Ի վերայ Գովգայ եւ Մագովգայ։՝՝

1Եւ եղեւ բան Տեառն առ իս եւ ասէ. 2Որդի մարդոյ, հաստատեա զերեսս քո ի վերայ Գովգայ, երկրին Մագովգայ, իշխանին Ռովսմեսովքայ եւ Թոբելայ, եւ մարգարեաց ի վերայ նորա, 3եւ ասասցես ցնա. Այսպէս ասէ Տէր Տէր. Ահաւասիկ ես ի վերայ քո, իշխանդ Ռովսմեսովքայ եւ Թոբելայ. 4եւ պաշարեցից՝՝ զքեզ, եւ արկից դանդանաւանդ ի կզակս քո, եւ ժողովեցից զքեզ եւ զամենայն զօրութիւնս քո, զհեծեալս եւ զերիվարս, զվառեալս եւ զսպառազէնս ազգաց բազմաց, վահանաւորս եւ սաղաւարտաւորս եւ սուսերաւորս. 5եւ ամենեքին սոքա ընդ նոսա, Պարսիկք եւ Եթէովպացիք, Լիբէացիք եւ Լիդացիք՝՝, ամենեքին սաղաւարտեալք եւ վահանաւորք. 6Գոմեր եւ ամենեքին որ շուրջ են զնովաւ, եւ տունն Թորգոմայ ի ծագացն հիւսիսոյ, եւ ամենեքին որ շուրջ զնովաւ, եւ ազգք բազումք ընդ քեզ։

7Պատրաստեաց, պատրաստեա զանձն քո, դու եւ ամենայն ժողովք որ ժողովեալ են ընդ քեզ, եւ եղիցես ինձ յառաջապահ։ 8Յետ աւուրց բազմաց պատրաստեսցի, ի վախճան ժամանակաց եկեսցէ եւ հասցէ՝՝ յերկիրն յապահով ի սրոյ. ժողովեալ յազգաց բազմաց յերկիրն Իսրայելի, որ եղեւ աւերակ համօրէն, եւ նոյն յազգաց ժողովեալ՝ եւ բնակեն խաղաղութեամբ՝՝ ամենեքին։ 9Եւ ելցես իբրեւ զանձրեւ, եւ հասցես իբրեւ զամպ եւ ծածկեսցես զերկիրն. եւ եղիցես դու եւ ամենայն ազգք բազումք՝ որ շուրջ զքեւ իցեն ընդ քեզ։

10Այսպէս ասէ Տէր Տէր. Եւ եղիցի յաւուր յայնմիկ անկանիցին բանք ի սիրտ քո, եւ խորհեսցիս խորհուրդս չարս. 11եւ ասասցես. Ելից ի վերայ յապահով երկրին, հասից ի վերայ հանդարտելոցն յանհոգութեան, բնակելոցն ի խաղաղութեան, ամենեցուն որ բնակեալ են յերկրին, որոց ոչ պարիսպք եւ ոչ նիգք եւ ոչ դրունք, 12աւարել զաւար, կողոպտել զկապուտ նոցա, արկանել զձեռն իմ ի վերայ երկրին աւերելոյ եւ բնակելոյ, եւ ի վերայ ազգին ժողովելոյ յազգաց բազմաց, ստացելոց ինչս եւ դաստակերտս, բնակելոց ի սիրտ երկրի։ 13Սաբա եւ Դեդան եւ վաճառականք Կարքեդոնացւոց եւ ամենայն աւանք՝՝ նորա ասիցեն ցքեզ. Յառ յաւա՞ր արշաւեալ գաս. ժողովեցեր զժողովս քո առնուլ զարծաթ եւ զոսկի, վարել ի գերութիւն զստացուածս՝՝ եւ կողոպտել զկապուտ մեծ։

14Վասն այնորիկ մարգարեաց, որդի մարդոյ, եւ ասասցես ցԳովգ. Այսպէս ասէ Տէր Տէր. Ո՞չ ապաքէն յաւուր յայնմիկ յորում բնակեսցէ ժողովուրդ իմ Իսրայէլ խաղաղութեամբ՝ զարթիցես, 15եւ եկեսցես ի տեղւոջէ քումմէ ի ծագաց հիւսիսոյ, դու եւ բազում ազգք ընդ քեզ հեծեալ յերիվարս, ամենեքին ընդ գունդս բազումս զօրաց բազմաց. 16եւ ելանիցես ի վերայ ժողովրդեան իմոյ Իսրայելի՝ իբրեւ զամպ ծածկեալ զերկիրն. ի յետին ժամանակի եղիցի այն. եւ ածից զքեզ յերկիր իմ, զի ծանիցեն զիս ամենայն ազգք, ի լինել ինձ սուրբ ի միջի քում առաջի նոցա, Գովք։

17Այսպէս ասէ Տէր Տէր ցԳովգ. Դո՞ւ ես վասն որոյ խօսեցայ յաւուրցն առաջնոց ի ձեռն ծառայիցն իմոց մարգարէիցն Իսրայելի յաւուրսն յայնոսիկ եւ յամսն, ածել զքեզ ի վերայ նոցա։ 18Եւ եղիցի յաւուր յայնմիկ յորում եկեսցէ Գովգ ի վերայ երկրիդ Իսրայելի, ասէ Տէր Տէր. Ելցէ սրտմտութիւն իմ բարկութեամբ. 19եւ ի նախանձ իմ՝ հրով բարկութեան իմոյ խօսեցայ, թէ ոչ՝ յաւուր յայնմիկ եղիցի շարժումն մեծ ի վերայ երկրին Իսրայելի։ 20Եւ խռովեսցին յերեսաց իմոց ձկունք ծովու եւ թռչունք երկնից եւ գազանք դաշտաց, եւ ամենայն սողունք երկրի, եւ ամենայն մարդիկ որ ի վերայ երեսաց երկրի. լերինք պատառեսցին, եւ ձորք տապալեսցին, եւ ամենայն պարիսպք երկրին կործանեսցին։ 21Եւ կոչեցից զահ սրոյ ի վերայ նորա՝՝, ասէ Տէր Տէր. սուր առն ի վերայ եղբօր իւրոյ լինիցի։ 22Եւ դատեցայց զնա արեամբ եւ մահու, եւ հեղեղօք անձրեւաց եւ վիմօք կարկտի եւ հուր եւ ծծումբ տեղացից ի վերայ նորա, եւ ի վերայ ամենեցուն որ ընդ նմա իցեն՝՝, եւ ի վերայ ազգաց բազմաց որ ընդ նմա։ 23Եւ մեծացայց եւ սուրբ եղէց, եւ փառաւորեցայց՝՝ եւ ծանուցայց առաջի ազգաց բազմաց, եւ ծանիցեն թէ ես եմ Տէր։