1Եւ եղեւ բան Տեառն առ իս եւ ասէ. 2Որդի մարդոյ, մարգարեաց եւ ասասցես. Այսպէս ասէ Ադոնայի Տէր Տէր. Ո՜հ, ո՜հ օր. 3զի մերձ է օր Տեառն, օր միգի. զի հասեալ է վախճան ազգաց։ 4Եւ եկեսցէ սուր ի վերայ Եգիպտացւոց, եւ եղիցի խռովութիւն ի կողմանս Եթէովպացւոց եւ անկցին վիրաւորք՝՝ յԵգիպտոս. եւ առցեն զբազմութիւն նորա, եւ տապալեսցին հիմունք նորա։ 5Պարսիկք եւ Կրետացիք եւ Լիդացիք եւ Լիբէացիք՝՝, եւ ամենայն խառնաղանջքն, եւ յորդւոց ուխտին իմոյ ի նմա՝՝ սրով կոտորեսցին։

6Այսպէս ասէ Ադոնայի Տէր. Կործանեսցին մոյթքն Եգիպտացւոց, եւ իջցէ հպարտութիւն զօրութեան նորա, ի Մակդովղայ մինչեւ ցՍուհէն սրով անկցին ի նմա, ասէ Ադոնայի Տէր. 7եւ աւերեսցին ի մէջ ապականեալ աշխարհաց, եւ քաղաքք նոցա ի մէջ քաղաքաց աւերելոց. 8եւ ծանիցեն թէ ես եմ Տէր, յորժամ արկից հուր ի վերայ Եգիպտացւոցն, եւ խորտակեսցին ամենայն օգնականք նորա։ 9Յաւուր յայնմիկ ելցեն հրեշտակք յերեսաց իմոց տագնապաւ՝ ապականել զսնոտի յոյսն Եթէովպացւոց՝՝, եւ եղիցի խռովութիւն ի նոսա յաւուրն Եգիպտացւոց, քանզի ահաւասիկ հասեալ է։

10Այսպէս ասէ Տէր Տէր. Եւ կորուսից զբազմութիւն Եգիպտացւոցն ի ձեռն Նաբուքոդոնոսորայ արքային Բաբելացւոց, 11զնա եւ զազգ՝՝ նորա ընդ նմա ժանտագործք յազգաց, առաքեսցին կործանել զերկիրն, եւ թափեսցեն զսուրս իւրեանց ի վերայ Եգիպտոսի, եւ լցցի երկիրն վիրաւորօք։ 12Եւ տաց զգետս նոցա յանապատ, եւ մատնեցից զերկիրն ի ձեռս չարաց, եւ կորուսից զերկիրն լրիւ իւրով ձեռօք այլազգեաց, զի ես Տէր խօսեցայ։

13Այսպէս ասէ Տէր Տէր. Եւ կորուսից զգարշելիսն, եւ դադարեցուցից զմեծամեծս ի Մեմփացւոց, եւ զիշխանս յերկրէն Եգիպտացւոց, եւ ոչ եւս լինիցին՝՝. եւ արկից ահ ի վերայ երկրին Եգիպտացւոց։ 14Եւ կորուսից զերկիրն Պաթուրէս,՝՝ եւ արկից հուր զՏայանու, եւ խնդրեցից զվրէժ ի Դիոսպողացւոց։ 15Եւ հեղից զսրտմտութիւն իմ ի վերայ Սայինայ, զօրութեանն Եգիպտացւոց, եւ կորուսից զբազմութիւն Մեմփացւոց։ 16Եւ տաց հուր յԵգիպտոս, եւ խռովութեամբ խռովեսցի Սային, եւ եղիցի քաղաքն Դիոսպողացւոց յերգիծումն, եւ բղխեսցեն ջուրք՝՝։ 17Երիտասարդք Արեգ քաղաքի եւ Բուբաստայ անկցին սրով, եւ կանայք նոցա ի գերութիւն վարեսցին։ 18Եւ խաւարեսցի տիւ ի Տափնաս, ի փշրել ինձ անդ զգաւազան իշխանութեան Եգիպտացւոցն. եւ կորիցէ անդ հպարտութիւն զօրութեան նորա, եւ զնոյն՝ մէգ ծածկեսցէ. եւ դստերք նորա ի գերութիւն վարեսցին։ 19Եւ արարից դատաստանս յԵգիպտոս, եւ ծանիցեն թէ ես եմ Տէր։

20Եւ եղեւ ի մետասաներորդի ամի անդ, յամսեանն առաջնում, որ օր եւթն էր ամսոյն, եղեւ բան Տեառն առ իս եւ ասէ. 21Որդի մարդոյ, զբազուկս փարաւոնի արքային Եգիպտացւոց խորտակեցի, եւ ահա ոչ եւս պատեսցի ի բժշկութիւն, եւ ոչ տացին ի վերայ նորա դեղք, կամ թէ զօրանայցէ առնուլ սուր ի ձեռին։ 22Վասն այսորիկ այսպէս ասէ Տէր Տէր. Ահաւասիկ ես ի վերայ փարաւոնի արքային Եգիպտացւոց, եւ խորտակեցից զբազուկս նորա հզօրս, զնեարդապատս եւ զաճառապատս՝՝, եւ ընկեցից զսուրն ի ձեռանէ նորա. 23եւ ցրուեցից զԵգիպտոս ընդ ազգս, եւ հոսեցից զնոսա ընդ գաւառս։ 24Եւ զօրացուցից զբազուկս արքային Բաբելացւոց, եւ տաց զսուր իմ ի ձեռս նորա. եւ ածցէ զայն ի վերայ երկրին Եգիպտացւոց, եւ աւարեսցէ զաւար նորա, եւ կողոպտեսցէ զկապուտ՝՝ նորա։ 25Եւ զօրացուցից զբազուկս արքային Բաբելացւոց, եւ բազուկքն փարաւոնի լքցին. եւ ծանիցեն թէ ես եմ Տէր, ի տալ ինձ զսուրն իմ ի ձեռս արքային Բաբելացւոց, եւ ձգեցից զնա ի վերայ երկրին Եգիպտացւոց։ 26Եւ ցրուեցից զԵգիպտոս ընդ ազգս, եւ հոսեցից զնոսա ընդ գաւառս, եւ ծանիցեն ամենայն Եգիպտացիքն՝՝ թէ ես եմ Տէր։