստանս, եւ սուրբ եղէց ես ի քեզ։ 23Եւ առաքեցից ի վերայ քո՝՝ մահ, եւ արիւն ի հրապարակս քո. եւ անկցին վիրաւորք ի միջի քում, պատեսցին շուրջ զքեւ սրովք, եւ ծանիցեն թէ ես եմ Տէր։ 24Եւ ոչ եւս եղիցի տանն Իսրայելի խոչ դառնութեան, եւ փուշ ցաւոց յամենեցունց որ շուրջանակի անարգեցին զնոսա. եւ ծանիցեն թէ ես եմ Ադոնայի Տէր։

25Այսպէս ասէ Ադոնայի Տէր. Եւ ժողովեցից՝՝ զտունն Իսրայելի յազգաց ուր ցրուեցան անդր, եւ սուրբ եղէց ի նոսա առաջի ազգաց եւ ժողովրդոց՝՝. եւ բնակեսցեն յերկրին իւրեանց զոր ետու ծառային իմում Յակոբու. 26եւ բնակեսցեն ի նմա յուսով. շինեսցեն տունս եւ տնկեսցեն այգիս, եւ բնակեսցեն յուսով, յորժամ արարից դատաստան յամենեսին որ շուրջանակի անարգեցին զնոսա. եւ ծանիցեն թէ ես եմ Տէր Աստուած նոցա եւ Աստուած հարց նոցա՝՝։