Վասն շինուածոյ Տաճարին։՝՝

1Եւ եղեւ ի քսաներորդի եւ հինգերորդի ամի գերութեան մերոյ, յամսեանն առաջնում որ օր մետասան էր ամսոյն, ի չորեքտասաներորդի ամի առնլոյ քաղաքին, յաւուր յայնմիկ եղեւ ի վերայ իմ ձեռն Տեառն։ 2Եւ ած զիս ի տեսլեան Աստուծոյ յերկիրն Իսրայելի, եւ եդ զիս ի վերայ լերին միոյ բարձու յոյժ. եւ ի վերայ նորա իբրեւ զշինուած քաղաքի դէմ յանդիման՝՝։ 3Եւ տարաւ զիս ի ներքս, եւ ահա այր մի, եւ տեսիլ նորա իբրեւ զտեսիլ փայլուն պղնձոյ, եւ ի ձեռին նորա էր լար շինողաց եւ ձող չափոյ, եւ ինքն կայր ի վերայ դրանն՝՝։ 4Եւ ասէ ցիս այրն. Տեսեր, որդի՝՝ մարդոյ, արդ հայեաց աչօք քովք, եւ լուր ականջօք քովք, եւ հաստատեա ի մտի քում զամենայն զոր ես ցուցից քեզ. զի վասն ցուցանելոյ քեզ եկի այսր, եւ ցուցցես զամենայն զոր դուդ տեսանես՝ տանն Իսրայելի։

5Եւ ահա շուրջ զտաճարաւն փողոցս, եւ ի ձեռին առնն ձող չափոյ ի վեց կանգնոյ եւ թզաւ. եւ չափեաց զլայնութիւն պարսպացն հաւասար ձողոյն, եւ բարձրութիւն նորա հաւասար ձողոյն։

6Եւ եմուտ ընդ դուռնն որ հայէր ընդ արեւելս՝ զեւթն աստիճանօք, եւ չափեաց զկոզակսն վեց վեց զկամարօք դրանն հաւասար ձողոյն. եւ զերկայնութիւն կոզակին հաւասար ձողոյն, եւ զլայնութիւն նորին հաւասար ձողոյն. եւ կամարս ի մէջ կոզակացն ի վեց կանգնոյ։ 7Եւ կոզակն երկրորդ հաւասար ձողոյն ի լայնութիւն, եւ հաւասար ձողոյն յերկայնութիւն, եւ կամարն ի հինգ կանգնոյ։ 8Եւ կոզակն երրորդ հաւասար ձողոյն յերկայնութիւն, եւ հաւասար ձողոյն ի լայնութիւն, եւ կամար դրանն մերձ ի կոնք դրանն յութ կանգնոյ. 9եւ կամարք յերկուց կանգնոց, եւ կամարք ներքին դրանն։ 10Եւ կոզակք դրանն դէմ յանդիման միմեանց՝՝ երեք աստի եւ երեք անտի. եւ չափ մի էր երեցուն, եւ չափ մի կամարացն՝ աստի եւ անտի։ 11Եւ չափեաց զլայնութիւն մտից դրանն ի տասն կանգնոյ, եւ զերկայնութիւն դրանն յերեքտասան կանգնոյ։ 12Եւ ի մի կանգուն բովանդակեալ դէմ յանդիման կոզակացն՝ ի մի կանգուն սահմանեալ յայս կոյս յայն կոյս, եւ կոզակքն՝՝ աստի եւ անտի ի վեց վեց կանգնոյ։ 13Եւ չափեաց զդուռնն ի պարսպէ կոզակին մինչեւ յորմ կոզակին՝՝, ի լայնութիւն քսան եւ հինգ կանգուն. եւ այն էր դուռն ի դրան վերայ։ 14Եւ զմիջոց կամարի դրանն եւ զկոզակս նորին ի վաթսուն կանգնոյ շուրջ զդրամբն. 15եւ զմիջոց սրահին արտաքնոյ եւ զմիջոց կամարի դրանն ներքնոյ՝ ի յիսուն կանգնոյ։ 16Եւ պատուհանք ծածուկ էին ի կոզակսն, եւ ի կամարսն ներքուստ դրան սրահին շուրջ շրջանակաւ. նոյնպէս եւ կամարացն, եւ պատուհանք շուրջ ներքոյ եւ արտաքոյ, եւ ի վերայ կամարացն արմաւենիք աստի եւ անտի։

17Եւ տարաւ զիս ի ներքին սրահն. եւ ահա դահլիճք եւ սիւնք շրջանակօք՝ շուրջ զսրահիւքն յօրինեալք, երեսուն դահլիճք ի մէջ սեանցն շրջանակաց։ 18Եւ սիւնք դէմ յանդիման դրանցն ըստ երկայնութեան դրանցն, եւ սիւնք շրջանակաւ ի ներքոյ։ 19Եւ չափեաց զլայնութիւն սրահին ի միջոցէ դրանն արտաքնոյ մինչեւ ցմիջոց դրանն ներքնոյ որ հայէր ընդ արեւելս՝ հարեւր կանգուն։ 20Եւ տարաւ զիս ի կողմն հիւսիսոյ, եւ ահա դուռն մի որ հայէր ընդ հիւսիսի սրահին արտաքնոյ. եւ չափեաց զնա յերկայնութիւն եւ ի լայնութիւն, 21եւ զկոզակս նորա աստի եւ անտի, եւ զկամարն եւ զկոնքն եւ զարմաւենիս. եւ եղեւ ըստ չափոյ դրանն որ հայէր ընդ արեւելս՝՝, յիսուն կանգուն յերկայնութիւն եւ քսան եւ հինգ կանգուն ի լայնութիւն։ 22Եւ պատուհանք նորա եւ կամարք եւ արմաւենիք ըստ՝՝ դրանն որ հայէր ընդ արեւելս. եւ ընդ եւթն սանդուղս ելանէին ի նա, եւ էր կամարակապ ի ներքոյ։ 23Եւ դուռն ներքին սրահին հայէր ընդ դուռն հիւսիսոյ՝ ըստ օրինակի դրանն որ հայէր ընդ արեւելս. եւ չափեաց զսրահն՝՝ դրանէ ի դուռն՝ հարեւր կանգուն։

24Եւ տարաւ զիս ընդ կողմն հարաւոյ, եւ ահա դուռն մի որ հայէր ընդ հարաւ. եւ չափեաց զնա եւ զկոզակս նորա եւ զկոնքս եւ զկամարս՝՝ ըստ նմին չափոյ։ 25Եւ պատուհանք նորա եւ կամարք շուրջանակաւ՝ ըստ օրինակի պատուհանիցն եւ կամարացն առաջնոյն, յիսուն կանգուն յերկայնութիւն եւ քսան եւ հինգ կանգուն ի լայնութիւն։ 26Եւ եւթն սանդուղք ի նմա, եւ կամարք ի ներքս՝՝, եւ արմաւենիք աստի եւ անտի ի վերայ կոնքացն։

27Եւ դուռն ներքոյ հանդէպ դրան սրահին որ հայէր ընդ հարաւ, եւ չափեաց զսրահն դրանէ ի դուռն ի լայնութիւն՝ հարեւր կանգուն ի կողմն հարաւոյ։ 28Եւ տարաւ զիս ի սրահն ներքին դրանն որ հայէր ընդ կողմն՝՝ հարաւոյ. եւ չափեաց զդուռնն որ ընդ հարաւ ըստ նմին չափոյ։ 29Եւ զկոզակսն եւ զկամարս եւ զկոնքս նովին չափով. եւ պատուհանք նորա եւ կամարք շուրջ շրջանակաւ, յիսուն կանգուն յերկայնութիւն եւ քսան եւ հինգ ի լայնութիւն։ 30Եւ շուրջ զնովաւ կամարք՝ յիսուն կանգուն յերկայնութիւն եւ քսան՝՝ եւ հինգ ի լայնութիւն։ 31Եւ կամարք յարտաքնում սրահին, եւ արմաւենիք ի կամարսն, եւ եւթն սանդուղք ելանելիք նորա։ 32Եւ տարաւ զիս ի դուռնն որ հայէր ընդ ճանապարհ արեւելից, եւ չափեաց զնա ըստ առաջին չափոյն. 33զկոզակսն եւ զկամարսն եւ զկոնքսն՝ ըստ նմին չափոյ. եւ պատուհանք ի նմա, եւ կամարք շուրջանակի՝՝, յիսուն կանգուն յերկայնութիւն եւ քսան եւ հինգ ի լայնութիւն։ 34Եւ կամարք ի ներքնում սրահին, եւ արմաւենիք ի վերայ կամարացն աստի եւ անտի, եւ եւթն սանդուղք ի նմա։՝՝

35Եւ տարաւ զիս ի դուռնն որ ընդ հիւսիսի, եւ չափեաց ըստ նմին չափոյ, 36զկոզակսն եւ զկամարսն եւ զկոնքս, եւ պատուհանք ի նմա շուրջանակի, եւ կամարք՝՝ յիսուն կանգուն յերկայնութիւն եւ քսան եւ հինգ կանգուն ի լայնութիւն։ 37Եւ կամարք արտաքոյ դրանն, եւ արմաւենիք կամարացն աստի եւ անտի, եւ ութ սանդուղք ի նմա։

38Եւ դահլիճք նորա եւ լայնութիւնք նորա եւ կամարք նորա հանդէպ երկրորդ դրանն՝ ուր լուանային զողջակէզսն։ 39Եւ ի կամարի՝՝ դրանն երկու սեղանք յայսկոյս, եւ երկու սեղանք յայնկոյս, զի զենուցուն ի նմա զողջակէզսն եւ զվասն մեղացն եւ զվասն անգիտութեանն։ 40Եւ ընդ հարաւակողմն խողովակի ողջակիզացն ի մուտս դրանն որ հայէր ընդ հիւսիսի՝ երկու սեղանք որ հայէր ընդ արեւելս. եւ ի հարաւակողմ կուսէ երկրորդի դրանն՝ հանդէպ կամարաց դրանն երկու սեղանք։ 41Եւ ընդ արեւելս ութ սեղանք. չորք սեղանք յայսկոյս, եւ չորք սեղանք յայնկոյս, հանդէպ հարաւոյ դրանն. եւ անդ զենուցուն զզոհսն եւ զողջակէզսն, յանդիման ութից սեղանոց ողջակիզացն։՝՝ 42Եւ չորք սեղանք ողջակիզացն քարեղէնք կոփածոյք, կանգնաւ եւ կիսով յերկայնութիւն, եւ կանգնաւ եւ կիսով ի լայնութիւն, եւ կանգնաւ եւ կիսով՝՝ ի բարձրութիւն. զի ի վերայ նոցա դիցեն զգործին՝ որով զենուցուն անդ զողջակէզսն եւ զզոհսն։ 43Եւ ծնօտս ուղկեանս քանդակագործս ունիցին ի ներքուստ շուրջանակի. եւ ի վերայ սեղանոյն յարկ՝ առ ի ծածկել յանձրեւոյ եւ յերաշտութենէ։

44Եւ տարաւ զիս ի սրահն ներքին. եւ ահա երկու պատշգամք ի ներքոյ սրահին, մի ընդ հարաւոյ դրանն որ հայէր ընդ հիւսիսի եւ հանէր ընդ հարաւ. եւ մի ընդ հիւսիսոյ դրանն որ հայէր ընդ հարաւ եւ հանէր ընդ հիւսիսի։ 45Եւ ասէ ցիս. Այս պատշգամ՝՝ որ հայի ընդ կողմանս հարաւոյ՝ քահանայիցն եղիցի որ պահեն զպահպանութիւնս տանն։ 46Եւ պատշգամն որ հայի ընդ հիւսիսի՝ քահանայիցն եղիցի, որ պահեն զպահպանութիւն սեղանոյն. նոքա են որդիք Սադովկայ՝ որ մերձենան ի Ղեւտացւոց անտի պաշտել զՏէր։ 47Եւ չափեաց զսրահն յերկայնութիւն հարեւր կանգուն, եւ ի լայնութիւն հարեւր կանգուն, զչորեսին կողմանս նորա, եւ սեղան յանդիման տաճարին։

48Եւ տարաւ զիս ի կոնք տաճարին, եւ չափեաց զլայնութիւն կոնքին՝՝ ի միոջէ կողմանէ հինգ կանգուն, եւ ի միւսմէ կողմանէ հինգ կանգուն, եւ զլայնութիւն մտին՝ չորեքտասան կանգուն. եւ զխոյակս ուսոց դրան կոնքին յայսկոյս յայնկոյս՝ երիս երիս կանգունս։ 49Եւ զբարձրութիւն կոնքին՝՝ քսան կանգուն, եւ զլայնութիւն նորին՝ մետասան կանգուն. եւ ընդ տասն աստիճան ելանէին ի նա, եւ սիւնք երկու էին աստի՝՝ եւ անտի։