1Եւ եհան զիս ի սրահն արտաքին ընդ արեւելս դէմ յանդիման դրանն հիւսիսոյ, եւ տարաւ զիս ի ներքս. եւ ահա պատշգամք հինգ՝ առանցիւք եւ խորշիւք ընդ կողմ հիւսիսոյ, 2հարեւր կանգուն յերկայնութիւն եւ յիսուն կանգուն ի լայնութիւն. 3նկարեալք ըստ օրինակի դրան սրահին ներքնոյ, եւ ըստ օրինակի շրջանակաւ սեանց սրահին արտաքնոյ. դէմ ընդ դէմ կարգեալ երեքսրահեան։ 4Եւ դէմ ընդ դէմ պատշգամացն գնացք ի տասն կանգնոյ լայնութիւն, եւ հարեւր կանգուն յերկայնութիւն. եւ ներգսագոյն կողմ ճանապարհին՝՝ կանգուն մի, եւ դրունք նոցա ընդ հիւսիսի։ 5Եւ գնացք ի վերնատունսն նոյնպէս, զի խառնեալ էին սիւնքն շրջանակաւ ի ներքուստ մինչեւ ի վեր. եւ անջրպետն նոյնպէս, եւ սիւնքն շրջանակօք, եւ անջրպետք եւ մոյթք. քանզի երեքսրահեանք էին։ 6Եւ սիւնք ոչ գոյին իբրեւ զսիւնս պատշգամացն. վասն այնորիկ առանցք էին ի ներքոյ կողմանէն, եւ ի միջնայարկացն ի գետնոյ կողմանէ յիսուն։ 7Եւ լոյս արտաքուստ, որպէս եւ պատշգամք սրահին արտաքնոյ որ հային դէմ յանդիման պատշգամացն՝ որ ընդ հիւսիսոյ՝ յերկայնութիւն յիսուն կանգուն։ 8Քանզի երկայնութիւն պատշգամացն որ հայէին ի սրահն արտաքին՝ էր ի յիսուն կանգնոյ, եւ նոքա էին դէմ յանդիման միմեանց, ընդ ամենայն հարեւր կանգուն։ 9Եւ դրունք պատշգամացն որ ընդ մուտս արեւելից՝ վասն մտանելոյ ընդ նոսա յարտաքին սրահէ անտի, 10ըստ լուսամտին առաջին գնացին որ ընդ կողմն հարաւոյ՝ դէմ յանդիման հարաւոյ, եւ ընդդէմ անջրպետացն եւ հանդէպ խորշիցն։ 11Եւ պատշգամքն եւ գնացքն հանդէպ նոցուն ըստ չափոյ պատշգամացն ճանապարհին՝ որ ընդ հիւսիսի, եւ ըստ երկայնութեան նոցա եւ ըստ լայնութեան նոցա եւ ըստ ելից նոցա, եւ ըստ շրջանակաց նոցին, եւ ըստ լուսանցուցաց. 12եւ ըստ մտից պատշգամացն՝ որ ընդ հիւսիս, ըստ մտից պատշգամացն որ ընդ հարաւ. եւ ըստ մտից առաջին գնացիցն առ ի զլոյսն տալոյ անջրպետութեան ձողոյն, եւ հանդէպ արեւելից գնալ ընդ նոսա։

13Եւ ասէ ցիս. Պատշգամքդ որ են ընդ հիւսիսի, եւ պատշգամքդ որ են ընդ հարաւ՝ հանդէպ բացատացն, դոքա են պատշգամք սրբութեանն ուր ուտեն քահանայքն որդիքն Սադովկայ մերձաւորք Տեառն զսրբութիւն սրբութեանցն՝՝, եւ անդ դիցեն զսրբութիւն սրբութեանցն, եւ զզոհսն եւ զվասն մեղացն եւ զվասն անգիտութեանն. քանզի սուրբ է տեղին։ 14Եւ մի՛ ոք մտանիցէ անդր բաց ի քահանայիցն. եւ ոչ ելանիցեն ի սրբութենէ անտի ի սրահն արտաքին. զի յամենայն ժամանակի որ մերձենանն՝ սուրբ կացցեն. եւ մի՛ մատչիցին ի պատմուճանս իւրեանց որով պաշտիցենն, քանզի սուրբ է այն՝՝. եւ զգեցցին այլ հանդերձ յորժամ մերձենայցեն ի ժողովուրդն։

15Եւ կատարեցաւ չափ տաճարին ներքնոյ. եւ եհան զիս ընդ ճանապարհ դրանն որ հայէր ընդ արեւելս, եւ չափեաց զձեւ տանն շուրջանակի ըստ յօրինուածոյ։ 16Եւ եկն եկաց առ հարաւային դրանն որ հայէր ընդ արեւելս, եւ չափեաց հինգ հարեւր չափով ձողոյն։ 17Եւ դարձաւ ի կողմ հիւսիսոյ, եւ չափեաց հանդէպ հիւսիսոյ հինգ հարեւր չափով ձողոյն։ 18Եւ դարձաւ ի ծովակողմն, եւ չափեաց հանդէպ ծովուն հինգ հարեւր չափով ձողոյն։ 19Եւ դարձաւ ի կողմն հարաւոյ, եւ չափեաց հանդէպ հարաւոյ հինգ հարեւր չափով ձողոյն։ 20Եւ զփողոցս նորա շուրջանակի ի չորեսին կողմանսն նովին չափով. եւ յօրինեաց զնա եւ զփողոցս նորա շուրջանակի՝ ի հինգ հարեւր կանգնոյ հանդէպ արեւելից, եւ ի հինգ հարեւր կանգնոյ զլայնութիւնն՝ անջրպետել ի մէջ սրբութեանցն, եւ ի մէջ պարսպացն յօրինուածոյ տաճարին։՝՝