1Եւ ի վիճակել ձեզ զերկիրն ի ժառանգութիւն՝ զատուսջիք պտուղ Տեառն սուրբ յերկրէն քսան եւ հինգ հազար յերկայնութիւն եւ տասն հազար ի լայնութիւն՝ նուիրեալ եղիցի յամենայն սահմանս նորա շուրջանակի։ 2Եւ եղիցի յայնմանէ ի սրբութիւն՝ հինգ հարեւր առ հինգ հարեւր չորեքկուսի շուրջանակի. եւ յիսուն կանգուն բացատացն շուրջանակի։ 3Եւ յայսմ չափոյ չափեսցի քսան եւ հինգ հազար յերկայնութիւն եւ տասն հազար ի լայնութիւն, եւ ի նմա եղիցի սրբութիւն սրբութեանցն. 4նուիրեալ յերկրէն եղիցի քահանայիցն որ պաշտիցեն ի սրբութեանն, այնոցիկ որ մերձենան պաշտել զՏէր. եւ եղիցի նոցա տեղի մի զատեալ ի տուն սրբութեան իւրեանց՝ 5քսան՝՝ եւ հինգ հազար յերկայնութիւն եւ տասն հազար ի լայնութիւն եւ Ղեւտացւոցն որ պաշտեն ի տաճարին՝ եղիցի ի կալուածս քաղաքի ի բնակութիւն։ 6Ըստ բնակութեան՝՝ քաղաքի տացես՝ հինգ հազար ի լայնութիւն, եւ քսան եւ հինգ հազար յերկայնութիւն ըստ երախայրեաց սրբութեանցն՝ յամենայն տանէն Իսրայելի եղիցի։ 7Եւ առաջնորդին յայնմանէ եւ անտի յերախայրիս սրբոցն ի նիստ քաղաքին յանդիման երախայրեաց սրբութեանցն, ընդդէմ բնակութեան քաղաքին ընդ կողմ ծովու. եւ ի ծովէն ընդ արեւելս. եւ երկայնութիւն ըստ միոյ վիճակաց ի սահմանացն որ ընդ ծովակողմն, եւ լայնութիւն ըստ սահմանաց երկրին որ ընդ արեւելս։ 8Եւ՝՝ եղիցի նմա ի կալուածս ի մէջ Իսրայելի. եւ ոչ եւս բուռն լիցին իշխանք որդւոցն Իսրայելի՝՝ ժողովրդեան իմում, եւ զերկիրն վիճակեալ ժառանգեսցեն տունն՝՝ Իսրայելի ըստ ազգս իւրեանց։

9Այսպէս ասէ Տէր Տէր. Շատ լիցի ձեզ, իշխանքդ Իսրայելի. արդ ի բաց արարէք զապիրատութիւն եւ զչուառութիւն, իրաւունս եւ արդարութիւն արարէք, ի բաց մերժեցէք զբռնաւորութիւն ի ժողովրդենէ իմմէ, ասէ Տէր Աստուած։ 10Կշիռք արդար եւ չափ արդար եւ կապիճ արդար եղիցի չափոյ ձերոյ։ 11Եւ կապիճ նոյն լիցի տալոյ եւ առնլոյ. տասներորդն գրուի եղիցի կապիճ, եւ տասներորդ գրուի կապիճն՝ կշիռ ըստ գրուին եւ ըստ արդուին եղիցի։ 12Եւ կշիռն՝՝ քսան դանգ, եւ քսան սիկղ եւ քսան եւ հինգ սիկղ, եւ ի քսան եւ ի հինգ սկեղէ՝՝ եղիցի ձեզ մնաս մի։

13Եւ այս պտուղ իցէ զոր զատանիցէք. զվեցերորդ չափոյն ի գրուէ ցորենոյ, եւ զվեցերորդ արդուի ի քոռէ գարւոյ։ 14Եւ հրաման ձիթոյ, քսեստ մի իւղոյ, տասներորդ սափորոյն, զի տասն քսեստն է սափոր մի։ 15Եւ ոչխար մի ի տասն ոչխարէ՝ նուէրք յամենայն ազգացն Իսրայելի ի զոհս եւ յողջակէզս քաւութեան եւ փրկութեան ձերոյ՝՝, ասէ Տէր Աստուած։ 16Եւ ամենայն ժողովուրդ երկրիդ տացէ զերախայրիսն ցառաջնորդս Իսրայելի։

17Եւ ի ձեռն առաջնորդին՝՝ եղիցին ողջակէզքն եւ զոհքն եւ սպանդքն՝ ի տօնս եւ յամսագլուխս եւ ի շաբաթս յամենայն տօնս տանդ Իսրայելի նա մատուսցէ զվասն մեղացն եւ զզոհսն եւ զողջակէզսն եւ զվասն փրկութեանն՝ քաւել զտունդ՝՝ Իսրայելի։

18Այսպէս ասէ Տէր Աստուած. Յառաջնում ամսեանն որ օր մի իցէ ամսոյն՝ առնուցուս զուարակ մի յանդւոյ անարատ՝ քաւել զսրբութիւնն։ 19Եւ առցէ քահանայն յարենէ քաւութեանն, եւ ցանեսցէ ի վերայ սեմոց տանն եւ ի վերայ չորեցունց անկեանց տաճարին եւ ի վերայ՝՝ սեղանոյն, եւ ի վերայ սեմոց դրանն ներքին սրահին։ 20Եւ այսպէս արասցէ որ օր եւթն իցէ ամսոյն, յամենայն յանգէտս յանցաւորէ եւ ի տղայոց քաւել՝՝ զտունն։

21Եւ յամսեանն առաջնում՝ որ օր չորեքտասան իցէ ամսոյն, եղիցի ձեզ տօնն պասէք, զեւթն օր բաղարջ կերիջիք։ 22Եւ արասցէ առաջնորդն յաւուրն յայնմիկ վասն իւր եւ վասն տանն՝՝ եւ վասն ամենայն ժողովրդեան երկրին զուարակ մի յարջառոց վասն մեղաց։ 23Եւ զեւթն օր տօնին արասցէ ողջակէզս Տեառն, եւթն զուարակ եւ եւթն խոյ անարատ՝ աւուր աւուր՝ զեւթն օր. եւ վասն մեղաց նոխազ մի յայծեաց աւուր աւուր. 24եւ զոհ եւ նաշիհ գործեալ ըստ զուարակին, եւ հաց գործեալ ըստ խոյին, եւ քսեստ մի եւղ ըստ հացին։ 25Եւ յամսեանն երրորդի՝ որ օր հինգետասան իցէ ամսոյն, արասցեն տօն ըստ օրինակի եւթանց աւուրց, որպէս վասն մեղացն եւ վասն ողջակիզացն, եւ ըստ նաշհոյն եւ ըստ ձիթոյն։՝՝