Ի վերայ Եգիպտոսի եւ փարաւոնի արքային Եգիպտացւոց։՝՝

1Յամին տասներորդի, յամսեանն տասներորդի, որ օր մի էր ամսոյն, եղեւ բան Տեառն առ իս եւ ասէ. 2Որդի մարդոյ, հաստատեա զերեսս քո ի վերայ փարաւոնի արքային Եգիպտացւոց, մարգարեաց ի վերայ նորա եւ ի վերայ ամենայն Եգիպտոսի. 3խօսեաց եւ ասասցես. Այսպէս ասէ Տէր Տէր. Ահաւասիկ ես ի վերայ քո, փարաւոն արքայ Եգիպտացւոց, վիշապդ մեծ՝ որ նստիս ի մէջ գետոց, որ ասես թէ իմ են գետքս եւ ես արարի զսոսա՝՝։ 4Եւ ես արկից դանդանաւանդ ի կզակս քո, եւ մածուցից զձկունս գետոյդ ի թեւս քո, եւ հանից ի միջոյ քումմէ զգետսդ քո՝՝, եւ ամենայն ձկունք գետոյդ կցեսցին ի թեւս քո. 5եւ կործանեցից զքեզ արագ արագ,՝՝ եւ զամենայն ձկունս գետոյդ քո. ընդ երեսս դաշտին անկանիցիս, եւ մի՛ ժողովեսցիս, եւ մի՛ եւս հաւաքեսցիս. զի գազանաց երկրի եւ թռչնոց երկնից ետու զքեզ ի կերակուր։ 6Եւ ծանիցեն ամենայն բնակիչքդ Եգիպտացւոց թէ ես եմ Տէր, փոխանակ զի եղեր գաւազան եղեգնեայ տանդ Իսրայելի. 7եւ յորժամ յենուին ի քեզ՝ ելանէիր ընդ ձեռս նոցա, եւ յորժամ բուռն հարկանէր զքէն ամենայն ձեռն՝՝, եւ յորժամ յենուին ի քեզ՝ խորտակէիր եւ բեկանէիր զամենայն մէջս նոցա։

8Վասն այնորիկ այսպէս ասէ Տէր Տէր. Ահաւադիկ ես ածեմ ի վերայ քո սուր, եւ կորուսից ի քէն զմարդ եւ զանասուն։ 9Եւ եղիցի երկիրդ Եգիպտացւոց ի կորուստ եւ յաւերակ, եւ ծանիցեն թէ ես եմ Տէր. փոխանակ զի ասէիր թէ՝ Գետքս իմ են, եւ ես արարի զսոսա՝՝։ 10Վասն այդորիկ ահաւադիկ ես ի վերայ քո եւ ի վերայ ամենայն գետոցդ քոց, եւ տաց զերկիրդ Եգիպտացւոց յաւերակ եւ ի սուր եւ ի կորուստ, ի Մակդովղայ եւ ի Սուհենայ մինչեւ ի սահմանս Եթէովպացւոց։ 11Եւ մի՛ անցցէ ընդ նա ոտն մարդոյ, եւ կճղակ անասնոյ մի՛ գնասցէ ընդ նա, եւ մի՛ բնակեսցէ ամս քառասուն։ 12Եւ տաց զերկիրն նորա ի կորուստ՝՝ ի մէջ աւերակ երկրին, եւ քաղաքք նորա ի մէջ աւերեալ քաղաքաց եղիցին յապականութիւն ամս քառասուն. եւ ցրուեցից զԵգիտպոս ի մէջ ազգաց, եւ հոսեցից զնոսա ընդ գաւառս։

13Զի այսպէս ասէ Տէր Տէր. Յետ ամացն քառասնից ժողովեցից զԵգիպտացիս յազգաց ուր ցրուեցան ի նոսա. 14եւ դարձուցից զգերութիւն Եգիպտացւոցն, եւ բնակեցուցից զնոսա յերկրին Պաթուրէս՝ յերկրին ուստի առան. եւ եղիցի անդ իշխանութիւն մի տառապեալ քան զամենայն իշխանութիւնս։ 15Եւ եղիցի՝՝ խոնարհագոյն, եւ մի՛ եւս բարձրասցի ի վերայ ազգաց, եւ սակաւաւորս արարից զնոսա, զի մի՛ բազմասցին ի մէջ ազգաց։ 16Եւ մի՛ եւս եղիցին տանն Իսրայելի յոյս յիշատակի անօրէնութեան՝ երթալ զհետ սրտից՝՝ նոցա, եւ ծանիցեն թէ ես եմ Ադոնայի Տէր։

17Եւ եղեւ ի քսաներորդի եւ յեւթներորդի ամին, որ օր մի էր ամսոյն առաջնոյ, եղեւ բան Տեառն առ իս եւ ասէ. 18Որդի մարդոյ, Նաբուքոդոնոսոր արքայ Բաբելացւոց աշխատեցոյց զզօրս իւր աշխատութեամբ մեծաւ ի վերայ Ծուրայ. ամենայն գլուխք կնդացեալք եւ ամենայն ուսք գերծեալք. եւ վարձք նմա եւ զօրաց նորա ոչ եղեն առ ի Ծուրայ ծառայութեանն՝ զոր ծառայեցին ինձ ի նմա։ 19Վասն այսորիկ այսպէս ասէ Տէր Տէր, Ահաւասիկ ես տաց Նաբուքոդոնոսորայ արքայի Բաբելացւոց զերկիրն Եգիպտացւոց, եւ առցէ զբազմութիւն նորա, եւ աւարեսցէ զաւար նորա, եւ կողոպտեսցէ զկապուտ նորա, եւ եղիցի վարձ զօրաց նորա։ 20Փոխանակ հարկին յորում ծառայեաց ինձ ի Ծուր՝՝, ետու նմա զերկիրն Եգիպտացւոց ընդ ամենայնի զոր արարին ինձ. այսպէս ասէ Տէր Տէր. 21Յաւուր յայնմիկ ծագեսցէ եղջեւր ամենայն՝՝ տանն Իսրայելի, եւ քեզ տաց բերան բաց ի մէջ նոցա, եւ ծանիցեն թէ ես եմ Տէր։